08/07/2020
Librarian | end is another beginning
Librarian a.k.a 飯堂終歸要成為回憶。
喺寫呢段感言嘅時候，我徹夜未眠皆因已被跟蹤同翻摷垃圾，呢一年發生嘅事，又實在無辦法三言兩語可以表達。最後，我用咗一整晚時間整合咗以下嘅說話同大家暫別⋯⋯
首先，我好多謝每一位曾經到訪嘅你。多謝你哋相信我，俾機會我去照顧一班好撚鐘意香港嘅小朋友。
1. 飯堂？無人識你啊。
好多人認識我都係透過蘋果嘅報導，但本來我係決定唔會接受任何訪問，直至有記者問我：「究竟香港人幾時開始連食飯都要擔心？」自我審查係好可怕，代表咗恐懼已經植根咗喺你心入面。話雖如此⋯⋯飯堂：一個為小朋友安排兩餸一湯嘅地方，最終淪為政治下嘅犧牲品。
2.呢一年做過啲咩？
-“多個人多雙筷”：為青少年提供一個休憩空間及由義工媽媽們所準備嘅晚飯。
-“一班乖孫”：為青少年提供暑期實習機會，試過響兩星期內製作出一本期刊：weconnect，之後仲有探訪老人嘅活動
-“年宵見”：因為本年度的年宵乾貨市場被取消，活動嘅目的係為咗幫香港人保留集體回憶
- “外賣仔”：因為疫情關係，希望為大家提供一個只屬於香港人嘅外賣平台，另外其實仲有好多好多好多：冬至飯、花牌製作、老人電話班⋯⋯等等
3.將來嘅計劃？
而家講將來，彷彿好似好難預計咁，但我又好希望可以再同大家見面，又或者有無人肯請我T^T
4.有咩感想？
我係香港人，亦從來無否定中國文化，講嘅係廣東話，寫嘅係繁體字，所以我更加深信*「修身、齊家﹑治國、平天下」*而唔係所謂有國才有家
5.祝願香港嘅說話
我願榮光歸香港！我堅信沒有絕對正義，唔好用自己把尺去量度其他人，只能做好自己堅守自己信念。唯有信念是不死的。毋忘初心，對準政權，民主自由必須要容得下每一種聲音。
公開聲明
七一過後為免影響大家生活，”多個人多雙筷”活動會響七月八日正式解散；又由於眾籌未達預期目標，將退還所收到嘅一切款項，有關退款一切安排，本人會直接同捐贈者聯絡，如有查詢，歡迎致電/透過signal 聯絡本人。
今宵多珍重，未來見。
Andy
七月八日
