https://www.facebook.com/102398518329095/

NHA VES, Bissau (2026)

13/09/2024

DIA 20 DE OUTUBRO
DJUMBAI NA CASA GRANDE
Centro Cultural Francês (Bissau)

LANÇAMENTO DO MEU ÁLBUM
Intitulado "I VEZ DI N'FASIL "

23/06/2022

Mon di riba

Un pobri jardineiro prukura tarbadju tudu tipu di manera disna ki toma si diploma i ka consigui otcha...
I tené gora un badjuda ki prenhanta i kila sta dja nasi seti mis di gravidez 🤰, i el jardineiro i ka odja só tarbadju.
Tudu nundé ki bai é ka tá setal lá, toki si badjuda sta na oito mis i na falta só alguns dias pa novi mis di gravidez i bim bai pidi un mindjer muitu bunita ki tené dinheru i també si omi tené dinheru tarbadju, nim ki di limpa kau mas só pe pudi guarda un bokadinhu di dinheru pa hora k**i mindjer na padi pe pudi firma suma omi.
Ma suma el mindjer també si omi ka tá sinta tudu ora i sta na negos bai ku bim i nim pokinhu di tempu i ka tá tené parel só trás di afer, mindjer dixidi prova jardineiro é condison di tarbadju.

👉🏽 Jardineiro tem ki ba tá dital també ora ki pricisa

👉🏽 Kada bias ki kila dital i na ba tá aumental trinta mil na salário logu final di mis i na ba tá djuntal tudu ku salário i dal un bias

👉🏽 Si kila fassil tudu ké ki misti na k**a i na ba tá dal cinku mil suma subsídio di cada dia ki dital

👉🏽 Si jardineiro ka fassil ke ki misti i ka na pagal si fim di mis

Logu suma el jardineiro i pricisa nam di tarbadju rissu sobritudu dinheru i f**a só i na cossa cabeça i na misquinha pabia i ka misti trai si badjuda i també i ka misti pirdi kil tarbadju i mindjer també misti pe ba tá dital pabia si omi ka tá prestal atenson, mindjer falal.

Ka bu nega bom tarbadju sim fresku bu dianti, ku bom salário di duzentus mil pa kada mis.

Omi obi mindjer falal i na ba tá pagal duzentus mil kada mis fora disi subsídio di cinku mil ku mas trinta mil di kada bias ki dital i seta condison di tarbadju.

Passandu alguns sumanas omi kunsa ki diskubri kuma algun kussa sta na metadi entri si mindjer ku jardineiro i buska tudu provas i tené na mon i bai pa jardineiro i falal.

Abó sim panhau na dita ku nha mindjer bu na pul fora di kasa nim dussulin bu ka na toma, pois ntené ké ki na controla dja nha kasa tudu. I si bu fassi na fitchau nada ka na sai.

Omi contal só kuma i tené ké ki na controla kasa ma i ka contal kila i kal guarda... Ma i caméra ki omi m***a na tudu parti disi kasa i bai si negos.

Un dia di dus i també el jardineiro i ricibi tchamada di hospital di kuma si badjuda sta na altura, i dibidi padi ma só ora ki dinheru tchiga. I era fim di mis ma só di tardi ki mindjer dibidi pagal ora ki na sai di tarbadju.
Direpenti mindjer tchomal mas i falal.

Nha chocolati bim barsam deeee... Saudadis di bó.

Logu jardineiro panta i falal

Hmmmmm... Bu omi kuma si panham mas riba di bó i na tiram na tarbadju pois i na fitcham na polícia.

Mindjer també panha raiba i falal

Nha omi ka sta li... Si bu ka bim n’na tirau també na tarbadju pois n’ka na dau nim un dez fran.

Gos gora si abó na lugar di jardineiro ké ki bu na fassi ?

Bu na dissa pa bu badjuda murri na partu ?
Bu na dita mindjer bu kaba bu bai pulicia i té i pudi ka pagadu ?
Bu na dixidi disafia omi ô kuma ?

Vladimir Indequi

23/06/2022

Amor proibidu

Parti: 1

Mangas di a**s atrás i tem ba un mindjer muitu pobri i humildi tchomadu Soná ki na vivi k**i mamé pertu lagua di Kufada. El Soná i ka tchiga di tené nim un tipu di staplidadi nasi vida pabia di kuma si mamé contra el o i ka gosta del.
Si mamé ka gosta del pabia di kuma i padil kila ka parcil entermu di futis o pa ba tá odja lundju, i padil inocenti ma el mindjer i tené també si dus fidju femias ki sail na futis o nô pudi fala ki tené cabeça, ki signif**a poteira ki tá odja kussas ki alguin normal ka pudi odja. É mas tá sta djuntu elis tris pabia é tá odja ku dus udjus i utru bias é tá kumé ku irans o futcherus disé zona enquantu ki Soná i mindjer inocenti ki padidu na familia poteiru i el i bim muitu diferenti nasi familias.
Suma si dus irmãs ka gosta ba del i també si mamé ka gosta del é tá abandonal sempri é bai sé misson di serviços di kumé ku irans ku mas fassi contratu pasé cabeça.
Un dia Soná bim dixidi abandona sé kau pabia i ka tá sta nada avontadi lá dividu mangas di kussas ki tá dati i na odja suma cobras, iran-cegu ku gritus di limarias i sobritudu di noiti i ka tá consigui durmi i tá sta suma utru kussa na ianda riba di kasa ku voz di mininus ki tá na obi mandrugada.
Soná kaba di munda sim conta si parentis i bai pa utru ladu. Un anu dipus i prenha ku un rapaz lá i padi fidju fémia é pul nomi di Clara.
Tris sumanas dipus di padi Clara si familias consigui panhal suma é na buskal ba é pensa Soná na bai tira elis sigridu fora. Otcha ké panha Soná é matal é tomal mininu na mon ki sedu un anju ki kaba di padidu di nomi Clara ma muitu i muitu bunita.
Mamé odja kuma k**i neta bunita i maina també matal i fala i na pul na lugar di Soná logu kil dus irmãs di Soná tudu sta di acordu.
É bai ku Clara pa sé matu é bai dal nomi di Dina é na crial lá suma fidju di catchur.
Passandu alguns tempus kil dus irmãs di Soná també padi. Un son padi dus gemios i kil utru padi un matchu.
Kil dus gemios mas garandi dadu nomi di Marcos i kil mas pikininu dadu nomi di Marciano enquantu ku kil un son dadu nomi di Malam.
Elis tudu quatru primos é na criadu na memu kau ma ku diferença total. Dina ka tá mimadu suma ku kil tris matchus tá mimadu, tantu si donas i suma si tia ka tá importa del i si dus tia ka tá tchiga di mamantal nim un dia memu ki na tchora fomi sé dianti é tá dal nam iagu pe bibi i utru ora é liti di bakas ku kabras ké tá dal toki é completa oitu anos elis tudu, ma só kuma Dina mas ba kil tris matchu garandi ku dus misis na metadi i kil dus gemios també mas kil un son ku un mis na metadi.
Ku tantu odiu ku rancor ki Dina na criadu kel nunka i ka sibi kim k**i mamé propi ma sempri i tá diskunfia kuma talvez si mamé ka sta lá ma nunka i sibi kim k**i mamé propi di bardadi.
Un dia kil dus tia di Dina bim kaba di matadu pa un omi futcheru pabia é sta ba na guerra na futis na lagua logu elis dus tias é misti ba djunta na omi kila bim kaba di mata elis tudu dus un bias suma i mas elis puder.
N’ton suma kil dus tia di Dina murri é f**a kusé Dona é na vivi. Ma sempri sé Dona tá dati i tené sintidu di mata Dina i tá kaba di dissal.
Não n’ka na matal... N’na dissal pe ba tá tarbadja pasi ermons suma el i uniku fémia ki sta li. I na ba tá bari, i ferga, i k**inha i bai cata iagu na lagua pasi tris ermons bim laba kurpu. Logu assim nha tris principis ka na ba tá tarbadja nada na kasa é na ba tá kumé só é laba kurpu té sé ropas tudu Dina ki na ba tá labal.
Dona tá malcriata Dina suma un limaria qualquer na pul ferga, k**inha, cata iagu na lagua sim diskansu enquantu ku kil tris matchus só brinka ku bai montia ku sé tarbadju.
Dina continua na kil tarbadju forçadu sim sibi ké ki na fassi pabia i ka pudi ba kapli elis na mon i tudu manera ki na tenta fugi é tá odjal pabia disé futchindadi elis tudu quatru pabia kil tris matchus passa é tené també cabeça suma sé mames i Dina nada ka tené i tá sta suma tula nasé metadi o seja i sai també si mamé.
Quinzi a**s dipus Dina continua na memu situason i utru dia i tá sedu pior pabia é tá dati é tudjil kumida.
Sempri ora ké tudjil ba kumida el Dina i tá bai buska ba di kumé na matu suma limaria, dia ki ka consigui di kumé i tá resta na f**a ku fomi o durmi ku fomi toki passa i na habitua f**a el só i també ku durmi ku fomi.
Sempri si tarbadja na kasa tudu i kaba i bai pa kata iagu na lagua i tá sinta i na diskansa i na canta un musica muitu tristi i té alguns katchus tudu tá obi kil musica é passa é na kustumal suma un Barbi na kil matu isoladu.
Kada bias ki na canta kil musica muitu tristi katchus tá sinta ba nasé ramus pertu del é na sukutal.
Certu dia si Dona cordal muitu cedu i falal pe f**a i kuda di kasa pabia elis quatru é na bai bias.
Dina n’na n’tergau kasa na mon, ma nada di mal i nim nada ka na falta li. Si bu pensa també kuma bu pudi fugi li i bu cabeça só ki na bai.
Dina obi kil kussa i pidil ku lágrimas na rostu.
Dona dissam pam bai ku bos n’ka pudi f**a li ami só. Kaba utru ora lubus ku mininus tá na tchora riba di kasa.
Xeeeee...
Si Dona dal un bofotada i falal.
Kala boka omeee... Nim kau bu ka na bai, li ku bu na f**a nel. Nô na bim dipus di tris dias.
É bai é f**a Dina el só lá. Sim pirdi tempu Dina lanta i na bari kau i na canta mas si musica catchus f**a é na bim un son un son.
Konformi i na bari kau assim ki tá na canta i na tchora i catchus també tá na salta-salta é na siguil konformi i na bari kau toki kaba i lambu si baldu i pega caminhu pa lagua i na canta mas só, catchus també pega mas si trás só pa ba tá obi kil tal musica muitu bunitu i tristi.
Dipus kel Dina i tchiga na lagua i finca n’da baldu i sinta bas di un arvuri i na repousa i na misquinha si cansera ku dur ki tené.
N’ka sibi ké kun iara nha Dona ki pu i tiram di parti. Kuma kun na fassi ami só li nes matu ku limarias ki tá bim riba di kasa di noiti. Talvez nha vida na kaba aos.
I continua só sintadu bas di kil arvuri na beira di lagua i na djubi kau di un ladu pa utru i na canta si musica i katchus ki gosta di obi si musica tudu sinta nasé respetivu ramus é na djubil é na obi si musica muitu suavi i tristi.

Autor: Vladimir Indequi

Dipus parti: 2

23/06/2022

Amor proibidu

Parti: 3

Dina tchiga na kasa i kambia elis iagu na tanki pe kabanta fassi sé mistida elis tudu quatru. Ma suma é ka gosta del é tenel lá suma mininu di criason o no pudi fala suma un scrava pe ba tá kata elis iagu, i ferga i fassi tudu sim diskansu.
Dina tá tarbadja dia ku noiti sim para i mandrugada i ka tá consigui durmi dritu si spiritu tá stal tudu riba, utru dia i tá na sunha stranhu sim sibi kal ki sintidu di kil sunhu i tá lanta i sinta nasi padaz di spuma ké dal pe bati na tchon i ba tá durmi.
Dia na bai dia na bim, el Dina i mas tá na tarbadja i també katchus mas na ganha confiança nel é kunsa ki diskubri kuma ki Dina tá passa sacrificiu toki é sta na kunsi si tcheru ku ora ki tá passa na matu el só pa bai kata iagu na lagua.
Nunka katchus ka tá sai si trás té na dia ké tenta disviantal di kaminhu pa pudi fugintil pa lebal un reinu muitu bunitu ma é ka consigui pabia Dona di Dina odja ké ki na passa di lundju i bai tadja elis k**i tris netus na kaminhu i ribanta Dina i kaba i amiaçal.
Dia ku bu tenta fugi mas, i na kusta cabeças di kil katchus tudu...
Dona ka bu matam nha amigus, elis kun considera suma nha familias i tudu pa mi. N’ka tené ninguin ki tá brinka ku mi si ka elis ki tá consigui dam moral di vida.
Ok... N’contau só, dia ku bu n’tenta mas fugi bu na odja ku bu dus kukus di udjus. Bu amigus murri tudu o bu continua tarbadja kinti-kinti.
Dona n’na continua tarbadja sim fugi, ma ka bu tira vida di nim un son di nha queridus amigus kun ama suma ku bu ama bu netus.
Si Dona ka volta kudil i abandonal i bai na brinka k**i tris netus i na mostra elis utru manera di montia limarias ki panha almas di pekadur.
Dina f**a muitu tristi na obi Kuma é na mata si mindjoris amigus ki tá brinka kel i resolvi dissa di tudu i pega si tarbadju forçadu só pa pudi salvaguarda vidas disi amigus katchus ki sta na risku di vida.
Na dia siguinti el Dina i bai pa kata iagu katchus bim é dal moral.
Nô sibi kuma bu sta tristi i bu prekupa ku nos, ma ka bu medi nada nô na tenta fugintiu di bu Dona ku bu ermons. Si bu ka sai nasé mon é kapaz di bim kumeu ô é mitiu nasé iagu di kumé carni di pekadur.
Não ka bô fassi kila... Nim ki pam murri ma pa bô sta salvu só.
Não nô princesa... Dia ki bu murri anos també tudu nô kapaz di murri pabia i na matanu tudu.
Dina obi ké ki katchus falal mas i sinti tristi i misti fugi i ka tá ossa mas, i tá riba pa trás i fala el propi i na luta k**i Dona té na dia ki na batil.
Ka bô medi nada... Un dia na panha nha Dona nasi tudu futchisdadi ki tá fassi.
Un katchu pikininu ki kunsa na ranka bua bai sinta nasi ombru i falal.
Princesa... Sedu claru pa nos i bu obi nô palabras, bu ka pudi guerra ku bu Dona nim un dia pabia i mas bó puder. Memu ki nô djunta anos tudu nada nô ka na pudi fassil pabia el i tené un saku magiku pikininu ki tá mostral tudu kussa i també tudu ké ki pidi kil saku kila tá dal el o i tá fassil.
Hmmmm... Kila i kal saku, assim pam bai quemal !
Não princesinha... Nunka bu ka pudi odja kil saku pabia i tá maral sempri nasi rabada i durmi també kel. Kil saku tené puder mas di ki bu Dona o n’pudi falau dentru di kil saku ku tudu puder di bu Dona sta nel.
I sta bom.
Princesa ! Uniku manera di bu salva i pa bu fugi delis, pois mas kil saku na ba tá torna invisível na bu rostu. Só kilis ki tené dus udjus ki pudi odjal.
Dipus kel Dina i kaba di runi ku katchus tudu i lambu si baldu di iagu i pega mas kaminhu pa kasa katchus tudu kumpanhal toki pertu tchiga é dissal pe bai el só.
Dina tchiga ma ku sintidu na kil saku pa pudi tomal. I tá vira tudu manera só pa odja kil saku i ka consigui i rabida i sinta bas di tanki i na djungu toki kaba di kai mas na un sunhu muitu stranhu.

Na sunhu i sta na sunhu kuma si Dona panhal k**i tris primos ermons é rinkal si dus dintis di canivu o nô pudi fala dintis di catchur é na tenta mitil gudja na lugar di dintis.

Dina panta i guirta ku força toki katchus sinti gritu através di spiritu.
Wuuuaaiiiiiiii n’na murriiiiiiiii...
Si tris primos també tudu panta é vira é djubil ku un manera muitu stranhu.
Malam ma ké ki tené Dina i na guirta sim !
Talvez i na sunha nam ku nos també...
Não Marciano... N’ka fia nos Dina pudi sunha ku nos pa odjanu.
Talvez també i panta só...
N’kuda i kila...
Ma n’na conta bos un kussa... Ami un ora n’ta tené vontadi di durmi kel spiritualmenti.Sempri n’ta tenta violal na futis através di sonu profundu n’ka tá consigui...
Malam ami n’tenta dital na sunhu suma ku bu fala n’ka consigui pabia i tá fitcha si pés rissu i també n’ta dati n’odja un mindjer firma si dianti i na djubim logu n’ta disaparaci n’riba na k**a.
Nô na conta nam Dona... Si nô ka pudi dital na futis nô tá violal só anos tris na matu, ma nô mas el força.
Bardadi... Nim ki nô ka conta propi Dona, nô na tadjal só na kaminhu di matu nô dispil tudu un son na pegal mons, utru pega pés logu un son tá dital i kaba i pista si kumpanher pe fassi també.
Assim ki nô na fassil, dipus nô tá splica Dona di tudu i ka na falanu nada.
É fassi sé planu di viola Dina elis tris é kaba é na pera ora ki Dina na bai pa lagua pa pudi tadjal pa fassil diskarna ké implata parel pa violal.
Dina inocenti i ka tá sibi nada ki na passa tantu na sunhu i suma na realidadi. Nundé ki sinta nel bas di tanki i na misquinha lá ki sinta nel toki Marcos bim ku baldu na mon i falal.
Lanta bu bai katam iagu n’misti laba kurpu !
Dina lanta i firma i falal
Marcos ma iagu sta n’da na tanki...
Djubi bai katam só iagu... N’falau n’ka odja iagu ki sta na tanki !
Ma pabia gora ku bu ka tomal bu na pum mas bai lagua nim i ka tarda kun sai di lá !
Eiiieeeiiikkiieeeeeee... Ami n’ka misti laba ku iagu di tanki aos, bu na bai katam nam utru nobu na baldu bu tissi pam laba.
Não Marcos para és...
Djubi pega baldu bu bai...
Dina na tarda pa toma baldu i guirta sé Dona.
Dona... Dona... Ali n’na pidil pe bai katam iagu i nega i firma i na diskuti n’da.
Sim pirdi tempu sé Dona bim riba di força i fala Dina.
Si bu ka toma baldu bu passa pa bai kata iagu bu na sibi ké ki tem.
Dina ruspundi sé Dona ku un ton tristi ku lágrimas na rostu.
Dona ali iagu na tanki kun kunsa kaba di kata gossi sim nim i ka tarda...
Kala boka. Anos tudu nô odjal, passa pa bai kata iagu antis di n’dau ku squerda sim.
Dina lembra djanam tudu ké ki katchus falal i toma baldu na mon di Marcos kinti-kinti i pega kaminhu pa riba mas lagua.
Logu si tris primos contenti é fala n’urtru.
Aos pla**s na bali...
Fiah... Aos n’na supal si mama tokkk, kaba i firma nam tchammmm...
Kkkkkk... Aos també i ka na kaplinu.
Não i ka na kapli.
Nô purpara bai tadjal dianti antis di tchiga lagua.
Nô bai ku tartchadus pabia disi amigus katchus pudi bim entra na difindil lá.
I bardadi.
É lambu sé tartchadus elis tudu tris é ranka kurri pa miti na utru kaminhu pa bai tadja Dina dianti pa pudi bafal.
Nô djanti... Nô djanti...

Autor: Vladimir Indequi

Dipus parti: 4

23/06/2022

Amor proibidu

Parti: 2

Dina sinta bas di kil arvuri mas di ki un hora di tempu só na canta si música tristi ku lágrimas na rostu sim lanta pa bai kata iagu pa riba pa kasa toki katchus passa gos é na ria é na bim pertu del un bokadu un bokadu. Uns di katchus mas pikininu kaba di bai sinta nasi ombru i na obil manera ki na kanta musica i na djubil mas dentru di udjus.
Dina també ka fassil nada i dissal sintadu nasi ombru i continua na canta si musica ku tudu dur ki na sinti dentru del pa manera ké tá tratal i també sim kunsi kim k**i mamé k**i papé.
Alguns horas dipus i kaba di lanta i kata si iagu i pega kaminhu pa riba kasa.
Na kaminhu memu i na canta mas si musica i na bai sim djubi pa trás. Katchus continua mas na siguil i utrus limarias bim kaba di sai també pa sibi kim ki na canta kil musica bunitu i tristi.
Un fidju di gazela obil i na canta i toka si mamé i falal.
Mama é badjuda na canta musica tristi...
Sim nha fidju... Pareci i un princesa di ilha...
Pudi sedu mama... Ami n’misti sedu si amigu !
Não nha fidju... I dificil pa un gazela sedu amigu di pekadur. Elis ki tá matanu é na kumé djuntu ku no predatoris...
Ahhhh mamaaaa... Pareci el i un princesa di ilha di iagu. Pabia sempri n’ta odjal i na passa li pa bai kata iagu na lagua i katchus tudu tá pega si trás.
Sim fidju... Ma nunka ka bu furanta kara parel si ka sim i pudi kusta bu vida.
Mama ami n’tem confiança nel kuma i un princesa ki abandonadu na matu. Té katchus tudu tá obi si voz é na siguil di ramu pa ramu, i ka tá fassi elis nada é sedu amigu i ami també assim kun pudi sedu si amigu.
Fidju toma atenson...
Kil pobri fidju di gazela sinti pa Dina i misti só sedu amigu kel ma si mamé ka pirmitil kila.
Dina bai toki tchiga kasa i kambia iagu na tanki i riba mas i kata i bai kambia. I kata mas di ki 15 baldus di iagu pa tanki kunsa intchi pe sinta i diskansa.
Pabia di kansera i kaba di durmi i kai na un sunhu profundu ku limarias.

I sunha kuma si mamé fugi nam ku bariga pabia di guerra na matu i si papé matadu. Logu na un lagua pa kamba pa utru ladu pa pudi kapli di kilis ki na serkal i bai kaba di padil na beira di lagua, un santchu bim i tomal i bai kel. Kil djintis f**a é mata si mamé, el i passa i na criadu pa santchus i sedu amigu ku tudu tipus di limarias ki sta na kil matu i també i tá divirti ba sempri ku kil limarias i tá kanta djuntu kelis é brinka mas djuntu.
Ma un dia, tris lions bim pa atakal, santchus ka seta é sta na kil guerra ku lion logu el i aproveita fugi i bai kai na un rio, iagu rastal i bai paranta na utru ladu i kaba di kudjidu pa un mindjer garandi bedju futchera k**i kasa tené kobras mangadel ma katchus f**a é tá na protegil ba sempri contra maldadi di kil mindjer garandi é na fugintil di kil kau pa un lagua muitu sagradu nundé ku un serpenti sta nel.
Dipus kel i odja só kil serpenti i panta na sunhu i pupa.

Aiieeeaaaiiii...
Pupa ki pupa katchus tudu panta é kunsa ki bua di un ladu pa utru sim sibi pa nundé ké na bai.
Katchus kaba di padjiga lá tudu kada un son delis sugundi nasi ramu é na djimpini ké ki na acontici ku Dina.
Otcha ki Dina pircibi di kuma i sta nam ba na sunhu i també katchus tudu panta é sugundi i ranka mas kanta si musica sentadu ku un voz muitu suavi i na badja i na vira-vira i na dança.
Konformi i na kanta i na badja assim mas ki katchus tá na sai un son un son pa bim djubil mas.
I kanta la toki kau na buska sukuru i kaba di durmi sim sinti, katchus tudu riba nasé ninhus.
Mansi di utru dia el Dina i lanta i bari kau tudu i sai buska di kumé disna di parmanha toki sol na sai i ka consigui odja i pirdi força i kai na kaminhu.
Minutus dipus katchus kunsa ki bim lá un son un son.
Katchus odja kuma Dina ka sta na buli-buli é panta elis tudu é kunsa també ki tchora é na kanta musica. Através di kil musica Dina consigui sperta i lanta i odja katchus dal volta i djubi elis tudu i pircibi kuma kilas sta tristi i da elis sinal ku mon di kumé i tené fomi i també sedi.
Katchus també kaba di pircibil é dal sinal pe sigui elis. Dija kunsa ki sigui katchus kilas lebal na un orta garandi di midju. Sim pirdi tempu Dina kebra midjus i riba pa kasa djuntu ku katchus i bai sindi si fugu i firbinti midju tudu i kumé i pega mas brinka ku katchus toki sol na noiti é dispidi n’utru.
Apartir di kil dia Dina passa i na tené kustumi ku katchus i kilas sedu si amigus é kunsa ki pircibi n’utru na manera di papia logu el Dina i kunsa ki da elis nomis un son un son.
Finalmenti i tchiga dia nundé ki si Dona na riba k**i tris primos i conta katchus tudu kuma si Dona mau pe ba tá peral na matu o na lagua ora ki na kanta si musica.
Katchus passa é ka tá bim brinka kel na kasa só na lagua. Si Dona bim k**i tris primos é laba kurpu tudu ku kil iagu di tanki é mandal mas pa bai kata iagu na lagua.
Dina lambu baldu kinti-kinti i bai pa lagua i kata iagu i pega mas si kaminhu pa riba sim kanta pa katchus pudi sai suma di kustumi pa brinka kelis.

Autor: Vladimir Indequi

Dipus parti: 3

23/06/2022

Amor proibidu

Parti: 5

Iagu f**a i na darma ku Dina ku força pa bai i el Dina ka da di conta kuma si kurpu modja o iagu na darma kel. Ké ki prekupal i só pe tchiga kasa rapidu pa ka si Dona pudi kai riba del o pa amiaçal suma ki tarda tá amiaçal.
Na ninhu di alguns katchus
Tchuipi toka-toka si mindjer i odja kila ka sta na mixi i panta i ripiti tokal mas diki quatru bias kila ka lanta.
Utrus katchus obi Tchuipi na tchoma nomi disi mindjer trás di utru é diskunfia é bai sinta riba disé ninhu é puntal ku un voz muitu tristi.
Queridu amigu Tchuipiiii !!! Ké ki na passa ku bu mindjer !!!
I ka sta na da folgu i nim i ka iabri udju...
Ooooo Tchuipiiii... Kal ki motivu di es tudu nhor Deus !!!
Direpenti é sinti kila na buli-buli pé é panta mas elis tudu toki utru bua i bai sinta mas nasi ninhu. Tchuipi f**a i abraça si mindjer ku un ar tristi i falal.
Matucha quasi bu na matam di tenson... Ké ki passa ?
Hmmmmmm... Princesa murri...
Noooo Matucha. Pareci bu sta na un sunhu muitu profundu.
Ami n’odja Lubu bim i kumé Princesa !!
Matucha... Matuchaaaaa... Sta mas consentradu di fabur, quasi bu na matam paaaaa... Nô fidju ki sta ba na kurri pirigu ma princesa bim salval.
Princesaaaa !
Matucha, bu pirdi mimoria completamenti. Dissam pam kuda di nô fidju n’da ora ki bu bim rekupera mimoria bu tá papia ku mi.
Na kasa
Dina tchiga i odja si tris primus na papia ba kusé Dona nasi nomi.
Dona disna ki Dina bai kata iagu i ka bim n’da té gos deeee !!!
Xeeeeee... Nundé ki miti nel disna...
Dona nô ka sibi, kaba nô bai djubil mas na lagua nô ka odjal.
Fassi ké ! Nundé gora ki miti nel si cabeça nes matu el só ?
Dona anos tudu nô ka sibi nam nada ki na passa kel aos. Nô djubil na tudu kantu di matu nô ka odjal.
Huuunnnnn-hunnn-funnn... É mininu ka kunsi nundé kun kaba nel. Si tené nam rapaz na utru tabanka ki tá miti nel ami ki na kabal kel i ba tá djubi k**i udju.
Dona tudu manera i tené nam rapaz na utru tabanka suma ku bu fala.
Não Marciano. Kil tabanka també muitu lundju pa Dina tené rapaz lá.
Pera só...
Antis disé Dona kaba papia é obi voz di Dina sé trás.
Dona alin li nim un kau n’ka bai...
É vira elis tudu é odja kuma ki Dina modja tudu é sklama n’da é djubi n’utru elis quatru.
Dina panta i f**a só i na trimi i na pidi diskulpa.
Dona purdam... Purdam Dona... Nim un rapaz n’ka tené i també nunka n’odja nam utru rapaz ku nha udjus...
Kala boka... Nundé ku bu pirdi nel disna-disna i bu ermons na perau ku iagu bu ka kapaz di tchiga ?
Dona i tem ké kun odja na lagua kila ki...
N’ka puntau kila... Kuma ki bu modja sim tudu i nundé iagu ki bu tissi ?
I sta... I sta... I sta na baldu Dona...
Iagu sta na baldu !
Hiiii Dona i sta. Pera pam kambial m’bai kata mas utru rapidu.
Abó aos ki bu na sibi kuma ami ki padi bu mamé.
Dina bai pa kambia iagu na tanki i ka odja iagu tchiu i nim metadi di baldu iagu ka tchiga i sclama i misti só tchora. Logu di lá i kunsa da di conta kuma si kurpu tudu modja i bai pa papia i sinti só bofotada na kara.
Vammmmm...
Passa pa bai kata iagu dja... Ami ki bu na lepsi bu ka lepsi bu mamé ku bu papé.
Dina pega si baldu na mon i na tchora i na djanti pa lagua ku lágrimas na rostu.
Si tris primos f**a é contenti é na ri.
Ma i gimbral bofotada boooo... Toki m’panta n’da.
Kkkkkkk... Nim ami n’sintil pali, i sta nam propi suma ami ki gimbra el.
Kkkkkk... Bem merecidu...
Confia gora dee, kkkkkkk...
Dina tchiga lagua i kata iagu rapidu i riba i kambia purmeru baldu na tanki i riba mas i kata sugundu i bai kambia i di turceru i contra ku un omi muitu ma muitu bedju na matu ki na ianda ku pó i kila tchomal.
Querida ka bu medi nada...
Dina misti kurri ma si sintidu falal pe ka medi nada kila ka bim pa fassil mal pe firma i obil.
Querida ka bu panta i nim ka bu medi nada, n’tené un historia muitu bunitu pa contau acerca di bu vida. Ami i un velhu sábio disaparacidu disna di cantu tempu nes matu sagradu, ma pabia di bu sufrimentu m’bim pa contau un historia pam disaparci di un bias pa sempri.
Sim omi garandi, n’misti obi bu história ku tudu vontadi. Ma n’ka ossa firma mas li pa obiu si ka sim nha Dona na matam.
N’sibi kila querida... História kun na contau bu ka na acredita na mi i nim na bu cabeça, ma toma bu tempu bu obim i bu na ganha mangas di kussas kumi. N’sta ba na pera un alguin fiel nes tabanka kun na pudi conta nha historia i també ki dal nha puder pa liberta é tabanka na mons di futcherus ki rodial tcheiu di maldadi i nim utru djintis ka pudi povua li si ka elis só pabia é tá kumé pekadur i ami n’sta dja bedju n’ka tené mas força di guerra kelis.
Dina obi omi garandi falal futcherus i també kumé pekadur i panta i diskunfia un bokadu pabia i ka tá consigui durmi di noiti nasé kau. Di lá i fala kil veliu sábio.
Sinhor pirmitim pam leba iagu i ami n’na volta pam pudi obiu dritu.
I sta bom... Ali é anel, si bu bim riba bu tá pul na bu dedu bu pega viral-viral logu n’na apareci na bu frenti.
I sta bom.
Dina leba iagu i kambia i bai pa riba pa lagua mas si Dona diskunfia del suma i futchera també i tá odja Dina quasi tudu ora ki misti i tchomal i falal.
Bu bai papia ku alguin na matu mas hiii Dina !
Dina panta i misti só seta kuma hiiii i papia ku un omi garandi ma si sintidu tá rissu i tá f**a só kaladu.
Dina i ka bó kun na papia kel hiiii ! Bu bai pega djumbai mas na kaminhu i ka sim !
Dina medi si Dona mal i tá bai pa iabri boka pa contal bardadi pa ka kila bim sutal o i kastigal ma fala ka tá sai kel i tá sta suma muda ki misti papia ma i ka pudi.
Dina na falau un kussa. Si bu sedu, ami n’mas bó sedu kil ki bu sedu. Kil bu rabu ami ki na cortau el di dia-wammmm...
Dina panta n’da i vira i djubi si trás i ka odja rabu i palpa mas si rabada i ka sinti sinal di rabu i fala si cabeça.
Ma n’ka tené rabu, kuma ki Dona fala i na cortam rabu !
Si Dona odja kuma Dina ka sta na kudil i falal.
Bu pudi f**a muda ora ku bu misti, ma na mostrau bu lugar na nundé ki kunsa i na nundé ki kaba nel.
Nada mal Dona... N’ka pircibi nam nada ku bu na falam del ki manda.
Bu ka pircibi nada na kuma ! I aos kun na papia ku bó...
Diskulpa Dona, pera pam kabanta kata iagu pa nha ermons.
Não i ka pircis dja... Sintanda bu rabu na un kau.
Dona !
Sintandal kun falau si bu ka misti pam cortau el.
Suma i pega ba anel ki omi garandi dal, si Dona nota kuma i fitcha mon i puntal mas.
Ké ki bu pega na mon sim ki bu fitchal ?
Nada Dona, i só kuma nha mon direita na kalura nam.
Kalura kuma ! Gos iabril pam odja kil kalur ki sta...
Dona i ka pircis...
Iabril kun falau...
Dona nada ka stam na mon i també nada n’ka pega i simplis kalur.
Iabri só.
Dina nega iabri mon i djura pasi cabeça.
Kusta i na matam nam gos ma n’ka na iabri mon i nim i ka na sibi ké kun pega na mon.
Si Dona pegal na mon ku força pa pudi iabril el i ka consigui i vira pa bai tchoma si tris netus ki mas gosta del logu el Dina i aproveita i toma anel i n’guli i fitcha mas si mon ku força toki na trimi.
Si Dona tchiga i pegal mas mon ku força i falal.
Li aos na sibi ké ki bu pega.
Nada n’ka pega Dona i kalur...
Iabri gos só mon kun falau.
Si tris primu tchiga é grampal i utru forcal ku força só pa iabril mon.
Dina turci tris bias i kaba i iabri mon si Dona ka odja nada lá i fala si tris queridus netus.
Bô largal nada i ka tené na mon.
É largal é dissal lá i nim é ka m’porta del.
Horas dipus Dina lanta i bai pasi quarti i dita, parmanhã sedu i bai pa lagua pa kata iagu suma di kustumi.
I kata iagu tudu i bai pa sai dentru di lagua i subinti só pé direita i bai pa subinti di squerda un mon dati i ponta na iagu i na sai pa bai pegal na perna.

Autor: Vladimir Indequi

Dipus parti: 6