09/06/2026
“NJË DITË PLOT NGJYRA DHE SHQIP” –
Festa e fëmijëve në Athinë u kurorëzua me sukses të plotë!
Në hijen e pemëve të Parkut Rizari në Athinë, mes ngjyrave, zërave të fëmijëve, lojërave, këngëve, recitimeve dhe emocioneve të bukura, ditën e diel, në 7 qershor, Lidhja e Mësuesve Shqiptarë në Greqi organizoi me sukses festën e fëmijëve:
“Një ditë plot ngjyra dhe shqip”
me rastin e Ditës Ndërkombëtare të Fëmijëve.
Ishte një ditë ku gjuha shqipe nuk u dëgjua vetëm si mësim, por si gëzim; jo vetëm si fjalë, por si përqafim; jo vetëm si detyrë, por si ndjenjë e gjallë që bashkon fëmijë, prindër, mësues dhe komunitet.
Kjo veprimtari mblodhi së bashku fëmijë të kurseve të gjuhës shqipe në Athinë, prindër, mësues, përfaqësues institucionalë, përfaqësues të komunitetit shqiptar dhe miq të arsimit shqip në Greqi. Parku u kthye për disa orë në një hapësirë të hapur festive, ku fëmijëria, gjuha amtare dhe dashuria për kulturën shqiptare u bashkuan në mënyrën më të natyrshme dhe më të bukur.
Veprimtarinë e nderuan me praninë e tyre:
Luela Hajdaraga, Ambasadore e Republikës së Shqipërisë në Greqi;
z. Fitim Gllareva, përfaqësues i Zyrës së Kosovës në Greqi;
z. Θωμάς Γεωργιάδης, Αντιδήμαρχος Παιδείας & Διαγενεακής Αλληλεγγύης i Bashkisë së Athinës;
znj. Rovena Xhori, Kryetare e Komunitetit Shqiptar të Greqisë;
z. Διονύσης Κολλιόπουλος, Kryetar i Këshillit të Shkollave Fillore të Zonës nr. 4 të Athinës;
znj. Merita Muja, përfaqësuese e organizatës “Busulla për n’Tironë”;
znj. Arlinda Isarai, Kryetare e shoqatës “Bashkë për… ju”;
si dhe përfaqësues të tjerë, miq e dashamirës të komunitetit shqiptar.
Prania e tyre i dha veprimtarisë një dimension të veçantë institucional dhe komunitar. Takimi i drejtpërdrejtë me mësuesit, prindërit dhe fëmijët krijoi një urë të rëndësishme komunikimi dhe mirëkuptimi, duke hapur rrugë për bashkëpunime më të gjera në të ardhmen, në mbështetje të arsimit, gjuhës amtare, fëmijëve dhe integrimit të shëndetshëm të brezit të ri në shoqërinë ku jeton.
Në hapje të aktivitetit, Kryetarja e Lidhjes së Mësuesve Shqiptarë në Greqi, Klarita Selmanaj, përshëndeti të pranishmit, uroi mirëseardhjen dhe falënderoi të gjithë ata që kontribuan për realizimin e kësaj dite. Ajo theksoi rëndësinë e bashkëpunimit mes mësuesve, prindërve, institucioneve dhe komunitetit për ruajtjen e gjuhës shqipe te fëmijët shqiptarë në Greqi.
Që në fillim, mësues, prindër dhe nxënës punuan së bashku për të zbukuruar ambientin me tullumbace, pankarta dhe punime të krijuara nga vetë fëmijët. Duart e vogla, ngjyrat, vizatimet, lulet dhe pankartat e vendosura mes pemëve e kthyen parkun në një klasë të hapur feste, ku natyra u bë skenë, gjuha shqipe u bë zë dhe fëmijët u bënë zemra e ditës.
Ndërkohë, me përkushtim dhe dashuri, u përgatitën tavolinat festive, të mbushura me byrekë, kek, ëmbëlsira, pije, ujë, lëngje dhe shumë gjëra të tjera të sjella nga mësueset, prindërit dhe mbështetësit e aktivitetit.
Falënderojmë përzemërsisht znj. Merita Muja, si dhe të gjitha mësueset, prindërit dhe nxënësit që ndihmuan në përgatitjen e ambientit dhe të tryezave festive.
Gjithashtu falënderojmë gazetarët Nilda Baxha dhe Vladimir Selamaj, të cilët iu përgjigjën ftesës sonë dhe i kushtuan vëmendje kësaj feste përmes përgatitjes së kronikës mediatike. Prania dhe puna e tyre ndihmuan që mesazhi i kësaj dite — gëzimi i fëmijëve, puna e mësuesve dhe rëndësia e ruajtjes së gjuhës shqipe në diasporë — të përcillet më gjerë te publiku.
Një falënderim i veçantë shkon për z. Luan Kukaj, sipërmarrës dhe mik i komunitetit, i cili mbështeti organizimin e festës në Athinë me dashamirësi dhe bujari. Mbështetja e tij ishte një ndihmë e rëndësishme për realizimin sa më të bukur të kësaj dite kushtuar fëmijëve.
Festa nisi me krijimin e një rrethi të madh, ku u prezantuan me radhë të ftuarit e nderit, mësuesit, prindërit dhe, në fund, me një zë të përbashkët, nxënësit. Ishte një moment i thjeshtë, por shumë domethënës: një rreth njerëzish të bashkuar nga fëmijët, nga gjuha dhe nga dëshira për të ndërtuar diçka të bukur së bashku.
Më pas, fëmijët krijuan rrathë të brendshëm dhe, së bashku me mësueset, luajtën lojën tradicionale:
“Çova një letër mu në postë…”
Entuziazmi i tyre, të qeshurat, lëvizjet e gjalla dhe dëshira për të marrë pjesë e kthyen parkun në një hapësirë të vërtetë gëzimi. Loja u bë një urë e bukur mes brezave, ku fëmijët e diasporës prekën përmes lojës një pjesë të kujtesës sonë të përbashkët.
Festa vazhdoi me garën me thasë, me recitime nga fëmijët, me krijime të tyre, me lojën “Gjej mësuesen ose prindin”, si dhe me lojën “Tërhiq litarin”.
Një nga çastet më të bukura dhe më të paharrueshme ishte loja e tërheqjes së litarit me prindërit. Gara u kthye në një shpërthim të qeshurash, sidomos kur litari u këput dhe prindërit u rrëzuan duke qeshur me të madhe. Ai çast i papritur mbeti si një kujtim i ëmbël, një kthim i çiltër në fëmijërinë e prindërve dhe një dëshmi se festa e fëmijëve i bën të gjithë, për pak çaste, fëmijë.
Në vazhdim, fëmijëve iu shpërndanë lodra me ujë dhe flluska sapuni, duke e bërë atmosferën edhe më festive, të gjallë dhe plot ngjyra.
Festa vijoi me banketin e shtruar në natyrë, me recitime të reja dhe me një këngë të kënduar së bashku nga fëmijët, mësuesit dhe prindërit. Ishte një moment i thjeshtë dhe i bukur, ku zërat u bashkuan në një ndjenjë të përbashkët gëzimi, përkatësie dhe dashurie për gjuhën shqipe.
Kjo ditë tregoi edhe një herë se gjuha shqipe në diasporë nuk jeton vetëm në libra, klasa dhe fletore. Ajo jeton në lojë, në këngë, në recitim, në kujtime, në duart e fëmijëve që krijojnë, në zërat që shqiptojnë shqip dhe në prindërit që e mbështesin këtë rrugëtim me dashuri.
Gjuha shqipe jeton aty ku një fëmijë thotë emrin e vet me krenari.Jeton aty ku një prind buzëqesh kur e dëgjon fëmijën të recitojë shqip.Jeton aty ku një mësuese punon me zemër, edhe kur puna e saj nuk duket gjithmonë.Jeton aty ku komuniteti bashkohet jo për detyrim, por për dashuri.
Festa u mbyll me një moment të veçantë dhe shumë domethënës: shpërndarjen e certifikatave të mbylljes së vitit shkollor për nxënësit e kurseve të gjuhës shqipe. Ky çast solli emocione të bukura te fëmijët, prindërit dhe mësuesit, sepse çdo certifikatë ishte më shumë se një dokument vlerësimi; ishte një shenjë mirënjohjeje për përpjekjen, pjesëmarrjen dhe dashurinë e fëmijëve për gjuhën shqipe.
Me certifikatat në duar, buzëqeshjet e fëmijëve dhe urimin për takime të reja, festa u përmbyll në mënyrën më të bukur: me besimin se ky rrugëtim do të vazhdojë, me më shumë bashkëpunim, më shumë përkushtim dhe më shumë ditë të bukura kushtuar fëmijëve, gjuhës shqipe dhe kulturës sonë.
Falënderojmë me mirënjohje të gjithë mësuesit për punën, përkushtimin dhe bashkëpunimin e tyre; prindërit për mbështetjen e vazhdueshme; fëmijët për energjinë, buzëqeshjet dhe gëzimin që i dhanë kësaj dite; si dhe të gjithë të ftuarit, bashkëpunëtorët dhe miqtë që na nderuan me praninë e tyre.
“Një ditë plot ngjyra dhe shqip” nuk ishte thjesht një aktivitet festiv. Ishte një dëshmi e gjallë se kur mësuesit, prindërit, fëmijët, komuniteti dhe institucionet bëhen bashkë, gjuha shqipe nuk ruhet vetëm — ajo rritet, gëzon dhe merr frymë në zemrat e fëmijëve tanë.
Së bashku për gjuhën shqipe, kulturën, fëmijët dhe të ardhmen tonë në diasporë!
Lidhja e Mësuesve Shqiptarë në Greqi
ΕΝΩΣΗ ΑΛΒΑΝΩΝ ΕΚΠΑΙΔΕΥΤΙΚΩΝ ΣΤΗΝ ΕΛΛΑΔΑ
@κορυφαίοι θαυμαστές
Ambasada e Republikës së Shqipërisë në Greqi
Kosovo in Greece
Agjencia Kombëtare e Diasporës
Qendra e Botimeve për Diasporën
Ministria për Evropën dhe Punët e Jashtme - Republika e Shqipërisë
Bukuri Bello
Klarita Selmani
