30/12/2022
Taalliortoq erinniortorlu Kanuthus Hoseassen ippassaq toqukkut qimaguppoq, Narsarmiinit aammalumi nuna tamakkerlugu erinnat taallallu suliarinikuusai nuannarineqarluartut suliarinikuusaa ilisimaneqarluarput, taamaattumik annaasarput annertuvoq.
Kanuut tunuarsimaartuuvoq aammalu nuimaniartuunani taamaattumik saqqumilaartuunani.
Narsarmiit erinaataanik suliaqarnissaq aallartimmalli Kanuut siullerpaallugu apereqqaarnikuuara qujanartumillu akuersinikuulluni, taamaattorli kissaaataa tassaalluni immiusseqatigisakka nipilersortuussasut SG aamma EK nuannaralugit oqariartuutigisarmagit.
Qujamasuutigivara suliai "Orpigannguaq", "Tatigineqanngilatit", "Qitsukasik" aammalu "Japan" saqqummersinneqarneri naammattoormagit.
Kanuut nuannaarnini aammalu qujamasunnini suliatta ingerlallannerani naammassereerneratigullu nammineerluni sianertarpoq oqaloqatigillattaarnerani apuussillattaanikuuvoq.
Ukiut 40-inngulersuni maanna radiukkut Orpigannguaq tusarneqartuartarnikuuvoq maannalu nutarterlugu saqqummersipparput.
Kanuup suliai nipilersornikkut Narsami atorluarneqartuupput taamaattumik CD saqqummersinnialeratsigu nalornissuteqaavinnata Saamulu Ejvind-ilu isumaqatigiippugut CD Orpigannguaq-mik taaguuserniarlutigu, tamanna inuttaata nuannarigaa malugisarpara naak nammineerluni tamanna eqqartorpallaartanngikkaluaraa, pissusissamisut isigisimavarput taama taaguuteqassasoq, inuttaa ataqqiniarlugutigu.
Ilaqutai Jaaku kinguaavilu, Nuka kinguaavilu, Thorap kinguaavi, qanigisaalu allat aammalu ikinngutai tamaasa eqqqarsaatitsiniitippagut qanortoq annaasaqarnerminni qaanngiilluarumaartut.
CD-ip uummap pilersinneqarnerani Kanuut aallaaviginikuuarput siullertut suliai saqqummersinneqarnissaat siunertaralugu.
Taamatut allagaqalaarlugu Kanuut qimagunnerani apuukkusutakka ingerlatippakka, Kanuup eqqaaneqarnera ataqqinartuuli.
