23/04/2020
ჩემთვის ერთერთი საყვარელი გასართობი არის, იმ ქვეყნების შესახებ კითხვა, სადაც წასვლას არ ვაპირებ, არც ახლო მომავალში და შეიძლება, არც არასდროს. მაგრამ მაინც საყვარელი საქმიანობაა. 😂🙈 ერთხელაც მორიგი ასეთი ქექვის დროს ულამაზეს ფოტოს გადავაწყდი. ჰორიზონტზე მოჩანდა სიმაღლის მიხედვით დალაგებული მთები. ერთის სილუეტის მერე, მეორე იწყებოდა. შუაში ყვითლად აბიბინებული, მწიფე ბრინჯის ყანა გადაშლილიყო და ამ ყანის შუაგულში პატარა ნავებს, სამოძრაოდ ბილიკი გაეჭრათ. იმ წამსვე ჩემი ყურადღება ფოტოზე აღბეჭდილ ადგილს მიეჯაჭვა და თავიდან ეჭვი შემეპარა, საერთოდ თუ იყო ეს ადგილი რეალური?! გუგლში რამოდენიმე ძებნის გაშვების მერე, მივაგენი. სოფელი თამ კოკი, ვიეტნამი. ჰმ, რა საინტერესოა თქო და კიდევ უფრო სასიამოვნოდ გამაკვირვა, იქვე ამ სოფელში სხვა ადგილებმა, რაც არანაკლებ მომაჯადოვებელი იყო, ვიდრე ჩემს მიერ თავიდან ნაპოვნი ფოტო. ეგ იყო, იმის მერე ვამოწმებდი ხოლმე, რომელიმე ავიაკომპანიას, შემთხვევით, თუნდაც ამ ადგილიდან 1000 კმ ით დაშორებულ მიმართულებაზე, აქცია ხომ არ აქვსმეთქი და ძალიან მოულოდნელად თურქიშმა 10 თვით ადრე, წინასწარი გაყიდვები დაიწყო. 500 დოლარი ორივე გზა! სასწრაფოდ ვიყიდე. მართალია, ბრინჯის ოქროსფრად აბიბინებულ, მწიფე მინდვრებს ვერ ვნახავდი, ამისთვის ზაფხულის თვეებში უნდა წახვიდე, მაგრამ სამაგიეროდ მშრალ და თბილ ამინდს კი მპირდებოდნენ,არც ის ვიცოდი 10 თვეში მოვახერხებდი თუ არა გაფრენას, მაგრამ ყველაფერი რაღაცის ფასად მოდის და გადავწყვიტე, რომ ღირდა გარისკვა.
როგორ მოვხვდეთ თამ კოკში? ჰანოიში თითქმის ყველა სასტუმროს და ჰოსტელს აქვს ექსკურსია თამ კოკის მიმართულებით. ყველაზე მარტივია ამ მომსახურებით ისარგებლო. ჩაგკიდებენ ხელს, მიგიყვანენ ყველგან და წამოგიყვანენ. ოღონდ შენთან ერთად იქნება სულ ცოტა კიდევ 30 ადამიანი და ყველა ადგილას გექნება განსაზღვრული დრო, რაც იმაზე ბევრად ნაკლები იქნება, ვიდრე დაგჭირდება. ან ჩრანგის ბუნების ძეგლის დათვალიერებისას, რომელი მარშუტით დაგათვალიერებინებენ, ეგეც კი გადაწყვეტილია, რესტორანიც, სადაც სადილად მიგიყვანენ. ყველაფრის დათვალიერებასაც, რა თქმა უნდა, ვერ მოასწრებ. ჰანოიდან თამ კოკამდე დაახლოებით 2 სთ გზაა. დილაუთენია გადის ექსკურსიები და ჯერ ყველანი მიდიან ან ჩრანგში და მზის ჩასვლისთვის ჰოა ლუს ტაძარში და ხალხის ბრბო გარანტირებულია. ამიტომაც მე არ მიყვარს ექსკურსიები 😢. თან უფრო იაფიც ჯდება, თუ შენით წახვალ. ჰანოიდან გადის მატარებელი, რომელიც ნინ ბინში ჩერდება, ან ავტობუსი, ან "ლიმუზინი" რომელიც თამ კოკამდე მიგიყვანს. ადგილობრივები ლიმუზინს ეძახიან ტურისტულ მარშუტკას, სადაც სულ 10 მგზავრის ადგილია, კონდინციონერი და ტყავის სავარძლები. ფეშენებელური მარშუტკაა რა. ჩვენ ამ ლიმუზინით ვიმგზავრეთ, ფასი 1 ადამიანზე 10 დოლარი. თვითონ სოფელი თამ კოკიც ძალიან კოხტა, ლამაზია და ჩემი აზრით, აქ 2 თუ არა მინიმუმ 1 ღამით დარჩენა, ნამდვილად ღირს. ადგილობრივი ტრანსპორტი არ მუშაობს, ნავებით დადიან ან მოტოებით, ან ველოსიპედით. ყველა ღირშესანიშნაობის ნახვა შეიძლება მოტოთი, რომელსაც ნებისმიერ ჰოსტელში აქირავებენ. 1 დღე 200 000 (9$) დონგი ღირს და ვაჭრობაც მოსულა, ან მანქანის ქირაობა შეიძლება მძღოლით, რაც 800 000 (35$) დონგია. ფასი იცვლება, იმის მიხედვით, რამდენი ადგილის მონახულებასაც აპირებ. საჭმელი, ისე როგორც დანარჩენ ვიეტნამში, აქაც იაფია და ძალიან გემრიელი. 5 ვარსკვლავიანი სასტუმროები არაა, ალბათ არც 4 იანი. მე ავარჩიე ბუნგალო მდინარის პირას. ყველა ნავი, რომელიც სოფლის ცენტრში მიდიოდა, ჩვენი აივნის წინ ცურავდა. თან აქაურები ისეთი დახელოვნებულები არიან ნავის ტარებაში, რომ უკლებლივ ყველა, ფეხით უსვამს ნიჩაბს. ძალიან უჩვეულო სანახაობაა, მკერდზე ხელებგადაჯვარედინებულები, ნავის ბოლოში წამოსკუპულები, საზურგეზე გადაწოლილები, ფეხებით რომ ნიჩბებს უსვამენ. თითქოს ეს, მსოფლიოში ყველაზე მარტივი საქმე იყოს! ყოველ საღამოს ტროპიკული ხილით დავჯდებოდი აივანზე და მაგთ ვაკვირდებოდი. მწვანე წყალი, ნავით გაჩენილი ტალღები, წყლიდან წამოჭრილი კლდეები და ნავში გატრუნული, მონუსხული ტურისტის ფოტოაპარატის ჩხაკუნი, სხვა არსით ხმა, არსით ძახილი!
აქ მარტო თამ კოკის ირგვლივ გადაღებული კადრებია. მიუხედავად იმისა, რომ 2 ღამით ვიყავით, მაინც ვერ მოვასწარით დაგეგმილი ადგილების მონახულება, კიდევ ბევრი სილამაზე დაგვრჩა ❤️, მათ შორის ფილმი "kong skull island" დან სოფელი, სადაც ფილმში გამოყენებული ქოხები, ნავი და მოხატული ადგილობრივები დაგხვდება (რემონტის გამო)
