01/06/2026
Lile Shengelia. -ს "თეატრალური წერილი"
ბავშვთა დაცვის საერთაშორისო დღეს ბათუმის მარიონეტების თეატრში ახალი პრემიერა გაიმართა — „წითელქუდა“
ბათუმის მარიონეტების თეატრმა ბავშვთა დაცვის საერთაშორისო დღეს პატარა მაყურებელს ახალი მუსიკალური სპექტაკლი — „წითელქუდა“ (რეჟისორი გიორგი ჩხაიძე) წარუდგინა. ყველასათვის საყვარელი ზღაპარი არაერთხელ და მრავალგვარი ინტერპრეტაციით დადგმულა, თუმცა ამჯერად შემოქმედებითი გუნდი ნაცნობი ისტორიის განსხვავებულ ვერსიას გვთავაზობს — თხრობას, სადაც ძალადობას მეგობრობა ანაცვლებს, ხოლო კონფლიქტი ურთიერთგაგებით სრულდება.
სიუჟეტის მიხედვით, წერილის მეშვეობით წითელქუდას დედა იგებს, რომ ბებია ავად არის. წერილის გადამტანი ჩიტია, რომელიც ბებიასა და შვილს შორის ერთგვარ შუამავლად გვევლინება. დედა პატარა გოგონას ბებიის მოსანახულებლად გზავნის, თუმცა ტყეში მას ცბიერი მგელი ხვდება. იგი ცდილობს წითელქუდას გზა აუბნიოს და თავად მიაღწიოს ბებიის სახლამდე. მოვლენების განვითარებაში ერთვებიან ბებია და მონადირეც, თუმცა ზღაპარი კლასიკური ვერსიისგან განსხვავებული ფინალით სრულდება. მგელს არჩევანის გაკეთების შესაძლებლობა ეძლევა — ზოოპარკი თუ მეგობრობა. ის მეგობრობას ირჩევს და ისტორია ბედნიერად სრულდება.
პროექცია და მთხრობელის ხმა მაყურებელს ჯერ კიდევ დასაწყისში ამზადებს ზღაპრულ ატმოსფეროში შესასვლელად, რის შემდეგაც ყურადღება მთლიანად სცენურ სივრცეზე გადადის. მაყურებელი სრულად ერთვება მარიონეტული თეატრის მხატვრულ სამყაროში, სადაც ამბის განვითარებას სცენოგრაფიის, მარიონეტებისა და მუსიკის ერთობლიობა განაპირობებს.
გიორგი ჩხაიძის მიერ შექმნილი სცენოგრაფია ზღაპრული და ამავდროულად დამაჯერებელია. დეკორაცია დეტალებით მდიდარ გარემოს ქმნის, რომელიც მოქმედების ადგილებს მკაფიოდ გამოკვეთს და წარმოდგენის ვიზუალურ მთლიანობას აყალიბებს.
განსაკუთრებულ ყურადღებას იმსახურებს მირანდა გურგენაძის მიერ შექმნილი მარიონეტები. თოჯინები რეალისტურია. თითოეულ მათგანს ინდივიდუალური ხასიათი და მოძრაობის მანერა აქვს, რაც პერსონაჟებს ადვილად დასამახსოვრებელს ხდის. სწორედ თოჯინების მხატვრული გადაწყვეტა ქმნის დადგმის ერთ-ერთ მთავარ ღირსებას.
მარიონეტების თეატრის სპეციფიკიდან გამომდინარე, მნიშვნელოვან როლს ასრულებენ მსახიობები (მარიკა ბულეიშვილი, ირინე ღლონტი, ფრიდონ მოდებაძე, მერი დიასამიძე, ანა მალაზონია), რომელთა ზუსტი და კოორდინირებული მუშაობის შედეგად თოჯინები განსაკუთრებულ გამომსახველობას იძენენ. მათი ოსტატური მუშაობა წარმოდგენის რიტმსა და დინამიკას განსაზღვრავს და მთლიან მხატვრულ კონცეფციას ორგანულ მთლიანობად აქცევს.
მუსიკა ბუნებრივად მიჰყვება მოქმედებას და წარმოდგენის მსუბუქ, მხიარულ განწყობას აძლიერებს. საინტერესოა, რომ მუსიკალური გაფორმება ხელოვნური ინტელექტის მიერ არის შექმნილი, ხოლო სიმღერების ტექსტების ავტორი მარიკა ბულეიშვილია. თანამედროვე ტექნოლოგიისა და ტრადიციული მარიონეტული ხელოვნების ეს თანაარსებობა დადგმის კიდევ ერთ საინტერესო მახასიათებლად შეიძლება ჩაითვალოს.
35-წუთიანი წარმოდგენის ფარგლებში შემოქმედებითი გუნდი ახერხებს შექმნას დასრულებული და ჰარმონიული სცენური სამყარო, სადაც სცენოგრაფია, მარიონეტები, მუსიკა და მსახიობთა ოსტატობა ერთიან მხატვრულ მთლიანობად იკვრება. ბათუმის მარიონეტების თეატრის „წითელქუდა“ ცნობილი ზღაპრის თანამედროვე ინტერპრეტაციაა, რომელიც ტრადიციული სიუჟეტის შენარჩუნებასთან ერთად ახალ აქცენტებს სთავაზობს მაყურებელს და კიდევ ერთხელ წარმოაჩენს მარიონეტული თეატრის გამომსახველობით შესაძლებლობებს.
