Music Picks

21/05/2026

噚晚喺O2睇Raye，好好睇。佢嘅歌好一向都知，呢晚駕馭唔同歌風亦都到位，而且有二十位樂手伴奏，管樂同弦樂手玩足將近全場，樂手又有即興演奏，音樂感強。

兩個鐘頭演出，第一節好似新碟咁比較戲劇性，最紅嘅《Where is my husband!》都喺呢節唱咗，然後舞台變做jazz bar再唱咗幾首。中段係比較傷感嘅慢歌，最後就將O2變成舞池。雖然無將新碟由頭到尾唱一次，戲劇化到底，但成個歌單係正嘅，講分手、講戀愛，但同時保持正能量，場內氣氛充滿愛。

London土生土長嘅歌手，帶住新碟巡迴之後，返到嚟London壓軸演出，全晚有種光宗耀祖嘅感覺，戥佢開心。之後佢再開演唱會，都仲會想睇，但希望佢可以戲劇化到底咁玩一次，想知現場效果有幾勁。

— — — — — — — — — —
Facebook: https://www.facebook.com/MusicPicks/
IG: music__picks
threads: [email protected]

03/05/2026

朋友有免費飛去咗睇英皇嗰拼盤show，然後send咗一段古巨基live片過嚟俾我呢位骨灰級fans。

作為英皇show，我唔係好明點解會唱咁多唔係英皇嘅歌。成件事唔係應該要表現唱片公司成立廿幾年嘅豐功偉績？呢個演唱會真係好好笑，我而家連佢點解要搞都唔明。

至於古巨基，佢而家用聲嘅方法唔係我最鍾意嘅，但聽返《愛神》同《歡樂今宵》都係觸動到我。之但係，朋友話佢講自己聲帶發炎，要打類固醇，咁樣仲將《重覆犯錯》升一度係咩玩法？做乜搞到自己咁辛苦。

— — — — — — — — — —
Facebook: https://www.facebook.com/MusicPicks/
IG: music__picks
threads: [email protected]

20/04/2026

時間、人物和地點，願一起發現……

宏福苑居民首日回家　居民鍾先生：「屬於我嘅物品就燒剩隻CD」
不斷更新：https://bit.ly/4mIdWOb

住宏新閣 1 樓的鍾先生下午約 4 時離開。從他提供的相片可見，單位內大部分物品嚴重燒毀，只剩下焦黑殘骸，幾乎無物可取。

其中一張相片，見到瓦礫中一隻 CD 封面仍清晰可辨。鍾先生說，這是他唯一能帶走的物品，「屬於我嘅物品就燒剩隻 CD」，感慨「回憶、故事變成碎片」。

他指在單位已沒甚麼可做，「影幾張相，睇下有啲咩⋯⋯但都冇啲咩（可帶走）咪走囉。」母親則尋回一個首飾盒。他又提到，上樓期間見到鄰居時一度激動，慨嘆「大家都未死」。

#宏福苑 #上樓執拾 #宏新閣

12/04/2026

是日心情欠佳，好在一早買飛去Troxy睇show，睇完嗰人開心返。

toe，日本數學搖滾樂隊，當年嚟香港開show，明明想睇但唔記得點解錯過咗。隔咗幾年，又隔咗一個大海，佢哋因為二十五周年再返到倫敦演出，機緣巧合終於睇到。

成軍廿五年，即係年紀唔輕，但成場演出非常有火，首首歌都當finale咁玩到盡，比我想像中energetic，真係好睇，買坐位都已經不斷跟住un，若果買咗企位，睇完實攰到癲。

題外話，場內本地觀眾比例都好高，估唔到佢哋嘅fan base咁國際化，真係衝出亞洲。

— — — — — — — — — —
Facebook: https://www.facebook.com/MusicPicks/
IG: music__picks
threads: [email protected]

11/04/2026

「童話書從成長中難免要學會失望」

有些歌，歷久常新。有些人與事，有賞味期限。

一直相信每個人都有一個價。這個價可以是錢，亦可以是非物質。可以是讓你更有價值，也可以是要你付出代價。去到這些時刻，當事人自然要做抉擇，而這是張敬軒的抉擇。

今早起身，見到排山倒海的message。報道內容清楚，明白，交代得清晰，無需揣摸，我欣賞這份坦白。而作為歌迷，去到這些時刻，也是一種抉擇。

有人說，可能因為國安問題，可能因為唱片公司財政狀況，但當時人無講，又或者不能講這些原因，甚至未有明示暗示當中的關連，將這一切當成原因，也是一種揣測。

人在英國，由《春夏秋冬》開始買的唱片，留了在香港的紙箱。由九展幾百人展覽廳開始睇的現場演出，留在人生的回憶。這一切就讓它們成為歷史。

青春常駐是祝福，但舊人及舊情未必一定萬歲。

「人人將一生搬進博物館 / 完成不到的雕塑有幾款 / 明明可寫出佳作那筆管 / 進殿堂前 枝枝只寫到一半」

03/04/2026

誠信零分嘅學校同製作團隊

【《給十九歲》再上映
片中受訪女生阿聆回應：
事前未被諮詢、未知自己部分有否刪走】

意大利烏甸尼遠東電影節昨宣佈今屆片單，當中會在「特別放映」單元放映香港紀錄片《給十九歲的我》 ，該紀錄片 2023 年因其中一名參與拍攝的女生「阿聆」揭發電影未獲她同意就公映，當時公映 4 日後煞停。

對於《給十九歲的我》在海外重新放映，外界關注影片內容是否有作刪改，及事前是否已獲所有拍攝者同意。「阿聆」今向 Wave.表示，今日才收到學校告知電影會在該電影節放映，她曾詢問自己部分是否已刪去，但校方未有正面回答。

「阿聆」重申，事前沒有人就放映一事詢問其意願，而她的立場亦跟三年前一樣：「我不同意電影以任何形式進行公開放映。」

據遠東電影節的公布，《給十九歲的我》 的導演張婉婷、執行導演郭偉倫等六位團隊成員將赴當地出席電影節。《香港 01》就海外放映一事向張婉婷查詢時，她表示「都係發行人搞嘅，我都唔係好清楚」。

《給十九歲的我》由張婉婷執導，以十年時間記錄英華女學校六位女生的成長歷程，2023 年公映時因拍攝倫理爭議而撤映，其後奪得金像獎最佳電影。聯合導演郭偉倫當時在得獎感言中呼籲同業「拍咗先算，剪咗先算，上咗先算」。事後郭偉倫去信英華，承認當時言論「不適當」，並向金像獎大會、英華、《給》製作團隊及「所有受今次爭議影響的朋友道歉」。

就是次海外放映的版本跟公映時有何分別、及是否已獲片中所有受訪者同意，《Wave.》已向《給》團隊及英華女學校查詢，暫未獲回覆。

27/03/2026

如果你還在世上，今天四十歲生日快樂。

25/11/2016 盧凱彤 @ Clockenflap 《賣空氣的人》

23/03/2026

Lily Allen，由細個開始聽起，一直鍾意佢嘅八婆mode。幾年無出碟，舊年因為同David Harbour離婚，創作力大爆發，短時間內做咗《West End Girl》專輯，極度赤裸咁講老公出軌離婚，花生得嚟音樂亦佳，係個人覺得舊年最精采嘅專輯之一。

帶住新專輯，佢今個月開始跑巡迴，今個星期返到London West End演出，真正做West End Girl。音樂會將舞台變成睡房，成場淨係唱新專輯，十四首diss tracks由頭唱到尾，無多無少，連嘢都無講，完全憑歌寄意就完咗成場。係嘅，個show係短，亦無以前聽開嘅hit歌 （暖場嘅大提琴三人組彈咗俾觀眾大合唱舊歌），但場內氣氛勁好，亦有人大聲幫佢鬧埋佢前夫。成場show，直接而唔簡單，短小但出色，睇完個人都覺得爽。

— — — — — — — — — —
Facebook: https://www.facebook.com/MusicPicks/
IG: music__picks
threads: [email protected]

15/03/2026

仲有大約兩個鐘，今年Oscars就開始，睇晒今年十套提名嘅最佳電影，二十個提名演員嘅戲，同埋五套提名嘅最佳外語片。十套最佳電影，我會順序咁排喜愛度。

《One Battle After Another》
《Sinners》
《Sentimental Value》
《Bugonia》
《Marty Supreme》
《Hamnet》
《The Secret Agent》
《Frankenstein》
《Train Dreams》
《F1》

今晚睇落都係《Sinners》會贏。
但《One Battle After Another》有幾場真係拍得好好，開場打劫，中間走佬同最尾嘅公路追逐都好勁。
《Sinners》都係好睇嘅，用驚悚片包裝文化盜用，藍調音樂都真係好正，中後段嘅打鬥都有娛樂性。
《Sentimental Value》，我覺得好睇過導演上一套《The Worst Person in the World》好多，今次嘅痛係合理。
《Bugonia》，我亦都覺得好睇過Yorgos Lanthimos x Emma Stone攞更多獎嘅《Poor Things》，今次我睇得投入啲。
《Marty Supreme》係瘋狂，而家其實分唔到Timothée Chalamet嘅ego係因為拍咗呢套戲，定套戲令佢再自我澎脹。
《Hamnet》係完整嘅一套戲，Jessie Buckley超壓場，但套戲亦同時好似成日提住我套戲係好慘。
《The Secret Agent》，我都係鍾意去年獲提名嘅《I’m Still Here》多啲，雖然佢中後段都刺激。
《Frankenstein》嘅美術做得好，但就算經過改編，個故仔大約都係咁。
《Train Dreams》嘅愛比較老派，而且太多第三身旁述，有啲出戲。
《F1》拍賽車係唔錯，但我唔知點解入圍。

而家一年入戲院睇嘅戲大約五十套，如果計晒所有入場睇咗嘅2025年電影，最鍾意係呢十套，排名絕對分先後。
《One Battle After Another》
《Sinners》
《It Was Just an Accident》
《Kokuho 国寶》
《Sentimental Value》
《Bugonia》
《I Swear》
《Marty Supreme》
《Sirāt》
《Weapons》

《It Was Just an Accident》，講伊朗嘅戲，呢幾年係每年都有一齣勁嘅，個結尾睇到心寒。
《国寶》係英國睇咗一次，返香港再睇一次。真係拍得好靚，日本美的極致，而個結尾我係感動。
《I Swear》，BAFTA害咗套戲，但套戲本身拍得好，講得到妥瑞氏症嘅苦處，但又唔過份勵志又唔過份慘。
《Sirāt》，初段唔係好知套戲做乜，同埋好嘈，但中段開始音效做得好好，同埋結局勁癲。
《Weapons》，我係完全唔鍾意睇驚悚片，但呢套嘅劇本寫得好，Aunt Gladys非常出色。

— — — — — — — — — —
Facebook: https://www.facebook.com/MusicPicks/
IG: music__picks
threads: [email protected]

10/03/2026

「每次到了你要走的時分 / 我的心都會痛一陣」

朋友間近來唯一討論嘅香港電視節目係《戀愛等高線》。比起好多人都遲開始睇，追返之後製作組咁啱剪埋bts，夾到無咁準。

身邊嘅朋友唔係對呢個節目一致好評。有人話好睇，但亦有人睇到後半棄追，因為覺得戀綜味道弱，同埋有啲參加者呃旅行。兩邊意見我都理解，而我係覺得好睇嘅一方。

對我嚟講，節目前段係比較吸引。Marco嘅出場同Anthony嘅dead air，我都有大笑。孝良同Maya嘅相處到告白，係全個節目最好睇。去到後半，戀情太直線，啲關係有啲煩，啲仔又油膩。若果作為一套普通戀綜，戀情線係唔夠精采，同埋沉船嘅位有啲令人費解，所以我明點解朋友棄追。

但係，呢套並唔係普通戀綜，而係喺Mike導以往有啲冒險精神基礎上再加戀綜元素嘅節目。我記得自己以前去到五千米嘅西藏珠峰大本營已經頭痛到有限度運作，我欣賞佢哋去行山，仲嘗試談情。亦因為知道辛苦，所以我明明覺得Tracy同Marco煩咗幾集，但到告白嘅時候都有一種修成正果嘅觸動。

因為有行山，所以無咁刻意鋪排，raw啲嘅戀情線對我嚟講都係work。我亦都鍾意製作組拋開近年必備嘅棚內評價，由佢哋自己做毒舌評述，而且講明俾你聽佢哋幾時有set up，想有推進，配合埋冒住高山症拍嘅靚景同剪接係好睇嘅。

節目嘅旁述係Selene (Nicole)都係加分，佢把聲同節目本身就有反差，而我亦一直期待製作組點用my little airport嘅歌。喺第13集，Wade同Kitty攤牌之後，插播《每次你走的時分》嘅嗰種emo，剪得非常好，係成個節目最突顯人物性格嘅其中一幕。

睇完節目，呢幾日有聽返mla嘅歌。唔知幾時先再有機會睇到佢哋嘅音樂會。

— — — — — — — — — —
Facebook: https://www.facebook.com/MusicPicks/
IG: music__picks
threads: [email protected]

09/03/2026

今日倫敦有唔少演出，香港代表有moon tang，西洋音樂有Laufey，仲有啱啱睇完嘅sombr。

sombr，走復古pop路線嘅20歲新晉歌手。會睇係因為啲歌超級易記，覺得入場睇會幾fun。事實上，場內氣氛真係好嘅。入場觀眾男女比例接近1:9，有啲後生到由阿爸阿媽帶住入場，完場時門口又有好多父母接放學。妹豬主導嘅場，氣氛通常唔會差，大合唱、尖叫，應有盡有。

演出場地係O2 Brixton，音響本身已經唔算好，加埋復古effect就更加麻麻，但成個演出都有誠意嘅。舞台似係舊式歌廳，同歌曲嘅風格幾夾。歌手本人嘅台風符合年齢同歌詞，有啲中二病，但亦因為咁而幾投入。倫敦場限定，仲有特別嘉賓Niall Horan。

£40門票，睇完覺得後生咗，都係值嘅。

— — — — — — — — — —
Facebook: https://www.facebook.com/MusicPicks/
IG: music__picks
threads: [email protected]