14/08/2025
Bishooftuurraa Hanga Faransaayi
Nama mul'atasaaf ifaajee, karra milkaa'inaarra imalaa jiru; ogeessa ogummaa jaallatee, ogummaaf jiraate Fiqaaduu Daadhii(Rabbirraa)
Dungoorraa hanga Soolanee, Nama of dhoksee hojiisaatiin laboobee mul'achaa jiru, jabaafi qaroo jaarraa kanaati.
Bishooftuu keessatti, yeroo ulfaattuu keessa yaada soneessee, qaruuxeewwan danuu qajeelchee, xurree saaqee, har'a magaalittiin dambalii Aartiitiin wajagdee, Ayyaana Aartiitiin ulamtee urgaa'aa jirti.
Hojiiwwan inni qajeelche keessaa tokko Fiilmii Soolanee ture. Fiilmiin waggaa tokko dura biyya keessatti haala ho'aadhaan eebbifame kun; baatii 2 dura Charlottee International Black Film Festival irratti, Fiilmii filatamaa ta'ee badhaafamee ajab jechisiisee ture.
Kunoo kaleessammoo Biyya Faransaayi, Cannes Rivera tti, Waltajjii badhaasaa " Africa USA International Film Festival" irratti Fiilmiidhuma Soolaneedhaan, Daayireektara filatamaa(Best Director 2025) jedhamee ragga'eeraaf. Ragaan ba'ameeraaf.
Kun Aartii Oromoodhaaf injifannoofi galtee guddaadha.
Jabaa kana jabeeffatanii, hojiiwwan itti aananiif si'eessuun dirqama dhaloota keenyaati mitiiree?
Fekadu Dadi milkiin kun dachaa siif haa marmaartu! Sichittis milkiirratti milkiin fulla'i!
