19/10/2026
Una amuesa dalgunes de les obres que sonaron esti fin de selmana nos conciertos de MEDIEVALIA, nos que pudimos escuchar algunos instrumentos medievales de los recreaos nel proyectu CANTEROS DEL SONIDO, xunto cola Orquesta de Cámara Solidaria (OCAS) y Héctor Braga, na ilesia de San Esteban d'Aramil y nel Teatru Riera de Villaviciosa.
Un fragmentu de la "Marcha d'Antón el Neñu", cola orquestación de Javier Blanco; unes vaqueiraes interpretaes maxistralmente por Héctor Braga, La "Folganza de Buetes", una composición de mio autoría, orquestada por Javier Blanco interpretada cola gaita de La Oliva y la preciosa composición "Exconxurados", creada y orquestada por Héctor Braga interpretada cola Rota d'Arlós, son dalgunes de les obres que formen parte d'esti conciertu de cuasi dos hores de duración.
El próximu 31 d'ochobre vamos celebrar el últimu conciertu del ciclu nel Auditoriu de Grau, un llugar col que tengo una vinculación familiar mui especial. En Seaza, na parroquia de Villandás, crióse mio madre, y ellí, na tierra que la vio medrar, descansa güei.
Va ser un conciertu especialmente emotivu pa min, una manera bien guapa de poner el puntu final a esti proyectu musical nuna tierra a la que me xunen tantos recuerdos y sentimientos.
Gracies fonderes a Amantigua por faceme partícipe del proyectu de recreación d'instrumentos medievales Canteros del Sonido, y a la OCAS por dame tamién la oportunidá de participar nesti ciclu de conciertos, MEDIEVALIA.
Vémonos en Grau el 31 d'ochobre.
