17/04/2024
Presentación do libro "Secretos de un probador", do deseñador de alta costura Manu Sánchez, na que colabora o Ateneo de Pontevedra:
Interveñen: Antón Sobral (artista, directivo do Ateneo de Pontevedra), Ángel Carragal (xornalista), Pilar Valverde (xornalista) e Manu Sánchez
Día: xoves, 18 de abril de 2024
Hora: 19:00
Lugar: sala de exposicións do Granero Delmas
Da obra
O percorrido de Manu Sánchez pola alta costura estivo marcado polo talento, o esforzo e a constancia; pero tamén polas grandes persoas das que se rodeou e que impulsaron o seu crecemento profesional: a súa tía Lala, a súa nai, compañeiros de profesión e amigas como Carmen Sevilla ou Charo Reina, entre outras que son mencionadas nesta obra.
Tras celebrar a súa exitosa traxectoria conmemorando o seu 25 aniversario dedicado á alta costura, sorpréndenos coa publicación de Secretos de un probador, que aborda as súas máis de dúas décadas de profesión, de paixón, de vida. Sen ser unha biografía, comparte nesta obra anécdotas e experiencias que viviu durante todos estes anos, desde os seus comezos na súa terra natal ata a súa chegada a Madrid, incluíndo numerosas vivencias con clientas famosas e anónimas ás que vestiu.
Ilustrado con moitas fotografías inéditas seleccionadas para esta ocasión, convídanos a coñecelo un pouco máis, a achegarnos á súa carreira profesional e a súa vida. Acompañan ademais ao libro un epílogo escrito pola súa querida amiga Nieves Herrero e unha poesía escrita sobre el por Charo Reina.
"Este é un libro onde se rende culto ao esforzo, ao soño por alcanzar, ao éxito conseguido… Queda moi claro ao longo destas páxinas que nada lle foi fácil a Manu Sánchez […] foi pronto un nome imprescindible nas televisións e un home importante para artistas moi coñecidas". Nieves Herrero.
Do autor
Manu Sánchez, nacido en Puente Genil (Córdoba) en 1979, é modista de profesión, estando dedicado á alta costura. Tras instalarse en Madrid, comeza a traballar para importantes desfiles e eventos de moda. Grazas a esta profesión ten a oportunidade de relacionarse con recoñecidos personaxes do corazón, a canción, o flamenco e o cinema español, como a popular e carismática Carmen Sevilla. Baixo a súa firma, Manu Sánchez Alta Costura, inaugurou tendas e atelieres en Puente Genil (2012 e 2014), Valladolid (2015) e Valencia (2021). É ademais un gran promotor de eventos sociais, como a gala benéfica anual da AECC. En 2015 recibiu a Medalla de Ouro dos Reis Católicos pola súa traxectoria profesional, así como en 2018 foi obxecto dun recoñecemento honorífico por parte da Pasarela Española Fashion Week Madrid. Celebrou o seu 20 e 25 aniversario dedicado á alta costura arroupado por moitos rostros coñecidos, vendo agora cumprido un novo soño coa publicación de Secretos de un probador (Aliar Ediciones, 2023).
