07/01/2026
✨ Chegou o momento de apagar as luces. Nuns minutos, o brillo que envolveu as nosas rúas durante estas semanas recollerase amodo. Gardaremos ben as chaves das nosas casiñas, protexéndoas con agarimo durante todo o ano, como quen garda un tesouro que só se pode abrir no tempo dos soños.
É certo que, a partir de mañá, notaremos as rúas de Lalín un chisco máis valeiras. Sentiremos ese silencio melancólico que deixa a festa que remata... pero non esquezades que aquí a alegría nunca dorme moito tempo.
Xa se escoita ao lonxe, xa vén de vagariño a nosa Feira do Cocido, para volver a encher de vida e de xente cada recuncho da nosa vila.
Pero hoxe queremos dicirvos algo importante: a maxia das Aldeas de Nadal non se apaga nunca. As luces exteriores poden apagarse, pero a verdadeira luz é esa ilusión que nos ilumina por dentro, a que brilla nos ollos dos máis cativos e na memoria dos maiores. Mentres esa chama estea prendida en cada un de vós, o Nadal seguirá vivo en Lalín.
Non vaiades pensar que este é un descanso total. Mentres nós volvemos á rutina, os trasnos de Lalín de seguida volverán a poñerse mans á obra, nos seus obradoiros, anotando novas ideas, argallando sorpresas e traballando con máis forza que nunca para que a próxima edición sexa, se cabe, aínda máis máxica.
Vémonos de novo no vindeiro Nadal. Ata que ese día chegue, o noso único desexo é que sexades moi felices durante todo o ano. Levade con vós o sorriso destas festas en cada paso que deades.
Grazas por facer que Lalín brille con luz propia.
Vivan as Aldeas de Nadal!
