30/07/2026
A Artábria apresenta Galego Para Nós! Novo Manual de Língua Galega
A Associaçom Cultural Artábria organiza a apresentaçom do livro Galego Para Nós! Novo Manual de Língua Galega, da autoria de Maurício Castro Lopes, umha obra concebida como ferramenta de autoformaçom lingüística e de achegamento prático ao galego reintegrado.
Ferrol, 30 de julho de 2026.- O ato terá lugar na sexta-feira, 31 de julho, às 20.30h, no Centro Cívico de Canido (Ferrol), e contará com a participaçom do autor, acompanhado por Antón Cortizas, Pim Patinho e Henrique Dacosta.
A obra está co-editada por Companha Editora e a Associaçom de Estudos Galegos (AEG) e retoma o espírito do Manual de iniciaçom à língua galega que Maurício Castro publicou em 1998 sob o selo da Fundaçom Artábria: um livro pensado para pessoas com consciência favorável à língua galega que desejam aprender, estudar e usar o galego sem necessidade de se converterem em especialistas.
Galego Para Nós! nasce da mesma motivaçom e apresenta-se como umha proposta de aprendizagem autónoma num contexto em que a língua própria do país continua a viver umha situaçom precária por falta de políticas institucionais ao serviço da sua comunidade de falantes.
Com mais de 500 páginas totalmente em cores, o manual combina explicaçons gramaticais, vocabulário, expressons idiomáticas e conteúdos históricos e culturais. A obra inclui, além disso, dúzias de ilustraçons e infográficos que facilitam o estudo e a consulta.
Um dos seus aspetos mais inovadores é a incorporaçom de áudios acessíveis através de códigos QR, permitindo trabalhar de maneira prática características fundamentais do galego oral, como a entoaçom, as curvas melódicas e as vogais médias tónicas abertas e fechadas. Os áudios permitem escuitar e imitar a pronúncia e a prosódia galegas diretamente desde o telemóvel.
O livro está pensado para qualquer pessoa que queira falar e escrever galego reintegrado seguindo as normas do nosso padrom nacional, oferecendo umha ferramenta útil tanto para quem começa como para quem deseja aprofundar nos seus conhecimentos.
Esta apresentaçom conta com a colaboraçom da AC Muiño do Vento e da Asociación Veciñal de Canido.
A Associaçom Cultural Artábria convida todas as pessoas interessadas na nossa língua a participar neste encontro, que pretende ser também um espaço de reflexom coletiva sobre o presente e o futuro do galego.
