17/06/2026
Artábria acolhe umha fim de semana de cultura crítica e debate político
As jornadas incluirám a leitura dramatizada de Diario de Incomunicaçom e a apresentaçom do livro Imperialismo: unha aproximación crítica, os dias 19 e 20 de junho.
Ferrol, 18 de junho de 2026.- O Centro Social Artábria (Travessa de Batalhons, nº 7, Ferrol) acolherá os próximos dias 19 e 20 de junho duas atividades abertas ao público que combinam criaçom cultural, denúncia social e reflexom política.
A primeira cita será na sexta-feira, 19 de junho, às 21h00, com a leitura dramatizada de Diario de Incomunicaçom, de José Alfredo Miranda Oblanca. A peça recolhe os acontecimentos decorridos entre janeiro e abril de 2025, quando o Serviço de Saúde Mental de León incomunicou José Alfredo Miranda Oblanca poucos dias depois de este se declarar em greve de fome, sede e palavras no psiquiátrico de Santa Isabel.
O texto recompila as chamadas que trataram de romper essa incomunicaçom, incorpora alguns dos outros acontecimentos produzidos ao longo dos quatro meses que durou a situaçom e oferece um testemunho de como se constroem os muros do isolamento e da exclusom institucional.
A entrada será livre até completar aforo. Prega-se assistência com a suficiente antecedência para facilitar o início da atividade à hora prevista.
Já no sábado, 20 de junho, às 19h00, terá lugar a apresentaçom do livro Imperialismo: unha aproximación crítica, da autoria de Daniel Sussman Vilaverde e editado por Tempo Galiza em colaboraçom com República.ga. O autor estará acompanhado por Maurício Castro.
A compreensom científica dos fundamentos do imperialismo apresenta-se como umha necessidade para a açom revolucionária. Num contexto marcado pola crise capitalista e pola escalada bélica promovida polo bloco imperialista liderado polos Estados Unidos contra os povos do mundo, a questom do imperialismo recupera plena atualidade. Porém, esta obra vai alén das suas manifestaçons mais visíveis para afondar nas suas raízes, sistematizando a experiência histórica como base para compreender as tarefas políticas do presente e as vias para a derrota do imperialismo e a sua superaçom revolucionária.
O autor
Daniel Sussman Vilaverde (Oklahoma, 1995) é trabalhador farmacêutico e militante anti-imperialista, comunista e independentista galego. Desenvolveu a sua militância em diferentes organizaçons e espaços do movimento soberanista galego, como Isca!, Movimento Galego ao Socialismo e posteriormente Movimento Arredista, Mar de Lumes, Galiza Nova ou BNG. Os seus contributos políticos, entre os que destaca o trabalho na luta ideológica arredor da questom do imperialismo, devem enquadrar-se principalmente no contexto destes espaços militantes.
Informaçom prática
Sexta-feira, 19 de junho | 21h00
Leitura dramatizada de Diario de Incomunicaçom.
Sábado, 20 de junho | 19h00
Apresentaçom de Imperialismo: unha aproximación crítica.
Com Daniel Sussman Vilaverde e Maurício Castro.
Entrada livre até completar aforo.
Lugar: Centro Social Artábria (Travessa de Batalhons, nº 7, Ferrol).
