Loraldia

22/07/2026

🌍 Loraldia Galesera doa!

Uda honetan, Loraldia National Eisteddfod jaialdian izango da, Wales Arts International erakundeak egindako gonbidapenari esker. Hizkuntza gutxituen inguruko nazioarteko topaketa honetan, munduko beste jaialdi, sortzaile eta kultur eragileekin batera izango gara.

Gure helburua argia da: euskaraz sortzen den kulturaren esperientzia partekatzea, beste hizkuntza gutxituen errealitateak ezagutzea eta etorkizuneko lankidetza berriak aztertzea.

Euskarazko kultura mundura zabaltzeko urrats berri bat. ✨

20/07/2026

🎭 IKIMILIKILIKLIK Vol.2 Usurbilen loratu zen

Larunbatekoa berezia izan zen. Oso berezia.

Usurbilgo Dema Plaza bete zen, herria erabat inplikatu zen eta IKIMILIKILIKLIK Vol.2k bere leku naturala aurkitu zuen: Usurbil. Izan ere, ikuskizun honek Usurbilen egon behar zuen, bai ala bai. Hemen daude Ez Dok Amairuren arrastoak, Artze anaien, Mikel Laboaren eta Jose Luis Zumetaren oihartzunak; hemen arnasten da jatorrizko sormen haren memoria.

Eta memoria hori ez zen atzo iraganeko kontu bat izan. Bizirik zegoen. Plazan. Jendearen begiradetan. Isiluneetan. Txalapartan. Ahots bakoitzean.

IKIMILIKILIKLIK Vol.2 Loraldiaren ekoizpen propioa da, duela 50 urteko abangoardiaren eta gaurko euskal sorkuntzaren arteko elkarrizketa. Eta Usurbilen eskainita, elkarrizketa horrek esanahi berezia hartu zuen.

Une hunkigarri asko izan ziren. Baina bukaerakoa, bereziki, gogoangarria: modu erabat natural eta inprobisatuan, publikoa “Txoria txori” kantatzen hasi zen artistekin batera. Plaza oso bat kantuan. Barrutik ateratako keinu kolektibo bat. Horrelako uneek erakusten dute kulturak zer indar duen komunitatea, memoria eta emozioa elkartzeko.

Eskerrik asko bihotzez NOAUA! Kultur Elkarteari eta Usurbilgo Udalari, produkzio hau herrira ekartzeko ekimena izateagatik eta Loraldiaren lan honi hain testuinguru ederra emateagatik.

Duela 50 urteko ausardia, gaurko plazan.
Usurbilen, bere tokian. 🌱













NOAUA LoraldiaProdukzioak

10/07/2026

Udako Gazte Sormen Egonaldia 2026 | Lekeitio

Lekeition bizi izan dugun Udako Gazte Sormen Egonaldiaren laburpen-bideoa duzue hau.

Aste batez, sei proiektu eta hamahiru gazte elkartu dira euskaraz sortzeko, probatzeko, partekatzeko eta euren sormen-proiektuei forma ematen jarraitzeko. Tutoreen laguntzarekin, ideiak garatu, zalantzak partekatu, bide berriak ireki eta norberaren ahots sortzailea lantzeko aukera izan dute.

Bideo honetan, parte-hartzaileek euren proiektuak aurkezten dituzte eta egonaldian bizitako esperientziaren balantzea egiten dute. Tutoreek ere beren inpresioak partekatu dituzte, gazte sortzaileen lan-prozesua eta egonaldiaren balioa gertutik ezagutzeko.

Hauek izan dira 2026ko egonaldiko proiektuak:

Fauna
Iñigo Satrustegi (Iruñea, 1997)
Literatura / Tutorea: Iratxe Retolaza

Beti neure burua zuritzen
Kattalin Noizbehinka (Durango, 1996), Paula Brezo (Algorta, 1989)
Teatroa - Dramaturgia - Performance / Tutorea: Laura Penagos

Magala
Amets Ibarra (Erandio, 1999), Idoia Tapia (Iruña, 1998), Ines Aresti (Leioa, 2002), Nahia Sillero (Donosti, 2000), Nerea Lizarralde (Bilbo, 2002)
Teatroa - Dramaturgia / Tutorea: Borja Ruiz

(T)artean
Leire Ondarroa (Algorta, 1998)
Dantza / Tutorea: Izar Aizpuru

Lekua lekuko
Alaitz Urrutia (Erandio, 2000)
Literatura / Tutorea: Nerea Ibarzabal

Nik bakarrik, berriz
Ziggy Docherty (Tolosa, 1996), Aitzol Villahoz (Barakaldo, 1999), Ismael Munuera (Barakaldo, 1995)
Teatroa - Dramaturgia - Ikus-entzunezkoa / Tutorea: Jokin Oregi

Loraldia Gaztearen bidez, Loraldiak sortzaile gazteei denbora, espazioa, laguntza eta bultzada eskaintzen dizkie, euskarazko kultur sormen garaikideak etorkizuneko bideak zabaltzen jarrai dezan.

Sormena, esperimentazioa, elkarlana eta euskara.
Hori guztia izan da aurtengo egonaldia.

09/07/2026

SORMENALDIA 2026. LEKEITIO ETA MARKINA-XEMEIN
Ekainak 24-26 / Uztailak 1-3

Aurten Sormenaldiak urrats berri bat eman du: Lekeition laugarren edizioa egin dugu, eta Markina-Xemeinen lehenengoa. Bi herri, sei egun, zazpi kultur hitzordu eta xede argi bat: euskarazko kultura garaikidea Lea-Artibain plazaratzea.

Lekeitio eta Markina-Xemein. Itsasoa eta lurra. Bi herri sortzaile, bi ekosistema bizi, eta euskarazko kulturarentzat etorkizuneko aukera eder bat.

Edizio honetan Iparraldeko sorkuntzari leku berezia eman nahi izan diogu. Anton Abadiaren pizkunde-arnasetik Mixel Etxekoparren sormen mugagaberaino; Zuberoako dantzetatik Maddi Oihenarten ahots garden eta sakonera. Ekialdearekin zubi bat altxatu dugu, eta zubi horretatik etorri dira kantua, dantza, memoria, esperimentazioa eta emozioa.

Baina Sormenaldia ez da soilik programazio bat izan. Babesleku bat izan da. Elkargune bat. Euskal kultura garaikidea bizitzeko, pentsatzeko, sentitzeko eta partekatzeko espazio bat.

Musika, literatura, bertsolaritza, zinema, performancea, dantza eta teatroa gurutzatu dira egunotan. Sortzaileak erdigunean jarrita, eta publikoa bidaide hartuta.

Hau ez da helmuga bat. Bide baten urratsa da. Lea-Artibain euskal kultura garaikidearen sorgune sendo bat eraikitzen jarraitzeko abiapuntu bat. Kimuak loratzeko, denbora, zaintza eta sormen-ekosistema egokia behar dira. Eta Sormenaldiak, aurten ere, erakutsi du badagoela lur emankorra.

Eskerrik asko bide hau posible egin duzuen guztioi: Bizkaiko Foru Aldundia, Lekeitioko Udala, Markina-Xemeingo Udala, Uhagon Kulturgunea, Laboral Kutxa, NAIZ irratia, Danobat.

https://youtu.be/tnhiB76VWVI



.eus

SORMENALDIA 2026. LEKEITIO ETA MARKINA-XEMEINEkainak 24-26 / Uztai...

02/07/2026

Zuberoako dantzek hartu zuten Uhagon Kulturgunea! 🪈

Mixel Etxekoparrek txundituta utzi zituen Zuberoako dantza tailerrean parte hartu dutenak, eta, azalpenetik urratsera, doinutik jauzira, denak dantzan jarri zituen giro zoragarrian. ✨

Tailerra Uhagon Kulturguneko lorategian amaitu genuen, elkarrekin dantzan, transmisioa eta gozamena eskutik helduta. Gure kultur ondarea gorputzetik bizitzeko eta partekatzeko modu ederra izan zen. 🌿

Eta hasiera baino ez zen izan: atzoko dantzek aho zapore ederra utzi ziguten gaur Markina-Xemeinen biziko dugunerako. Sormenaldiak aurrera jarraitzen du, Xiberoa Kantuz Loraturik. Txoriekin hizketan film laburrarekin eta Mixel Etxekoparren performance musikatuarekin. 🌊

Eskerrik asko, Mixel, eta dantzara batu zareten guztioi!



.eus

KulturaEuskaraz EuskalKultura AgendaKulturala Euskadi Bizkaia Sormena EuskalKulturaGaur LoraldiaPlaza ZuberoakoDantzaTailerra

30/06/2026

🎭 IKIMILIKILIKLIK Vol.2 Usurbilera dator!

Gaur goizean aurkeztu dugu prentsaurrekoan uztailaren 18an Usurbilgo Dema Plazan biziko dugun hitzordu berezia.

Duela 50 urte Mikel Laboak, Artze anaiek eta Jose Luis Zumetak euskal kulturaren mugak zabaldu zituzten Ikimilikiliklik sentikariarekin. Orain, Loraldiak ekoitzitako IKIMILIKILIKLIK Vol.2 ikuskizunak ausardia hura gaurko sormenarekin elkarrizketan jarriko du.

Eta ez da edozein tokitan izango: Ez Dok Amairuren eta jatorrizko sortzaileen arrastoa bizirik dagoen Usurbilen. Gainera, antzokietarako sortutako lana aire zabalera eramango dugu, Dema Plaza sormen garaikidearen agertoki bihurtuz. ✨

Emanaldia 650 Usurbil Bizi – Ez Dok Amairuren Usurbil egitasmoaren eta NOAUA! Kultur Elkartearen 30. urteurrenaren ospakizunen baitan egingo da.

📅 Uztailak 18, larunbata
🕥 22:30
📍 Dema Plaza, Usurbil
🎟️ Sarrera doan

Eskerrik asko Usurbilgo Udalari, 650 Usurbil Bizi egitasmoari eta NOAUA! Kultur Elkarteari Loraldiaren ekoizpen propio honen alde egindako apustuagatik.

Duela 50 urteko abangoardia, gaurko plazan. 🌱

28/06/2026

ANTON ABADIA. DUBLINETIK HENDAIARA | Sormenaldia 2026
✨ Emozioa, txalo zaparrada eta arrakasta handia Lekeition.

Anton Abadia. Dublinetik Hendaiara emanaldiak publikoaren bihotzak bete zituen, lau artisten lanaren aurrean erabat hunkituta: Anje Oregi, Mixel Ducau, Xabi Zeberio eta Alaia Philips Ducau.

Anje Oregik emozioz eta indarrez ekarri zuen Anton Abadia oholtzara, pertsonaia aparta eta bizitza ia sinestezina gorputz eta ahots bihurtuz. Harekin batera, musikak, kantuek eta interpretazioak bidaia ederra osatu zuten, publikoaren txalo beroen artean. 👏

Aretoan izan zen, gainera, Patxo Telleria eszena-zuzendaria. Eta beste bisita berezi bat ere izan genuen: Txomin Heguy, produkzio honetan Anton Abadiaren papera lehenago interpretatu zuen aktorea, ikusleen artean izan zen. Iragana eta oraina elkartu ziren, beraz, gau berezi batean. 🌱

Eskerrik asko lau artistei eta Ikusgarri Aretoa bete eta emozioa gurekin partekatu zenuten guztioi.

🌊 Sormenaldiak ez du etenik: uztailaren 1etik aurrera Markina-Xemeinen jarraituko dugu. Hurbildu eta gozatu euskarazko sormen garaikideaz!


.eus