01/01/2024
Tal día coma hoxe, hai 11 anos, o Seminario de Estudos da Costa da Morte (SEMESCOM) estreaba este panel descritivo da ruta e os principais Penedos no lugar de Pasarela-Vimianzo.
Era un momento no que celebrabamos que poucos anos antes se salvaran dun intento de destruílos mediante a explotación dunha canteira, que se impedira grazas ao esforzo da veciñanza, de personalidades do mundo da ciencia e a cultura e de entidades sen ánimo de lucro como a nosa.
Celebrabamos tamén que, despois de moita loita e moita argumentación, por fin o conxunto dos Penedos de Pasarela e Traba fora declarado Paixaxe protexida por parte da Xunta, aínda que, catorce anos despois, seguimos agardando polas actuacións ás que teoricamente se comprometía no propio texto da declaración
E celebrabamos tamén, por último, que o Concello de Vimianzo, con Manuel Antelo Pazos recentemente chegado á alcaldía, emprendía os primeiros traballos de posta en valor dos Penedos.
Pola nosa parte, desde o Semescom continuabamos contribuíndo no posible, mediante, por exemplo, a edición da Guía dos Penedos de Pasarela, en formato libro, ou o documental Penedos de Pasarela, a arte dos dedos do tempo, en DVD (ambas publicacións dispoñibles en www.semescom.gal) e neste 30 de decembro de 2002 inauguramos este gran panel no inicio dunha ruta que empezaba a tomar forma
Hoxe xa non se pode ver, pois hai algún tempo alguén se encargou de retiralo do seu emprazamento e facelo desaparecer misteriosamente.
Desde que se puxo de moda subir ao carro da defensa do patrimonio, parece que todo o feito anteriormente estorba, agás para aproveitar investigacións, textos e imaxes das persoas que de verdade achegaron o seu traballo desinteresado durante anos. Xente como Xosé María Lema Suárez , Moncho Gándara Martínez, Marta Rey, Manuel Antelo ou o finado Roberto Mouzo.
O noso agradecemento a eles e a moitos outros que non citamos pero que aí estiveron sempre.
