28/04/2025
هي إيه قصة الطفل ياسين اللي تعرض للاغتصـ* ـاب لمدة سنة كاملة على إيد موظف في المدرسة عنده 79 سنة؟
الجريمة اللي تعرض لها ياسين أحقر من إنها توصف.
طفل يتعرض لاغتصـ* ـاب بشكل كامل ودوري على مدار سنة من راجل مواليد 1946، حضرتك متخيل حجم القرف والكارثة اللي أطفالنا بقوا معرضين لها؟
الحكاية صعبة وتفاصيلها أصعب، ولأن أي قضية لما بتتحول لقضية رأي عام بيتاخد فيها حكم سريع، ولأني عودت نفسي مسكتش عن أي غلط، قررت إني اتكلم أنا كمان.
القضية بقت معروفة وناس كتير اتكلموا عنها، بس يمكن لسه فيه ناس متعرفش، ولأننا محتاجين نضغط أكتر لازم كلنا نتكاتف، واعتبره ابنك.
الحكاية باختصار بتحصل من سنة في مدرسة الكرمة لغات بمدينة دمنهور Al Karma Language School، طفل اسمه ياسين عنده 6 سنين، فيه موظف في المدرسة اسمه صبري كامل جاب الله، عنده تقريبًا 79 سنة مش متأكد بالظبط وظيفته، بيستدرج الطفل مرة لعربية مهجورة ومرة لحمام المدرسة وبيغتـ* ـصبه بشكل كامل لمدة سنة.
بعد كدا الموضوع بيحصل بشكل متكرر ودوري، خليني أقول لك الكارثة الأكبر وهي مديرة المدرسة اللي اسمها وفاء إدوارد.
السيدة وفاء اللي المفروض مديرة مدرسة ومربية أجيال وتاخد بالها من الأطفال اللي عندها لأن المدرسة دي البيت التاني بتاع الطفل، بتكتشف وتعرف الموضوع، وبدل ما تعاقب الموظف، بتجيبه قدام الطفل وتخلي الطفل يضربه بالعصاية قال يعني كدا خد حقه وبتضحك على عقل الطفل، وبعدين بتهدد الطفل إنه لو حكى اللي حصل لوالده أو باباه هيدبـ* ـحوا باباه، ودا اللي قاله الطفل.
وطبعًا فضلت سايبه المجرم دا عندها في المدرسة عادي.
والله أعلم كام ضحية وقعت تحت إيده.
التحقيقات قالت إن كان فيه تواطؤ كمان من الدادة اللي كانت بتجيب الطفل للراجل دا، شيء مقزز ومقرف ومنحط.
الولد بيفضل يتعرض للقرف دا لمدة سنة، تخيل نفسية الطفل والرعب اللي عاش فيه، لحد ما والدته بتكتشف مشاكل عنده في الإخراج وهو في الحمام، في الوقت اللي المفروض الطفل هيخرج من المدرسة لأنهم هيسافروا لوالده اللي مغترب وقاعد بره بيشتغل وبعت ياخد مراته وابنه.
فالطفل لما بيعرف إنهم هيسيبوا البلد، بيحكي لوالدته، اللي بتاخده وتعرضه على طبيب فورًا، فبيكتشفوا إن الولد عنده توسع في فتحة الشرج سنتي، فبيقدموا بلاغ في المدرسة والشخص دا، وبيبدأ تدخل الطب الشرعي اللي بيثبت إن الطفل فعلًا تعرض لاغتصـ* ـاب.
الشرطة المصرية بتتحرك وتقبض على المتهم، اللي بعدها بيخلى سبيله على ذمة القضية، يعني المتهم لحد دلوقتي حر طليق، والقضية شغالة.
أهل المتهم عرضوا على الأم رشاوي غالبًا دهب حسب المتداول علشان تتنازل، ولكنها رفضت وصعدت الموضوع على السوشيال ميديا علشان تبقى قضية رأي عام.
الأب للأسف مسافر ومش قادر ينزل يباشر القضية بنفسه والأم لوحدها اللي بتجري ومعاها محامي محترم بيحاول ياخد حكم في القضية اللي اتحفظت مرتين قبل كدا ولكن تم فتحها تاني.
مديرة المدرسة الأستاذة اللي المفروض مربية أجيال في وسط هوجة السوشيال ميديا كتبت بوست بتقول فيه:
"حين تعوي الكلاب، قد يلتفت إليها القليل من الناس، ولكن لا ينضم إليها سوى الكلاب."
القضية هيتم الحكم فيها كمان يومين تحديدًا يوم 30/4 في محكمة جنايات إيتاي البارود.
القضية دي لازم يتاخد فيها حكم رادع وقوي، علشان نحس بالأمان.
يعني لما يحصل كدا لطفل 6 سنين في مدرسة اللي المفروض منارة العلم واللي المفروض هآمن لطفلي فيها، وتكون مديرة المدرسة عارفة بالموضوع وترد بالشكل المنحط دا، وتهدد الطفل، المفروض كدا هآمن لابني في المدرسة ازاي؟
أنا كدا لو عندي ابن هنام وهو في حضني مش هسيبه لحظة واحدة يبعد عني!
والمطلوب :
أولًا إقالة كل من هو متورط في الأمر في المدرسة، وإقالة ومعاقبة المدعوة وفاء إدوارد مديرة المدرسة.
ومعاقبة الموظف صبري كامل جاب الله اللي هتك عرض الطفل لمدة سنة كاملة.
واتخاذ الإجراءات اللازمة ضد كل شخص متورط في الجريمة دي.
ومحاولة معرفة إذا كان فيه ضحايا تانية غير ياسين ولا لا وكل الأطفال يتعرضوا على طبيب نفسي.
فاضل يومين على الحكم.
حسبنا الله ونعم الوكيل 💔
