07/10/2026
ازاي اكتشفت سر الريحة الوحشة اللي كانت بتطلع من هدومي؟؟
تقول صاحبة القصة:
بدأت ألاحظ مشكلة الريحة الوحشة من حوالي 6 شهور.. الهدوم بتاعة شغلي ريحتها كانت بتبقى بشعة على الرغم من إني بغسلها بعد كل استخدام.. مش ريحة العرق والا ريحة الهدوم المتوسخة العادية.. لا.. ريحة كده شبه المواد الكيميائية المتعفنه اللي بتخلي الناس تبعد عني خلال الاجتماعات..
أنا بشتغل ف شركة استشارات تسويقية.. ف طبعًا المظهر مهم بالنسبالي.. وكون هدومي ريحتها معفنة دي حاجة أكيد تأثر على سمعتي المهنية..
ف البداية كنت فاكرة إن المشكلة ف الغسالة.. ف جبت حد يصلحها مرتين.. عشان يدور لو فيها عفن أو مشكلة ف التصريف.. بس هو قالي إن كل حاجة تمام واقترح عليا اغير المسحوق..
غيرت أكتر من نوع مسحوق.. بقيت اغسل نفس الغسيل أكتر من مرة.. وحتى اشتريت منظف مخصوص للغسالة بستخدمه قبل كل غسلة.. وبرده مفيش حاجة نفعت.. الريحة فضلت ترجع على هدومي بتاعة الشغل تحديدًا..
الهدوم اللي كنت بخرج بيها ف الأجازات كانت كويسة... المشكلة ف الهدوم الرسمية بتاعة الشغل بس.. حبيبي "روي" كان قلقان جدًا من الموقف ده.. اقترح عليا إني أغير المغسلة.. لأني بقيت بغسلها ف مكان متخصص.. وبالفعل غيرت لمغسلة تانية ف منطقة مختلفة..
روي حتى عرض عليا إنه يجيب لي الهدوم بنفسه من المغسلة.. بما إن المكان بتاع المغسلة الجديدة قريب من شغله.. بصراحة كان متعاون وداعمني جدًا.. وأنا بتعامل مع المشكلة المحرجة دي.. بس للأسف المغسلة الجديدة محلتش أي حاجة.. لو حصل حاجة.. ف الريحة بقت أسوء..
زمايلي بقوا يعلقوا عليا.. مش مباشرة.. بس حد يقترح مثلا نفتح الشبابيك خلال الاجتماعات.. أو حد يقول إن في ريحة وحشة ف أوضة الاجتماعات وأنا هناك.. مديرتي اخدتني على جنب وكانت قلقانة إن يكون عندي مشكلة صحية.. لأن الريحة اللي طالعه مني بشعه.. كنت متدمرة..
روي اقترح إني ممكن يكون حصلي أي مشكلة صحية.. هي اللي اتسببت إن كيميا الجسم تتغير.. وقالي "انا قريت مقالات عن ناس فجأة جسمهم بقى بينتج روايح مختلفة بسبب التغيرات الهرمونية أو التغيير في طريقة أكلهم"..
اقنعني إني أشوف دكتور للموضوع ده.. وبالفعل رحت عملت فحوصات كاملة.. تحاليل دم.. تحاليل مستويات الهرمونات.. وحتى شوفت دكتور جلدية لاني شكيت إنها ممكن تكون مشكلة ف جلدي.. بس كل حاجة كانت طبيعية تمامًا..
الدكتور قالي "انتي سليمة تمامًا.. يمكن الريحة دي من البيئة المحيطة مش لسبب طبي"
ساعتها بدأت أركز كويس ف توقيت ظهور الريحة دي.. الموضوع ماكنش عشوائي.. هدومي ريحتها بتبقى كويسة لما بلبسها الصبح.. بس على وقت الغدا ف الشغل الريحة بتبقى ملحوظة جدًا.. الريحة بتظهر بعد ما بطلع من البيت.. مش قبل..
روي فضل يقولي نظريات لتفسير الموضوع "يمكن المبنى بتاع المكتب فيه مشكلة عفن".. "يمكن ريحة البرفان بتاعك بتتفاعل مع هدومك".. "يمكن الجراج اللي بتركني فيه عربيتك فيه أبخرة بتتفاعل مع هدومك".. كل مرة روي كان بيبقى جاهز بتفسير جديد ليه الريحة دي مستمرة..
الشهر اللي فات قررت اختبر حاجة.. علقت واحد من فساتين شغلي ف العربية طول الليل.. وبعدين لبسته للمكتب تاني يوم.. مفيش ريحة.. الفستان فضل ريحته حلوة طول اليوم..
بس لما لبست نفس الفستان بعد ما كان ف دولاب أوضة نومي على مدار الليل.. الريحة رجعت تاني ف خلال كام ساعة من وصولي للشغل..
يعني المشكلة بتحصل ف البيت مش ف المكتب.. بدأت ابص ف دولابي وادور فيه.. يمكن تكون المشكلة من الدولاب.. ساعتها اخدت بالي من إزازة سبراي كانت مستخبية ورا صندوق المجوهرات بتاعي.. كانت مليانه بسائل لونه بني ريحته بالظبط شبه الريحة اللي كانت بتخرب هدومي..
واجهت روي فورًا.. حاول ينكر ف البداية.. وقالي "انا معنديش أي فكرة ازاي الازازة دي جت دولابك"
ف قولت له "الريحة المعفنة دي مبتطلعش إلا بعد ما الهدوم بتقعد ف الدولاب ده على مدار الليل.. ".. وبعد شوية ضغط.. اعترف أخيرًا باللي كان بيعمله..
روي كان بيرش هدوم شغلي بخليط من زيت السمك والخل كل ليلة وأنا نايمة.. كان بيخرب دولابي الرسمي للشغل لمدة 6 شهور..
ولما طالبته اعرف ليه.. تفسيره كان أسوء من التخريب نفسه.. روي قال إنه كان قلقان إني ابقى واثقة ف نفسي أكتر بسبب نجاحي ف الشغل.. وساعتها احتمال ابدأ أدور على حد يكون أنجح منه عشان أبقى معاه..
هو كان ملاحظ إن زمايلي الرجاله ف الشغل بيتعاملوا معايا بودية أثناء الفعاليات بتاعة الشغل.. وقرر إني محتاجة انزل شوية ع الأرض على المستوى المهني..
ف قرر يخلي ريحتي معفنة ف الشغل.. كان عايزني محرجة ومش واثقة ف نفسي عشان أخسر شبكة علاقاتي.. وكمان مجذبش ليا أي راجل..
هو فعلًا كان مفكر إنه لما يخلي ريحتي بشعة كان طريقة منطقية يخليني أكمل ف علاقتنا..
روي كان حقيقي مش فاهم أنا ليه زعلانه.. وقال إنه بس كان بيحمي علاقتنا من التهديدات الخارجية.. وإني المفروض أقدر إن حبيبي مهتم بيا كفاية إنه يكون حريص إنه ميخليش أي حد غيره يعوزني..
وقالي أد ايه هو كان بيدعمني خلال المشكلة دي كلها.. واد ايه ساعدني أعرف سبب المشكلة واقترح عليا حلول..
عقله كان مصور له إنه كده الحبيب الي بيساعد.. مش اللي بيسبب لي مشكلة ف السر.. هو كده كان شايف إنه حبيب متفاني..
سيبت ل البيت ف نفس الأسبوع.. روي فضل يتصل بيا.. ويقولي "والله هبطل ارش هدومك بزيت السمك لو ده اللي انتي عايزاه.. انتي كده بتبالغي أوي ف رد فعلك على مقلب مش مؤذي حتى.. انتي عارفه أغلب البنات هيضحكوا لما يعرفوا إن الراجل اللي معاهم كان مبدع كفاية إنه يعمل مقلب زي ده عشان يحافظ عليهم"
بعد 6 أسابيع.. أم روي كلمتني بدون مقدمات.. اتصلت بيا بعد أسبوعين من نقلي من البيت.. وقالت لي إنها محتاجة تقابلني وجهًا لوجه.. لأن اللي لقته خلاها تحس إنها هتموت من القرف ..
اتقابلنا ف كافيه.. وورتني صور على تليفونها لحبة من هدومي بتاعة الشغل اللي ماكنتش لقياها واللي متعلقه ف دولاب روي.. و3 أزايز إضافية من خليط زيت السمك والخل.. مرصوصه على رف الدولاب..
والأسوء من ده كله.. مفكرة سودا.. روي كان بيتتبع فيها كل زي بيرشه.. بمواعيد وردود أفعالي.. زي "الفستان الأزرق.. أوضة الاجتماعات.. فضلت قاعدة ف زاوية الأوضة".. "الجاكت الرمادي.. رجعت البيت بدري بتقول إن عندها صداع"
كان بيوثق إهانتي وكأني تجربه علمية.. وبيكتب إمتى زمايلي بعدوا عني.. امتى بطلت اتطوع عشان أقدم العروض ف الشغل.. امتى بدأت أكل الغدا لوحدي..
أم روي فضلت تعتذر لي وتقول "ده مش مجرد مقلب خرج عن السيطرة.. ده أذى وقسوة متعمدة ومقصودة"
ف الشغل بقى.. بعد شهر واحد من اليوم اللي سبت فيه البيت.. كان عندي عرض كبير ومشي كويس أوي.. ومديرتي قالت لي "انا مبسوطة إنك رجعتي لفورمتك تاني.. على فكرة انتي بقيتي مختلفة.. بطريقة أحسن.. انا دايمًا كنت شايفاكي كفء بغض النظر عن الفترة الصعبة اللي فاتت"
ف نفس الأسبوع اكتشفت إن روي بيقول لكل أصحابنا المشتركين قصة تانية تمامًا.. بيقول لهم إني أنا اللي ألفت قصة التخريب لأني كنت غيرانه من ترقيته الأخيرة.. وإني ماكنتش قادرة اتحمل الصعوبات المهنية اللي بمر بيها..
واحدة زميلتي من الكلية اتصلت عشان تسأل عن اللي حصل.. لأنها كانت شايفه إن حكاية روي منطقية وإن من الطبيعي يكون عندي مشكلة بسبب الفرق بين شغلي وشغله.. وحتى بعد ما قولت لها عن المفكرة اللي كان بيتتبع فيها كل حاجة بتحصلي.. سكتت ومرجعتش اتصلت بيا..
صاحب العمارة الجديدة اللي سكنت فيها اتصل بيا وقالي إن روي جه خلال وقت شغلي وادعى إنه محتاج ياخد مستندات مهمة من شقتي.. وان دي ماكنتش اول مرة.. كان ظابط زيارته ف نفس الوقت اللي هو عارف إني مش موجودة فيه.. صاحب العمارة سألني لو كنت عايزه اعمله حظر من الدخول العمارة..
مديرتي استدعتني ف مكتبها تاني يوم الصبح وقررت أكون صريحه معاها.. وقولت لها إن روي هو اللي كان بيخرب لبسي لمدة 6 شهور متعمد.. عشان كان قلقان إني أبقى واثقة ف نفسي زيادة عن اللزوم..
مديرتي استدعت "لاينوس" من الأتش أر عشان يوثق كل حاجة بالتفاصيل..ويعمل حظر لروي من المبنى.. لما مديرتي أخدت الموضوع جد ومحاولتش تقولي إن دي مجرد دراما بيني وبينه.. حسيت بجد إن في حد غيري واخد الموضوع بجد وكنت عايزه اعيط.. بالفعل وثقوا كل حاجه وبعتوا له إنذار..
بعد أسبوعين.. روي نشر صوره مع حبيبته الجديدة.. واللي كانت مغرقه حساباتها بأد أيه هي محظوظة بإن حبيبها بيدعمها.. كانت بتستخدم نفس الكلام اللي كنت بقوله عنه.. فكرتني بينا ف أول كام شهر.. وكنت عايزه احذرها بس مرضتش لأنها على الأغلب مش هتصدقني..
أم روي اتواصلت معايا تاني واتقابلنا وحكت لي إن أبو روي كان متحكم برده أثناء جوازهم وكانت مرعوبة إن يكون ابنها اتعلم منه أساليبه.. وسألتني لو المفروض تحذر حبيبة روي الجديدة.. بس كانت خايفة تخسر ابنها..
قولت لها تعمل اللي ضميرها يقولها عليه.. لأن اختيارات روي مش مسؤوليتها..
روحت لمعالجة نفسية.. واكتشفت إنه روي كان بيعمل حاجات كتير أوي يقلل بيها من ثقتي بنفسي.. وإنه عزلني عن أصحابي لشهور قبل زيت السمك..
روي حاول أكتر من مرة يقتحم العمارة بتاعتي.. لحد ما الأمن هددوه يكلموا الشرطة..
بعد أسبوعين مديرتي بلغتني إن في فرصة للترقي متاحة.. وإنها هترشحني.. بس أنا كنت قلقانه إن اللي حصل الفترة اللي فاتت يأثر على احتمالية قبولي..
أم روي بلغت حبيبته الجديدة باللي عمله معايا.. وهي اتهمتها إنها غيرانه منها.. وروي كلمها وقالها إنه معتبرها ماتت بالنسبة له..
خلال مقابلة الترقية بتاعتي.. واحد من المديرين سألني عن الفترة اللي جودة شغلي انخفضت فيها.. ف قررت إني أكون صريحة.. وحكيت لهم اللي حصل باختصار.. وإني حاليًا طلعت روي من حياتي ومركزة إني أعوض اللي حصل الفترة اللي فات..
روي بعت لي بوكيه ورد كاتب لي عليه "انا مسامحك على رد فعلك.. خلينا نحل المشكلة زي الكبار" اخدت البوكيه ورميته ف الزباله بعد ما وثقته عند الاتش ار.. واتفاجئت بعدها برسايل من عيلة روي بيقولوا لي فيها إني أنانية وناكرة للجميل عشان رفضت اعتذار روي..
اختاروني للترقية.. واللجنة كانوا منبهرين بصراحتي.. بعد 3 أسابيع روحت المحكمة أعمل قرار إبعاد لروي.. المحامي بتاعي قدم كل حاجة تخص سلوك روي.. ومطاردته ليا.. أما المحامي بتاعه ف أكد إن دي ردود فعل طبيعية بعد الانفصال.. لأنه بيحاول يعتذر.. بس القاضي عمل أمر إبعاد مؤقت.. لا يكلمني والا يقرب على مسافة 500 قدم مني ف أي مكان..
بعتت لحبيبة روي الحكم وكل التفاصيل الي حصلت.. بس هي قرت الرسالة ومردتش
بعد 6 شهور كنت ماسكه أكبر حسابات ف الشركة.. والفترة اللي فاتت بقت تاريخ محدش بيجيب سيرته..
أم روي كلمتني مرة أخيرة عشان تقولي إن حبيبة روي انفصلت عنه بعد ما حاول يتحكم ف لبسها..
بعد سنه من اليوم اللي سبت فيه بيت روي.. كنت كويسه فعلًا.. ومعايا أمر إبعاد روي محاولش يكسره لحد دلوقتي.. لسه بعمل جلسات علاج نفسي.. وحياتي بقت أفضل بكتير من حياتي مع روي.. أفضل من أي حاجة تخيلتها خلال ال6 شهور اللي كل حاجة خربت فيها..
