04/08/2021
_ إمبارح بسحب الفلوس من ماكينة الATM ، و بعد ما دخّلت الكارت و الباسورد و المبلغ إللي أنا عاوزه ، ظهر علي الشاشة
......... برجاء الإنتظار ........
_ انتظرت دقيقة ..... اتنين ..... تلاتة ..... أربعة ..... الموضوع طول عن العادي زيادة عن اللزوم ، بدأت أقلق و أفكر لو الفلوس ديه ما طلعتش لا هي و لا الكارت .
_ أنا ممكن أعمل إيه ؟ و أنا محتاج الفلوس ديه ضروري جدًا ، طب اتصل بالبنك يقولولي علي حل سريع ، و لا أروح أقرب فرع و لا أعمل إيه ؟!
_ و افرض مشيت دلوقتي و الكارت راح طالع هو و الفلوس و حد خدهم و مشي .
_ أسئلة كتييير بدأت تدور في عقلي و أنا مش شايف غير كلمة
.......... برجاء الإنتظار ..........
_ و فجأة وسط الدوشة ديه كلها ..... الكارت طلع و الفلوس طلعت وراه ، و في لحظة نسيت كل الأسئلة إللي كانت بتدور في دماعي ديه .
☆ في رحلة الحياة بنتحط في مواقف صعبة كتيير جدًا ، و مستنيين من ربنا أي حل ليها لكن مش بنلاقي غير كلمة
......... برجاء الإنتظار .........
_ في المرحلة ديه بتيجي أسئلة كتيير جدًا بتنهش فينا و في أعصابنا :
▪︎هنعيش إزاي ؟
▪︎هنتجوّز إمتي ؟
▪︎هنصرف منين ؟
▪︎هنشتغل فين ؟
▪︎هنخلّف و لا لأ ؟
▪︎هنخف و لا لأ ؟
▪︎هنسافر و لا لأ ؟
▪︎هنجح و لا لأ ؟
▪︎هسدد ديوني منين ؟
▪︎ربنا هيرزقني إمتي ؟
_ أسئلة من ديه كتييييير أوي ، مليون سؤال و سؤال جوّانا ، و مخاوف و أفكار بتقتلنا ، ده غير إن الإنتظار نفسه مؤلم جدًا ..... و فجأة؟! ..... بتتحل من عنده في ثانية ، و في لحظة كل الأسئلة إللي في دماغنا ديه بتختفي تمامًا قدّام حلول ربنا .
☆ فيا صديقي المهموم المنتظر كل ما أنت فيه الآن ليس إلا مرحلة
.......... برجاء الإنتظار .........
