16/06/2026
" صـوت الـغـلابـة "
الحقوا صوت الغلابة..
قبل ما ينقطع
قبل ما وتر الأماني ..
مِ القلوب يتخلع
دول ولاد الأرض ديا ..
اللي ساقوها بالعرق
دول حيطان السد لما..
أمان بلادنا إتسرق
يبلعوا مُر الأيام..
بابتسامة الرضا
ويحضنوا برد الليالي..
بالدُّعا في القضا
عايشين ظروف بتتحول ..
ولقمتهم متلوثه
وصبرهم بيهم مطول ..
وروحهم باريها الأسى
يضحكوا والهم ساكن..
تحت جلد السنين
ويحمدوا رب المداين..
رب كل العالمين
جيوبهم خاويه تملي ..
بس القلوب مليانة
عزتهم دايما بتجلي ..
مهما كانت شقيانة
عمرهم ما مدّوا إيدهم ..
غير لرب السما
يصبروا على نقص قوتهم ..
ولو طار بالوما
الحقوا صوت الغلابة..
ده السكوت زلزلة
والرضا فيهم عقيدة..
مش مجرد مسألة
بصوا في عينيهم تلاقوا..
ألف قصة عنا و شقا
عن دموع بتداري روحها ..
فـي وقت الحنين واللقا
إدّوهم حق الحياة..
وازرعوا فيهم أمان
قبل ما يفوت الميعاد..
ويتوه فـ قلوبهم المكان
الحقوا صوت الغلابة..
قبل ما يروح و ينقطع
ده الأنين لو طال يا عالم..
جدر الحيطان هيتصدع
سليم علي
