24/06/2026
مراجعة فيلم #القصص
هو الفيلم الثالث للمخرج "أبو بكر شوقي" اللي قدم قبل كده فيلمين حلوين "يوم الدين" في ٢٠١٨ و"هجان" في ٢٠٢٤
الفيلم بطولة أمير المصري ونيللي كريم وفاليري باشنر وأحمد كمال وصبري فواز وشريف الدسوقي وخالد مختار وكريم قاسم وعمرو عابد وأحمد الأزعر وحسن العدل وأسامة عبد الله ويوهانس كريش وسارة عبد الرحمن
الفيلم بيحكي عن أسرة مصرية خلال الفترة من عام ١٩٦٧ حتى عام ١٩٨٤ والتحولات السياسية والإجتماعية اللي بتحصل خلال الفترة دي وانعكاسها عليهم، وكمان بنشوف رحلتهم مع تشجيع نادي الزمالك 🙂
الفيلم بيركز على شخصية أحمد "أمير المصري" أحد أبناء هذه الأسرة وهو عازف بيانو شاب بينجح في اكتساب صديقة مراسلة نمساوية "إليزابيث" بعد ما عمل إعلان في إحدى المجلات ومن خلال المراسلات بينهم ومرور الأحداث بنعرف أكثر عنهم وعن أسرتيهما
الفيلم بيبدأ بصوت إليزابيث أثناء التتر على شاشة سوداء بتحكي فيه قصة حصلت معاها عن التقبل والإعتراف وإن قيمة القصة فإنك تشاركها مع حد وأظن ده محور الفيلم اللي بنشوفه في القصص واللحظات القليلة اللي بيتحقق فيها حلم بسيط لأحد أبطاله أو حتى لما بيكسب ناديه اللي بيشجعه بعد سنوات عجاف زيها زي كثير من السنوات اللي عاشها أبطال الفيلم 🙂
عجبني أجواء الفيلم القديمة، فيها شغل محترم جداً سواء على مستوى الديكور أو الملابس أو الموسيقى والأغاني المصاحبة أو حتى الtheme العام للفترة دي وبنشوف كمان تطور الأجواء دي مع مرور الزمن جوه أحداث الفيلم
الأداءات التمثيلية كلها هايلة، بس الأبرز كان
- نيللي كريم اللي بتقدم دور الأم وده شئ يُحسبلها لأن الدور ممكن يكون أكبر مما هي تبدو عليه لكنها كانت جيدة جداً
- أمير المصري كمان عامل دور ممتاز والحقيقة واضح عليه النضج الفني وده ثاني أداء حلو أشوفه له السنة دي بعد فيلم Giant
- البنت اللي عامله دور اليزابيث "فاليري باشنر" كمان ممثلة جيدة جداً
- سارة عبد الرحمن عامله مشهد واحد في الفيلم كمذيعة لكنه لفت نظري جداً .. برافووو 🙂
الفيلم مش سهل في المتابعة ومتقسم فصول وممكن مايناسبش بعض الأذواق ومحتاج تشوفه أكثر من مرة علشان تُلقط كل رسايله .. كمان كنت حاسس بدوشة في الصوت بتاع الفيلم نتيجة الموسيقى اللي شغاله دايماً في الخلفية .. لكنه فيلم جيد جداً استمتعت به وهشوفه مرة ثانية أكيد
تقييم الفيلم ١٠/٨
#الحبكة
