https://www.facebook.com/194269737100988/

توت وحور - Tut & Hor, Cairo (2026)

12/01/2025

ايام بتفصلنا عن معرض القاهرة الدولي للكتاب 😍🤗

توت وحور مستنينكوا في الفترة من 23 يناير لـ 5 فبراير 🤩🤩
قاعة 2 جناح C51

مستعدييين ؟!!!

04/11/2024

توت وحور في الامارات ✌🏻❤️

لكل حبايبنا اللي هناك احنا خلاص جاييين وهنبقى معاكوا 🥳❤️
مستنينكوا في معرض الشارقة الدولي للكتاب في دورته ال 43

في الفترة من ٦ نوفمبر لغاية ١٧ نوفمبر 🤗
صالة 3 جناح T10

03/08/2024

هنروح النهارده فى مغامره جميله مع ملك عظيم قدر يستغل فترة الاستقرار ويتوجه للعمران والبناء ..

معانا جدنا الملك " امنمحات التالت " ابن الملك " سنوسرت التالت " اللى اتكلمنا عنه اخر مره ..

الملك " امنمحات التالت " قدر يستغل الاستقرار اللى كان موجود بسبب كل الحملات اللى عملها والده العظيم واللى كانت سبب فى توسيع نفوذ كمت فى فترته وكمان من بعده واتوجه للبناء ومن اشهر الحاجات اللي عملها كان الهرم الاسود فى دهشور وكمان هرم تاني فى منطقة هواره بالفيوم ..

ورغم كدا برضو عمل حملات عسكرية صغيره على الجنوب واشهر حاجه اتميز بيها جدنا انه بعت بعثات تعدينيه كتير لوادي الحمامات فى الصحرا الشرقيه ووادي الحودي في جنوب كمت وكمان بعثات تجاريه لبلاد بونت ..

واتقابل كل المجهود دا بكل الحب والتقدير من المصريين اللى عاصروا فترته وكمان من بعده ..
بكدا تكون رحلتنا خلصت النهارده وهيكون اللي جاي عهد جديد من الصراع علشان تعود الارض لشعبها من جديد ..

29/07/2024

المبدأ التلاتين من مبادئ الماعت :

"أنا لم ألوث نفسي"

النفس كيان عظيم موجود جوانا .. بيعيش معانا من اول يوم ولحد اخر يوم .. فكرة انك تروح للعالم الاخر بنفس ملوثه بكل اشكال الخطايا كفيل انه يخليها نفس قبيحه مشوهه ومدمره ..

وعلشان كدا سعى جدودنا من خلال مبادئ الماعت انهم يحافظوا على طهارة نفسهم من كل سوء وخطيئه ..

النعيم للطيبيين واللي نفوسهم صافيه وطاهره 👌🏻

22/07/2024

المبدأ تسعة وعشرين من مبادئ الماعت :

"أنا لم أتنصت"

تبقى قاعد في حالك لا بيك ولا عليك .. وتلاقي اللي قاعد يتابعك ويشوف انت بتعمل ايه وبتقول ايه .. يعني مركز في حياتك اكتر ما مركز في حياته 😂

التنصت / التجسس من اكتر الحاجات اللي يمكن بتسبب مشاكل في الحياه وعلشان كدا هو محرم وفعل مكروه ..

فعل ناس بتعمله وفاكراه انه عادي وبسيط .. بس جدودنا حطوه في وسط مبادئ وقوانين اللي بيخالفها مش بيشوف النعيم !!

19/07/2024

فى كل عصر بيكون في شخصيه اعظم منها متلاقيش وبيكون مناره لكل اللى جايين بعده علشان كدا جدنا اللى هنتكلم عنه النهارده هو الاعظم على الاطلاق فى عصره "عصر الدولة الوسطى" ..

معانا جدنا العظيم والقوي الاسد الشرس الملك " سنوسرت التالت " اللى حقق مجد عظيم فى عهده واللى موصلوش حد قبله وكان البدايه لكل اللى جايين من بعده حقق مجد عسكري عظيم لسه بيتدرس لحد النهارده وحقق كمان الرخاء والنهضه لحد ما بقى اسطوره عظيمه فى تاريخ كمت ..

جدنا قدر يسيطر على البلاد بقوة وقدر يكسر شوكة حكام الاقاليم ويكسر نفوذهم اللى كان دايما بيكون سبب الفوضى وقت ضعف الحكام .. بجانب انه عمل نهضه تنمويه عظيمه فى الاعمال المعماريه والفنيه والملاحيه والزراعيه والري اللى مفيش حد قبله قدر يعملها ..

والتجاره فى عهده كانت لاقصى بلاد الشمال ولاقصى بلاد الجنوب فى بلاد العالم القديم وفيما يخص الملاحه قدر يعمل قناه بتربط البحر الاحمر بالبحر المتوسط عن طريق نهر النيل العظيم بجانب تطهير قنوات ملاحيه تانيه كتير ..

من الناحيه العسكريه فهو كان الاسد الشرس اللى قدر يعمل حملات كتير على الجنوب وقدر يتوسع ويسيطر على اراضي تانيه ويحمي كمت من هجمات الجنوبيين ويعمل سلاسل من القلاع القويه كمان .. دا بجانب حملاته على ارض كنعان علشان ميزعلوش

وفى وصيه مشهوره بتقول " جعلت حدودي الجنوبيه ابعد مما جعل ابائي .. وبالنسبة لابني الذي سوف يحافظ على هذه الحدود التي قام بها جلالتي، فهو ابني الذي ولد لجلالتي. والابن الحقيقي هو الذي يقوم باعمال البطوله لابيه، وهو الذي يحرس حدود الذي انجبه. غير ان الذي يهملها، والذي يفشل في الدفاع عنها، فانه ليس ابني، ولم يولد لي "

الملك " سنوسرت التالت " تم تقديسه من المصريين فى فترة حكمه وبعد كدا كمان وهو يستحق كل دا واكتر كمان واحنا فخوريين جدا بانه واحد من جدودنا العظماء ..

15/07/2024

المبدأ تمانيه وعشرين من مبادئ الماعت :

"أنا لم أحزن بدون سبب"

لنفسك عليك حق .. حتى الحزن بدون اسباب في زمانهم وفكرهم سبب يمنعك من دخول النعيم .. 😥

12/07/2024

معانا جد عظيم جدا ورغم كل اللى حصل لوالده بس قدر يتغلب على الظروف ويكون حاكم عظيم وقوي كمان ..

هو الملك " سنوسرت الأول " ابن الملك " امنمحات الاول " .. واللى تم اغتيال والده الملك " امنمحات الاول " على يد الحرس الشخصي زي ما عرفنا المره اللي فاتت ..

وقت عملية الاغتيال دي كان " سنوسرت الاول " فى بلاد التمحو (ليبيا حاليا) فى حمله عسكرية ضخمة قدر يكسر شوكتهم ويرجع منتصر ومعاه الآف الاسرى ورؤوس الماشيه الكتير وهو راجع جاله خبر اغتيال والده الملك " امنمحات الاول " ومن هنا تبدأ رحلته فى حكم كمت ..

يعتبر الملك " سنوسرت الاول " من اقوى ملوك الاسرة 12 ويعتبر كمان من اوائل الابناء اللى شاركوا مع والدهم فى الحكم ودا اللى خلاه عنده خبره كويسه جدا فى الحكم والسياسه بجانب الخبره العسكرية ..

ومن ناحية العسكرية فهو قدر يعمل حملات على الجنوب والغرب وقدر يوسع حدود كمت واللى وصلت لحد الجندل التاني فى الجنوب وهناك عمل حاميات عسكرية قوية وكمان نصب لوحه تذكارية بتمجد انتصاراته العسكريه ..

ومن الناحيه الدبلوماسيه قدر يعمل علاقات قوية مع امراء المدن فى الشام وكنعان ..
ونيجي لنقطه مهمه وهى الناحيه العمرانيه وازاى هو مشي على خطى القدماء وبعت بعثات تستخرج المعادن من ارض الفيروز وكمان لوادي الحمامات فى الصحراء الشرقيه والمميز ان البعثات دي كانت بتروح معاها قوى عسكرية تحميها من اي خطر ..

وكانت كل البعثات دي علشان يوفر كل المطلوب لبرنامجه المعماري العظيم واللى منها معبد آتوم فى هليوبوليس اللى كان مركز مهم للعباده فى الوقت دا واللى كان بيزينه مسلتين من الجرانيت الاحمر واللى لسه موجود منهم واحده فى نفس مكانها وكمان بنى المقصورة البيضا اللى موجوده فى المتحف المفتوح في معبد الكرنك ..

الملك " سنوسرت الاول " ملك عسكري عظيم قدر يتخطى المحنه اللى كان فيها بسبب اغتيال والده وفى نفس الوقت التزم بكل وصاياه وتعاليمه واللى كان اهمها انه ياخد حذره من كل اللى حواليه علشان مينتهيش بيه نفس المصير ..

ومات الملك واتدفن فى هرم في منطقة اللشت زي والده ..
وغابت شمسه بس لسه ذكراه موجوده ولسه فى تاريخ كمت شموس تانيه كتير

08/07/2024

المبدأ سبعة وعشرين من مبادئ الماعت :

"أنا لم أخطف لقمة من فم طفل"

رساله مهمه ليها معاني كتير .. مبدأ محتاجينه كتير في حياتنا دلوقتي ..

نقدر نلخصه في سرقة ميراث اطفال ايتام او اكل حقوقهم بكل الاشكال لمجرد انهم اطفال ..

مبادئ بسيطه في سردها لكن عميقة في فهمها .. دول اللي دخولهم النعيم بيقف عندهم على دمعة طفل او حيوان ضعيف الحيله 😥

05/07/2024

النهارده معانا ملك من اهم ملوك الدوله الوسطى ..
ملك قدر يرجع امجاد كمت ويفرض نفوذها من جديد ويرجعها للعصر الذهبي من تاني ✌🏻

النهارده معانا جدو الملك " امنمحات الاول " مؤسس الاسره 12 واللى تعتبر قمة مجد عصر الدولة الوسطى ..
بداية عهده كانت مليانه بالصراعات والتوترات السياسيه ومعارك بحريه وحملات فى الشمال والجنوب علشان يرجع نفوذ كمت من جديد وكمان علشان يحافظ على مؤسسات الدولة ويرجع للدولة المركزية من جديد ..

ولكن للاسف جزاءه فى النهايه مكانش من جنس العمل العظيم اللى قدمه لكمت لانه فى اخر ايامه اتعرض لمحاولة اغتيال على ايد الحرس الشخصي وفارق الحياة وتم دفنه فى هرمه الخاص به فى منطقة اللشت بالجيزة وعلشان كدا تعتبر قصة " سنوهي " بتعبر عن موت الملك " امنمحات الاول " بشكل رمزي ادبي بيعكس عظمة الادب فى فترة الدولة الوسطى ..

يمكن وتيرة الاحداث سريعه والتاريخ الكمتي مليان بالملوك العظماء اللى حاولوا بكل جهدهم انهم يحافظوا على البلد دي علشان كدا احنا بنحاول نرد جميلهم دا ونفكر الناس بيهم وبأنجازاتهم العظيمه ..

01/07/2024

المبدأ سته وعشرين من مبادئ الماعت :

"أنا لم أجعل أحدا يبكي"

مجرد كلمه او فعل صغير ممكن تعمله بامكانه يؤذي ويضر غيرك من غير ما تحس او تاخد بالك ..

ودا ممكن يكون في شكل حزن وبكى ميبانش قدامك ..

خليكوا زي جدودكوا وارحموا واجبروا بالخواطر .. متخلوش حد يبكي 🤝

28/06/2024

مينا التاني ✌🏻

بعد عصر طويل من الانهيار والانقسامات في كمت جه ملك مهم وقدر يوحد كمت للمره التانيه بعد الملك " مينا " ..

النهارده معانا جدو الملك " منتو حتب التاني " او " نب حتب رع " اللي نقدر نسميه مؤسس الدولة الوسطى اللي حكم حوالي 51 سنه ..

جدنا من اول ما تولى الحكم وهو بيحاول بكل الطرق توحيد كمت من تاني ودخل صراعات كتير من حكام الاسره العاشره الموجودين في الشمال وقدر بعد سنين انه يوحد الدولة تحت حكمه هو .. والبعض بيقدر ان التوحيد تم في السنه 39 من حكمه ..

كمان عمل حملات عسكريه على النوبه وارض كنعان وقدر يرجع لكمت الاستقرار والرخاء من جديد وعلشان كدا تم تبجيله من كل الملوك اللى جم بعده ..

ممكن تكون القصه بسيطه وصغيره بس دول 51 سنه كفاح وتعب يستحق مننا كل تقدير واجلال 🫡

توت وحور - Tut & Hor

12/01/2025

04/11/2024

03/08/2024

29/07/2024

22/07/2024

19/07/2024

15/07/2024

12/07/2024

08/07/2024

05/07/2024

01/07/2024

28/06/2024

Address

Website

Alerts

Shortcuts

Share

Category