14/07/2026
من فترة أهو كان قايلي
هيكون موجود فاضلي،
ومخافش من الحياة..
من فترة أهو كان قايلي
هفضل في أمان معاه..
من فترة ده كان كلامه،
بيطمن قلبي بيه!
حبيته وقولت أحاول
أنسى الماضي القديم،
حسيت لو هبقى جنبه
قلبي هيرجع سليم..
قربت وواحدة واحدة
قلبي اتعلق وحب..
والصدمة أهو في النهاية
بقى كل كلامه كدب!
ده أنا قولت ربنا عوضني
من بعد ما الكل رفضني،
مدتلي إيدك وواخدني..
علشان تسيبني لوحدي تاني!
يعني أنت شوفتني محتاجة
ومفيش في إيدي أنا ولا حاجة،
صدقت عينك بسذاجة..
وأهو قلبي راجع وحداني..
مقدرش أقولك غير عادي
زودت جرح في قلبي كمان،
مقدرش أقولك مصدومة
أنا عادي واخدة عليها زمان..
لا أهي أول مرة أحب بجد
ولا أول مرة يعني اتساب،
ولا أول مرة أصدق حد..
والاقيه أساساً كان كداب!
- الشاعر يوسف حنفي 🖤✒️
