18/08/2021
الإسكندرية مرجح تغرق خلال 30 سنة؟
______________________________________
اول جزء في الموضوع, مقدمة.
اولاً:
على مستوى العالم، الدول كلها متأثرة بالتغير في المناخ. وفي عدد هائل من المدن اللي معرضة للغرق. مصر من أكتر 10 دول متأثرة بارتفاع مستوى البحر ومن أكتر الدول المتأثرة بالتغير المناخي، وبالرغم من دا احنا المركز ال 104 في الاحتياطات المتخذة.
مش بالضروري يفضل الوضع بيسوء تدريجياً ممكن تلاقي وبشكل مفاجئ تسارع شديد في العملية.
هل الموضوع دا سر او حاجة؟ لا مش سر خالص وناس كتير تعرفه. جزء من شعب الإسكندرية على دراية بأن المدينة بتغرق. كويس ان فيه بشر عارفين أن المدينة بتعيش اخر سنينها.
ثانياً:
مع ارتفاع درجة الحرارة عالمياً المياه المتجمدة في الشمال بتسيح بمعدل أكبر فا بقي فيه جليد أقل في الشتاء ومياه أكتر في الصيف. مستوى البحر عندنا زاد 1.8 مللي سنوياً لحد 1993 وبعدين 2.1 مللي لحد 2012 ومن ساعتها وهو بيزيد 3.2 مللي. وفي نفس الوقت أرض الإسكندرية بتهبط بمعدل قريب للمعدل دا. احنا يهمنا اللون البرتقالي اقصى اليمين في الصورة.
مصر من حيث ارتفاع الحرارة، حرارتها بتزيد 0.31 درجة مئوية كل 20 سنة من 1950. ومعدل الأيام الحر خلال الفصول بتزيد. يعني بدل ما بنشوف 20 يوم حر كل صيف. دلوقت بنشوف 30 مثلا.
بناء على الوضع فيه احتمالية ان 734 كيلو مربع يبقوا تحت المياه بحلول 2050. ودا خطر على مليون ونص فدان.
سنوياً الإسكندرية بتعاني وكلنا فاكرين طبعاً مشكلة أكتوبر 2015. ووجود الحواجز الصخرية بيحمي شوية. علماً بأن الحواجز مكلفة الدولة 120 مليون دولار. دا لتوفير الخسارة اللي ممكن تحصل لو المياه طلعت على الكورنيش والمباني القريبة للكورنيش ودي خسارتها ممكن توصل 25 مليار دولار. الوضع لسا قائم واحتمالية ان الجيل دا يشوف شوارع الإسكندرية تحت المياه، احتمالية كبيرة جداً.
الموج كل شتاء اعلى من اللي قبله والحرارة كل صيف اعلى من اللي قبله. الوضع بقي واضح.
تفاعل المشاكل مع بعضها بيولد مشاكل جديدة. مثلا الزيادة السكانية الرهيبة في مصر ومشكلة المياه اللي موجودة اصلاً من قبل المشاكل مع اثيوبيا. دا كله بيصب في مسألة قلة المياه وقلة الأراضي الزراعية. وضيف على دا المهاجرين من الإسكندرية في حال جرالها حاجة. تفاعلات المشاكل مع بعضها أقوى من كل مشكلة مستقلة بذاتها
كل اسبوع هيبقي فيه مقال واتنين. ترقبوا.
المصادر:
Galassi, Gaia, and Giorgio Spada. "Sea-level rise in the Mediterranean Sea by 2050: Roles of terrestrial ice melt, steric effects and glacial isostatic adjustment." Global and Planetary Change 123 (2014): 55-66.
http://www.takepart.com/feature/2016/02/26/sea-level-rise-alexandria
https://apnews.com/article/middle-east-science-ap-top-news-egypt-climate-e4fec321109941798cdbefae310695aa
