18/04/2026
20 yibrir, wissen d acu-t🤔
D tajmilt i wid yeɣlin ɣef lḥeq, sin isefra-ayi uriɣ-ten lawan-nni n tefsut taberkantt, ad ten-ahduɣ i wid mazal ḥemlen ad lemden s tutlayt-ayi-nneɣ. Taɣuri yelhan, s ɣur, Tufiq BUǦU.
D ffad n tlelli
Akk d tmaziɣt-nni
I aɣ-d-isufɣen ɣer iberdan
I udabu i nger tiɣri
Nesuter deg-s tili
Ad aɣ-yesexsi times n wussan
Nebɣa tugdut ad tili
Deg icuṭaḍ-is ad nedduri
Tamḥeqranit ad teqqar ɣef iẓuran
Netta iɛuẓẓeg ur d-isli
Yerra-yaɣ amzun akkenni
Di tmurt-nneɣ d ibeṛaniyen
Mi nesuget deg iberdan tikli
Ncewwel-it yenuɣnni
S RRṢAṢ, yerra-yaɣ-d awal
Acḥal d ilemẓi i yeɣlin
S imeṭṭawen d teɣratin
Nebda amṭal deg watmaten
Mačči d yiwen mačči d sin
Idammen am taliwin
Di lqaɛa ttazzalen
Nhewalentt akk tudrin
Mi d-krentt tmesbaniyin
At ccwal, i aɣ-tefkam d isem
Lehna d kunwi i tt-yugin
Tugadem-tt ad d-tbin
Ur tettafem abrid ad tlewɛem
Si zik akka i tellim
Yiwen n wudem i tesɛim
Tḥemlem aṭas lbaṭel
Ayen i aɣ-tgim di tmanyin
Ass-a ugar i aɣ-ternim
Ulac ssmaḥ d lmuḥal
Ulac ssmaḥ d lmuḥal
Iswi-nneɣ ur yettwamṭal
Am ass-a ɣur-s ad anaweḍ
Ɣas abrid yessawen
Ɣas ifassen d ilmawen
S tdukli, ur cukkeɣ ad necceḍ
Tafsut-ayi berriken
Izeğğigen-is ur ttruɣen
Rriḥa-nnsen ur tettwaṣfaḍ
Gar ifassen n usirem
I lebda ad idiren
Anebdu, ur sen-d-yettarra tacṭaḍ
Tikkelt-a ulac asusem
Ur nxeddeɛ idammen
Tagmatt gar-aneɣ ad tt-nẓẓeḍ
Amezruy mi ad d-issiwel
S tadṣa, ɣur-neɣ ad d-yemuqel
Ur d-nettbin deg-s nexbet.
Uriɣ-t 2001. Ikemmel 2002,
Txedɛem idammen yuzlen
A wid nerra d atmaten
Deg-wen aqel-in wehmeɣ
Mmlet-iyi-d amek i tḥussem
Ass-n mi i temlalem
Wid-ak-nni i ineqqen seg-neɣ
Naɣ teqqur tasa-nnwen
Akka i ttmuquleɣ deg-wen
Mebla ccek ur ɣliḍeɣ
Deg wayen akka i aɣ-txedmem
S nefxa ad d-neṭqeɣ ɣur-wen
Kunwi, ur tellim seg uẓar-nneɣ
Yeɛreq wamek ad awen-nesemmi
Tugarem icenga n tlelli
Fell-awen ɣezzif wawal
Yak teẓra-m irkelli
Win ad yerẓen tadukli
Ɣer ɣur-nneɣ amek i d-yettban
Ula d kunwi daɣen akka-yi
Ay atmaten n yiḍelli
Amezruy, azekka ad ken-yergem
Tettum akk ilemẓiyen-nni
Ɣas ttennaɣen ar ass-ayi
Ziɣ iswi mačči yiwen
Ɣer wanda akken ur nteddu ara
Aqel-iken tewḍem tura
Zzhut d iselwayen-nnwen
Kfut dayen lheḍra
Ɣas temeslayem-d ur d-nsel ara
Nekkni mazal-aɣ neddukel
Si lmut n GERMAḤ massinissa
D wid-ak i t-iḍefren meṛṛa
I nesbedd awal yes-sen
A wid-ak-nni i beddlen tama
Neggul ur nḥennet ara
Abrid-nneɣ ad t-nkemmel
Yiwen ur yezmir ad aɣ-yeḥbes
Anagar nekkni i tḥuza tmes
Nḥus d acu i d uṛɣu
Weyyi i iɣilen yes-wen ad tnes
A wid-ak-nni yecban lgaz
Init-as tɣelṭeḍ ay adabu
Ɣas teččureḍ deg-neɣ leḥbas
Tikli-nneɣ simmal ɣer zdat
Deg wulawen yeffeɣ ukukru
Aṭas i tɣedrem s rrṣaṣ
Win ittun tebra yemma-s
Ur nettruẓ ur nkennu.
, Llan deg amud
