Oh Tavanasa - in a story denter sulegl ed umbriva ha l'intenziun da schar reviver il vitg Danis-Tavanasa. Il project drezza l'egliada silla rihezia dil vargau e muossa carstgauns, historias, la veta da mintgadi e fa era punt el temps present. Ils aspectaturs vegnan menai cun bus el vitg da Tavanasa. Leu san els visitar differentas staziuns dall‘ exposiziun tenor agen gust cun agid d‘ina carta dil
vitg sin la quala ei nudau ils loghens d‘exposiziun. Per exempel san els intervegnir dil process da far la cuntscha ellas anteriuras localitads dalla gerba. Alla fontauna amiez il vitg da Tavanasa audan els la poesia da Giachen Hasper Muoth e san schigiar la bun‘aua da Tavanasa, sin la quala schizun il poet da Breil era schalus. Sin ina gronda preit d‘informaziun intervegn ins dalla vasta rihezia da luvratoris sper il dutg dalla val Cuschina e sa schizun cumprar teila cun muster original sco el vegneva squitschaus sisum Danis. En tut ei fixau ca. siat loghens el vitg da Tavanasa tochen a l‘Isletta el liber ed en baghetgs existents. Cheu essan nus aunc vidlunder d‘anflar in ni l‘auter liug adattau. Las ustrias dil vitg fan medemamein part al project nua ch‘il visitader sa prender in sitg ni dustar la fom. Igl ei reussiu a nus da dar veta a l‘ustria Surpunt per il temps dil spitachel. La stizun e l‘ustria veglia fan part all‘exposiziun. L‘ustria nova e la sala servan sco ustria avon e suenter il teater ad Isletta. Presentaziuns: ils 3, 4 e 5 da fenadur ed ils 9, 10, 11 e 12 da fenadur a Tavanasa
