06/07/2026
Njoftim mortor
“Ne jemi të Allahut dhe vetëm tek Ai do të kthehemi.” (El-Bekare, 156)
Me zemër të thyer dhe me pikëllim të thellë morëm lajmin për ndarjen nga jeta të kryetarit shumëvjeçar të Xhamisë së Qendrës në Lugano, Haxhi Jahir Shala.
Pas një sëmundjeje të shkurtër, Haxhi Jahiri u kthye tek Krijuesi i tij, duke lënë pas një zbrazëti të madhe në familje, në xhaminë tonë dhe në mbarë komunitetin shqiptar në Zvicër.
Sot nuk po ndahemi vetëm nga kryetari i xhamisë sonë. Sot po ndahemi nga një njeri që ishte zemra e xhamisë, një shtyllë e komunitetit tonë, një besimtar i devotshëm, një patriot i madh, një bamirës i heshtur dhe një shembull i përkushtimit ndaj Allahut, fesë, kombit dhe njerëzve.
Për vite me radhë ai jetoi me xhaminë dhe për xhaminë. Sa Ramazanë i përjetuam bashkë! Sa iftare ndamë në sofrat e xhamisë! Sa namaze, sa net të teravive, sa lutje e sa momente të paharrueshme kaluam pranë tij! Ai ishte gjithmonë aty, me buzëqeshjen e tij, me urtësinë dhe me gatishmërinë për të shërbyer, pa kërkuar asgjë në këmbim.
Dyert e shtëpisë së tij ishin gjithmonë të hapura për imamët, mysafirët dhe çdo njeri që kishte nevojë. Shumë prej hoxhallarëve që shërbyen në xhaminë tonë gjetën tek Haxhi Jahiri jo vetëm një mikpritës bujar, por një vëlla, një mbështetës dhe një njeri që i priti me dashuri e respekt.
Ai ishte gjithmonë pranë të rinjve. Nuk e refuzoi kurrë asnjë aktivitet, asnjë iniciativë e asnjë projekt që kishte për qëllim edukimin e brezave të rinj, forcimin e xhamisë dhe ruajtjen e vlerave tona fetare e kombëtare. Besonte në rininë tonë dhe ishte gjithmonë përkrah saj.
Përveç kontributit të tij fetar, Haxhi Jahiri ishte edhe një atdhetar i palodhur. Ai kontribuoi me përkushtim për çështjen kombëtare dhe pati nderin të ishte mikpritës i Presidentit Historik të Republikës së Kosovës, Dr. Ibrahim Rugova, gjatë veprimtarisë së tij në Zvicër. Dashuria e tij për atdheun ishte po aq e madhe sa dashuria për fenë dhe komunitetin.
Jeta e Haxhi Jahirit ishte një jetë në shërbim. Ai nuk kursente kohë, mund, pasuri apo zemër për të ndihmuar. Ishte gjithmonë i pari kur bëhej fjalë për një vepër të mirë, për një aksion humanitar, për një projekt të xhamisë apo për një nevojë të komunitetit. Ai nuk kërkoi kurrë lavdërime, mjaftonte kënaqësia e Allahut.
Do të na mungojë prania e tij në safet e xhamisë. Do të na mungojë buzëqeshja e tij, fjala e urtë, këshillat e tij, përkrahja e pakursyer dhe duart e tij gjithmonë të gatshme për të ndihmuar. Do të na mungojnë bisedat, kafetë, iftarët, netët e Ramazanit dhe çdo çast i bukur që Allahu na e mundësoi ta ndajmë me të.
Megjithatë, jemi të bindur se veprat e tij nuk do të harrohen. Ato do të mbeten dëshmi e një jete të jetuar me sinqeritet, në shërbim të Allahut, të xhamisë, të komunitetit dhe të kombit. Lutemi që çdo e mirë që ai mbolli në këtë botë të vazhdojë t’i sjellë shpërblim si sadaka rrjedhëse deri në Ditën e Gjykimit.
Lusim Allahun e Madhërishëm ta mëshirojë Haxhi Jahir Shalën, t’ia falë të gjitha gabimet, t’ia pranojë çdo namaz, çdo agjërim, çdo iftar të shtruar, çdo bamirësi, çdo shërbim ndaj xhamisë dhe komunitetit, ta ndriçojë varrin e tij, ta bëjë prej kopshteve të Xhenetit dhe ta bashkojë me pejgamberët, të sinqertët, dëshmorët dhe njerëzit e mirë në Xhenetin Firdeus.
Ngushëllimet më të sinqerta familjes Shala, të afërmve, miqve dhe mbarë xhematit të Xhamisë së Qendrës në Lugano.
Allahu e mëshiroftë Haxhi Jahir Shalën, e shpërbleftë për çdo të mirë që bëri dhe na bashkoftë me të në Xhenetin Firdeus.
Amin.
Orari dhe vendi i faljes së namazit të xhenazes do të publikohen nesër herët në mëngjes, sapo të përfundojnë të gjitha procedurat dhe të konfirmohen detajet.
