Beynelxalq Mugam Merkezi / International Mugham Centre

25/06/2026

25/06/2026

İyunun 24-də Beynəlxalq Muğam Mərkəzində Cahangir Cahangirov adına Xor görkəmli bəstəkar, Azərbaycanın Xalq artisti Cahangir Cahangirovun anadan olmasının 105 illik yubileyinə həsr olunmuş təntənəli konsert proqramı ilə çıxış edib.
Tədbirdə çıxış edən mədəniyyət nazirinin müavini Səadət Yusifova bəstəkarın zəngin həyat yolundan və çoxşaxəli yaradıcılığından danışıb. Bildirib ki, Cahangir Cahangirovun xor sahəsindəki yaradıcılığı əsası Üzeyir Hacıbəyli tərəfindən qoyulan Azərbaycan xor sənətində zirvə sayılır.1949-cu ildən başlayaraq bəstəkar Azərbaycan radiosunun nəzdində yaradılan xora rəhbərlik edərək 15 ildən artıq bu kollektivlə işləyib. Müəllifin yazdığı mahnıların çoxu ilk dəfə həmin kollektivin ifasında səslənib. Görkəmli bəstəkarın yaradıcılığının əsas hissəsini təşkil edən xor əsərləri Azərbaycan xor musiqisinin inkişafında əhəmiyyətli rol oynayıb.
Qeyd olunub ki, bəstəkarın bəstələdiyi mahnılar, xor əsərləri və kantatalar milli musiqi xəzinəmizin qızıl fonduna daxildir. Nazir müavini bəstəkarın bədii irsinin bu gün də gənc nəsil tərəfindən yaşadıldığını vurğulayaraq nə qədər ki, onun dillər əzbəri olan musiqisi səslənməkdədir, böyük bəstəkarın xatirəsi heç vaxt unudulmayacaq.
Daha sonra Cahangir Cahangirov adına Xor bədii rəhbər, Əməkdar müəllim, Prezident mükafatçısı Təranə Yusifovanın rəhbərliyi ilə unudulmaz bəstəkarın əsərlərindən ibarət proqramla çıxış edib. Sənətkarın “Azərbaycan” odası (söz: Nəbi Xəzri) ilə başlanan konsert daha sonra sevilən əsərlərlə davam edib. Konsert proqramında xorla birlikdə Xalq artistləri Eyyub Yaqubov, Gülyaz və Gülyanaq Məmmədovalar, Samir Cəfərov, Əməkdar artistlər Gülüstan Əliyeva, Dilarə Əliyeva, Lalə Məmmədova, Arzu Əliyeva və BMM-ın solistləri Mirələm Mirələmov, Günay İmamverdiyeva və Güllü Muradova çıxış ediblər. Sənətçilər bəstəkarın “Bayatılar”, “Sevgilim”, “Zərif gülüşlüm” və digər məşhur əsərlərini səsləndiriblər. Konserti “Qarabağ” kamera orkestri, pianoda Əməkdar artist Nərgiz Əliyeva və Cəmilə Musayeva, nağarada Yusif Rüstəmov müşayiət edib.

25/06/2026

Beynəlxalq Muğam Mərkəzində tarzən Məmmədağa Muradovun xatirəsinə həsr olunmuş gecə keçirilib
İyunun 23-də Bakıdakı Beynəlxalq Muğam Mərkəzində “Unudulmayanlar” layihəsi çərçivəsində Azərbaycan musiqi mədəniyyətinin görkəmli nümayəndələrindən biri, Əməkdar artist, mahir tarzən Məmmədağa Muradovun 105 illiyinə həsr olunan gecə təşkil edilib.
Tədbirdə sənətkarın Azərbaycan muğam sənətinin, milli musiqi irsinin və tar ifaçılıq məktəbinin inkişafında oynadığı mühüm roldan bəhs olunub. Qeyd edilib ki, Məmmədağa Muradov uzun illər ərzində öz yüksək ifaçılıq məharəti, zəngin repertuarı və sənətə bağlılığı ilə milli musiqimizin təbliğinə və gələcək nəsillərə ötürülməsinə dəyərli töhfələr verib.
Xatirə gecəsində çıxış edən Xalq artisti, tarzən Vamiq Məmmədəliyev və Əməkdar incəsənət xadimi İntiqam Qasımzadə sənətkarın yaradıcılıq yolundan, Azərbaycan musiqi mədəniyyətinə xidmətlərindən və tar sənətinin inkişafındakı xüsusi rolundan danışıblar.
Tədbirin bədii hissəsində tanınmış tarzənlər və xanəndələr çıxış edərək Məmmədağa Muradovun əziz xatirəsinə ehtiramlarını ifadə ediblər. Konsert proqramında Beynəlxalq Muğam Mərkəzinin solistləri, Əməkdar artistlər Arzu Əliyeva və Elnur Zeynalov, həmçinin sevilən xanəndələr Mirələm Mirələmov, Hüseyn Məlikov, Nisbət Sədrayeva, Murad Laçın və Yusif Cəfərbəyli iştirak ediblər.
Gecədə, həmçinin tanınmış tarzənlər Elman Sadıqov və Ramin Rzayev gənc ifaçılar Mirnofəl Həsənov və Cəlal Şahbəddinov öz çıxışları ilə proqramı rəngarəng ediblər.
Tədbirin sonunda tarzənin oğlu Zahid Muradov çıxış edərək tədbirin təşkilatçılarınıa minnətdarlığını ifadə edib.
Səsləndirilən muğamlar və instrumental ifalar Azərbaycan tar sənətinin zəngin ənənələrini, milli musiqimizin dərin köklərini və ustad sənətkarların yaradıcılıq irsini bir daha nümayiş etdirib.

23/06/2026

Humay Qədimovanın “Hər simdə bir hekayə” adlı solo konserti böyük maraqla qarşılanıb
İyunun 20-də Beynəlxalq Muğam Mərkəzində tanınmış xanım tarzən Humay Qədimovanın “Hər simdə bir hekayə” adlı solo konserti keçirilib. Musiqi gecəsi sənətsevərlərə zəngin və rəngarəng proqram təqdim edib.
Konsertdə Azərbaycan muğamları, xalq mahnıları və caz kompozisiyaları səsləndirilib. Humay Qədimovanın yüksək peşəkarlıqla təqdim etdiyi tar ifaları milli musiqi ənənələri ilə müasir musiqi üslublarının ahəngdar vəhdətini nümayiş etdirərək tamaşaçıların böyük rəğbətini qazanıb. Proqram yalnız musiqi nömrələrinin təqdimatı ilə məhdudlaşmayıb, eyni zamanda müxtəlif musiqi janrları və mədəni təsirlərin sintezini özündə birləşdirən yaradıcı layihə kimi diqqət çəkib.
Gecə boyunca səslənən əsərlər Azərbaycan musiqisinin zənginliyini, dərin mənəvi qatlarını və bədii-estetik gözəlliyini bir daha nümayiş etdirib. Konsert iştirakçılara unudulmaz musiqi anları bəxş etməklə yanaşı, tar sənətinin müasir təqdimat imkanlarını da ortaya qoyub.
Qeyd edək ki, konsertin musiqi konsepsiyasının müəllifi tanınmış pianoçu və bəstəkar Tural Məmmədli olub. Onun hazırladığı konsepsiya proqramın ideya bütövlüyünü təmin edərək gecənin xüsusi bədii ovqatını formalaşdırıb.

22/06/2026

Biletləri iticket.az saytından əldə edə bilərsiniz.

22/06/2026

Giriş sərbəstdir.

22/06/2026

Unudulmaz tarzən Firudin Yarməmmədovun 95 illiyinə həsr olunmuş xatirə gecəsi keçirilib
Beynəlxalq Muğam Mərkəzində Azərbaycan tar ifaçılıq sənətinin görkəmli nümayəndələrindən biri, unudulmaz tarzən Firudin Yarməmmədovun anadan olmasının 95 illiyinə həsr olunmuş xatirə gecəsi keçirilib.Tədbir sənətkarın arxiv video-görüntülərinin nümayişi ilə başlayıb. Gecə boyu proqramı tarzən Elşən Tahirovun rəhbərliyi ilə xalq çalğı alətləri ansamblı müşayiət edib.Xatirə gecəsində çıxış edən Beynəlxalq Muğam Mərkəzinin direktoru, Əməkdar artist, Özbəkistanın Mədəniyyət Səfiri, sənətşünaslıq üzrə fəlsəfə doktoru Sahib Paşazadə Firudin Yarməmmədovun həyat və yaradıcılığından söz açaraq onun sənət irsinin gələcək nəsillər üçün mühüm məktəb olduğunu vurğulayıb.
Tədbirdə musiqişünas, sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızı, Xalq artisti, professor Vamiq Məmmədəliyev çıxış edərək görkəmli tarzənin yaradıcılığı, ifaçılıq üslubu və Azərbaycan musiqi sənətinə verdiyi töhfələr barədə xatirələrini bölüşüblər. Konsert proqramında Azərbaycanın tanınmış xanəndə və ifaçıları çıxış ediblər. Xalq artistləri Şəfiqə Eyvazova və Heydər Anatollu, Əməkdar artist İlkin Əhmədov, Beynəlxalq Muğam Mərkəzinin solistləri Mirələm Mirələmov, Könül Xəlilzadə və Rəvan Qaçayev, xanəndə Valid Abdullayev həmçinin tarzənlər Cəbrayıl Göyüşov, Mirhüseyn Əsədullayev, Hüseyn Quliyev, Cəlal Şahbəddinov Azərbaycan musiqi xəzinəsinin dəyərli nümunələri sırasında yer alan əsərləri təqdim ediblər. Gecə boyu proqramı tarzən Elşən Tahirovun rəhbərliyi ilə xalq çalğı alətləri ansamblı müşayiət edib. Gecənin sonunda Firudin Yarməmmədovun ailəsi adından onun bacısı Adilə İmanova çıxış edərək tədbirin təşkilatçılarına və iştirakçılara minnətdarlığını bildirib, sənətkarın xatirəsinin yaşadılmasına göstərilən diqqəti yüksək qiymətləndirib.

20/06/2026

Bu gün Xalq artisti Cahangir Cahangirovun anadan olmasının 105 ili tamam olur
Cahangir Cahangirov 1921-ci ildə Balaxanıda anadan olub. A.Zeynallı adına Bakı Musiqi Məktəbində, Azərbaycan Dövlət Konservatoriyasında təhsil alıb. Cahangir Cahangirovun xor sahəsindəki yaradıcılığı əsası Üzeyir bəy tərəfindən qoyulan Azərbaycan xor sənətində zirvə sayılır. 1949-cu ildən başlayaraq bəstəkar Azərbaycan radiosunun nəzdində yaradılan xora rəhbərlik edərək 15 ildən artıq bu kollektivlə işləyib. Müəllifin yazdığı mahnıların çoxu ilk dəfə həmin kollektivin ifasında səslənib. Habelə o, Azərbaycan Dövlət Filarmoniyası nəzdindəki Mahnı və Rəqs Ansamblının bədii rəhbəri vəzifəsində çalışıb.
Bəstəkarın yaradıcılığı öz çoxşaxəliliyi ilə seçilir.
C.Cahangirovun yaradıcılığında mahnı janrı da xüsusi yer tutur.
Bəstəkarın filmlərə yazdığı mahnılar da öz bənzərsizliyi ilə seçilir. O, “Dağlarda döyüş”, “Dəli Kür”, “Evlənmək istəyirəm”, “Qatır Məmməd”, “Yenilməz batalyon” kimi filmlərdə səslənən mahnıların müəllifidir.
Bəstəkar uzun illər Azərbaycan Dövlət Konservatoriyasının (indiki BMA) Xor dirijorluğu kafedrasına rəhbərlik edib, gənclərə xor musiqisinin incəliklərini öyrədib.
Xalq artisti Cahangir Cahangirov 1992-ci il martın 25-də dünyasını dəyişib.

19/06/2026

Özbəkistan Dövlət Sənət və Mədəniyyət İnstitutunun doktorantı, Daşkənd şəhər meriyası üzrə millət vəkili İroda Berdiyeva və Daşkənd Tekstil və Yüngül Sənaye İnstitutunun doktorantı Dilobar Zufarova Azərbaycana səfər zamanı Beynəlxalq Muğam Mərkəzində olublar. Mərkəzin direktoru, Əməkdar artist, Özbəkistanın mədəniyyət səfiri, sənətşünaslıq üzrə fəlsəfə doktoru Sahib Paşazadə qonaqları səmimi qəbul edərək Özbəkistan təhsil müəssisələri ilə BMM arasında əməkdaşlıq və reallaşan layihələr haqqında qonaqlara məlumat verib.
Qeyd edək ki, səfər çərçivəsində qonaqlar Mətbuat Şurasının sədri, AYB–nin sədr müavini Rəşad Məcid, Teleradio Akademiyasının rəhbər və tələbə heyəti və Azərbaycan Milli Konservatoriyasının mətbuat xidməti Aysel Fikrət qızı ilə görüşüblər. Görüşlərdə media savadlılığının incəsənət və mədəniyyət sahəsindəki rolu, rəqəmsal mühitdə etibarlı informasiya, beynəlxalq əməkdaşlıq və gənclər üçün yeni inkişaf imkanları müzakirə edilib.

18/06/2026

İyunun 17-də Beynəlxalq Muğam Mərkəzində
“Azərbaycan muğamı” layihəsi çərçivəsində xalq çalğı alətləri ifaçılarının iştirakı ilə növbəti konsert keçirilib. Konsert proqramnda gənc ifaçılar və təcrübəli sənətkarlar Azərbaycanın zəngin muğam və xalq musiqisi irsini dinləyicilərə çatdırıblar.
Tamaşaçılara “Humayun rəngi”, Sərdar Fərəcov – “Lirik rəqs”, Vasif Adıgözəlov “Qərənfil”, Cahangir Cahangirov “Alagöz” və digər rəngarəng kompozisiyalar təqdim edilib.
"Azərbaycan muğamı" layihəsində təqdim edilən konsert muğamın, eləcə də xalq çalğı alətləri ifaçılıq məktəbinin qorunması, təbliği və gənc nəslə ötürülməsi məqsədilə təşkil olunub.