23/06/2026
Adəm üçün təsəlli
Güzgüdəki kişini də nəzərə alsaq
İkimizik evdə.
Baxırıq... darıxırıq... sonra lal-dinməz ikimiz də yox çıxırıq;
O, güzgüdən, mən həyatdan.
Tənhalıq saat doqquzdan sonra başlanır bu evdə.
O vaxt ki, günəşin yerini ay tutur
O vaxt ki, Adəm Həvvanı unudur.
O vaxt ki, insan qadağan olunur cənnətə.
O vaxt ki, tamah qalib gəlir məhəbbətə.
Qorxma, Adəm!
Qadın səni cənnətdən qovdurubsa,
Sən də onu özünlə cəhənnəmə aparırsan.
Sevgi püşkatmadır, qorxma!
Sənin bəxtinə “heç kim” çıxmaya bilər.
Qorxma, Adəm!
Sevgi məişət hadisəsinə çevrilə bilməyəndə
Ya əfsanəyə, ya cinayət hadisəsinə çevrilir
Sevmək özünü yox, başqasını xilas etməkdir.
Və unutma: qadın kişinin həyatında həmişə kirayənişin kimi yaşayır.
Və unutma: kişi ona görə bədbəxt olur ki,
Özünün əfsanəvi sevgisini məişət rahatlığına dəyişmək istəyir.
Qadın ona görə bədbəxt olur ki,
Özünün məişət sevgisində əfsanə axtarır.
Kaş ki, unutmaq da sevmək qədər asan olaydı, Adəm!
Unutmaq üçün mütləq sevmək laızmdır.
Sevmək üçün ayaqüstə ölmək lazımdır.
Sevgi duyğuların baxar korudur.
Bəzən fahişə sevgilinin dublyorudur.
İçində sevgi olmayan ayrılıq yoxdur, Adəm!
Ağlama, Adəm!
Qadınla kişinin zaman ölçüsü bir deyil.
Kişi vaxtı saniyələrlə, dəqiqələrlə ölçür.
Qadın isə aylarla, illərlə.
Get özünü zəhərlə, Adəm!
əfsanə öz qurbanının yolunu gözləyir!
Həyat sənin düşündüyün qədər mürəkkəb
Mənim düşündüyüm qədər sadə deyilmiş.
Ağlama, Adəm!
Mən də sənəm!
Aqşin Yenisey
