Briz

22/08/2026

21/08/2026

Axşam günəş batır, səhər ay batır,
nə deyir Göy Yerə bu göz-qaş ilə.?
Sənin dərdindən də kefnən içirəm
axşam kabab ilə, səhər xaş ilə.

Gəlib yetişməmiş o yollar sənə
gün gəldi, bu dünya gəldi dar sənə:
öldün, bir başdaşı qoydular sənə,
evini tikdilər bircə daş ilə.

Gəl gör içimdə nə qan salmışam.?!
Qaçanda üstümdən bir can salmışam...
Kəfəni boynuma çoxdan salmışam,
qəbrə getmək olmaz bu nimdaş ilə.

21/08/2026

İstəsək biz xoşbəxt ola bilərdik
Qismət də boş sözdür, bəhanələr var
Dön bir bax, arxaya nələr yaşadıq!
Kim bilir, qarşıda daha nələr var...

Şeirlər ovutmur, sağalmır yaram
Ağ-qara dünyamın bəzəyi sənsən
Heç kimlə sən qədər xoşbəxt olmaram
Axı xoşbəxtliyin özəyi sənsən

Güləndə deyirlər, nə dərdi var ki,
İnan, könülsüzəm indi hər işə
Şirin ya da acı nə fərqi var ki?
Xatirələr əzab verir həmişə

Dolmuş bir buludam yağa bilmirəm
Qəm-kədər min birdi, səbrimsə mindi
Bu sənsiz dünyama sığa bilmirəm
Bədənim ruhuma dar gəlir indi

Bircə qədəminlə gül açar daş da
Həsrətdən çox yazdı bu qələm, gülüm
Mürəkkəb qoxusu, sevməkdən başqa
Şairin əlindən nə gələr, gülüm?

Sən mənim gülümsən, min özgə çiçək
Tək cismimə sahib olarlar ancaq
Bu sətrin altından qalın bir xətt çək!
"Ürəyim həmişə sənin olacaq..."

Sevgisi çay kimi soyuyan adam
Özgə ocaqlarda isinə bilməz
Şirin xəyalları çox acı dadar
Ürəyi sevinməz, gözləri gülməz

İllərdir özümə gələ bilmirəm
Məni məndən aldın sən bir baxışla
Yaşaya bilmirəm, ölə bilmirəm
Yaşasam səninəm, ölsəm bağışla!

Rəvan Məmmədli

20/08/2026

Mənə bir məktub göndər bilim ki, ölməmişəm..

20/08/2026

Gözlərin nə deyir başa düşürəm,
Niyə çaşdırırsan dilinlə məni..

Nəriman Həsənzadə

19/08/2026

sən də elə bilirsən ki, yaşadığın nağıldı
mən də bu sərsəm nağılın ağ atlı şahzadəsi?
bir də gördün çıxdım getdim, xəyalların dağıldı
bir də gördün öldüm getdim,
üzülmə birdənəsi.

nağıllara çox inanma, nağıllarda div olur,
küpəgirən cadugərlər, gedər-gəlməz meşələr
saçlarından asırlar ha, gözəl-göyçək qızları,
divlər hələ çox yaşayar, qırılmasa şüşələr.

simurqların qanadında qurduğumuz xəyallar,
simnarların qalasında dustaq kimi çırpınar
barmağına duz basmasan, div aparar almanı
kəndirini dar quyuda kəsər doğma qardaşlar.

ədalətli padşahlar var, rəşadətli igidlər
nağılların bədheybəti, qulyabani, şahmaran
yaxşıların arzuları nağıllarda çin olar
nağıl gözlüm, bu həyatda mənasızdı arzular

bir də keçəl şah qızından nağıllarda kam alır,
rəml atmaqla aşkar olmur dərvişlərin hiyləsi.
mən də qamış at sürürəm, təpəgözün üstünə,
keçilməzdir, aşılmazdır qarşı dağın zirvəsi.

sən də elə bilirsən ki, yaşadığın nağıldı
mən də bu sərsəm nağılın ağ atlı şahzadəsi?
bir də gördün çıxdım getdim, xəyalların dağıldı
bir də gördün öldüm getdim,
üzülmə birdənəsi.

Cəlil Cavanşir

19/08/2026

El bilir ki, sən mənimdin bir zamanlar Azərbaycan!
Yurdum, yuvam, məskənimdin bir zamanlar Azərbaycan!
İndi isə dadın-duzun yad kəslərin damağında...
Oğlun-qızın qıvrılaraq, acı çəkir ocağında.
Hər millətə yuva olan qucağında öz xalqının yeri yoxdur.
Parçalanmış torpağında ac gözlər var, bu səbəbdən birləşdirən biri yoxdur.
Biz hələ də söyləməyi bacarmırıq "yaxşıların" qan ağladan yamanını,
Biz hələ də gözləyirik nağılların gerçək olma zamanını.
Hal-hazırda danışılan nağıllarda axı niyə pərilər var, divlər yoxdur?
Axı niyə saraylar var, adi yeşik taxtasından düzəldilmiş, damı daman uçuq-sökük evlər yoxdur?
Axı niyə yığın-yığın puç ümidlər bəlkələrdən asılıbdır?
Axı niyə o bəlkələr gerçəyə yox, yalanlara qısılıbdır?

Qılınc olub ayağına dəyən də biz,
Arsız kimi "ayağa qalx" deyən də biz.
Səhnələrdə düşmənlərin qızlarının baldırına baxa-baxa, gözümüzü döyən də biz,
Özümüzü söyən də biz, öyən də biz.
Biz özümüz nəfsimizlə qaraladıq pak adını,
Qırıb-tökdük qanadını, zəhər etdik bal dadını.

Yayın qızmar istisində qürbət elə köç edəndə sevinirik,
Qarlı qışın şaxtasında geri dönüb, o közərən ürəyinin istisində isinərkən dərk edirik vətən nədir...
Bizdə vətən sevgisi var?
Bizdə vətən həsrəti var?
Gər olsaydı qoyarmıydıq taptaq altda əziləsən?
Qoyarmıydıq tikələrə bölünərək, zırpıların əlindəki zülm ipinə muncuq olub, düzüləsən,
Qoymazdıq ki?!

Azərbaycan, bağışla ki, sənə layiq olammadıq,
Məlhəm olub, o yaralı ürəyinə dolammadıq!
Çalışdım ki, bir təsəlli verim sənə, bacarmadım.
Yalan vədlər vermək necə çətin imiş.
Çalışdım ki, bu dünyaya yağan bütün yağışların buludların cəm eyləyim üzərinə, təki sənin odun sönə, bacarmadım.
Nə desəm, boş!!!
Bir zamanlar "Odlar yurdu" adlanırdın, indi isə buza dönmüş bir vətənsən Azərbaycan!
Üzgünəm ki, bu ağrıyan ürəyim yox, ürəyimdə olan sənsən Azərbaycan!

Xəyal Zeynal

18/08/2026

Nəfəsdən öpmək..

18/08/2026

🤏