22/09/2026
100-ԱՄՅԱ «ԶԱՐԵ»-Ն ԿԻՆՈՅԻ ՏԱՆ ԷԿՐԱՆԻՆ
ԲԵԿՆԱԶԱՐՅԱՆԱԿԱՆ ԳԼՈՒԽԳՈՐԾՈՑԻ ԴԻՏՈՒՄԸ՝ ՍԻՐՈՎ ԵՎ ԱՆԱԿՆԿԱԼՆԵՐՈՎ։ ❤
Սեպտեմբերի 18-ին Կինոյի տան ԼՈՐԻԿ Կապույտ սրահի լեփ-լեցուն դահլիճում կայացավ ՀԱՄՈ ԲԵԿՆԱԶԱՐՅԱՆԻ գլուխգործոցներից՝ «ԶԱՐԵ» ֆիլմի դիտումը, իսկ երեկոն վերածվեց ջերմ զրույցով, հիշողություններով, արժևորումներով և անակնկալներով լի օրվա ավարտի։
Երեկոյին ներկա էր հայկական համր կինոյի աստղերից ԵՐԱՆՈՒՀԻ ԱԴԱՄՅԱՆԻ, որը հանդես է գալիս նաև «ԶԱՐԵ» ֆիլմում և դերասան, Հայաստանի Առաջին Հանրապետության խորհրդարանի դիվանապետ ԱՐՇԱՎԻՐ ՏԵՐ-ՄԿՐՏՉՅԱՆԻ ծոռը՝ ԳԵՈՐԳԻ ՆԱԶԱՐՅԱՆԸ, որն իր հիմնական մասնագիտությունից բացի զբաղվում է նաև իր նախապապի և նախատատի ժառանգության ուսումնասիրությամբ և բավական հետաքրքիր ներկայացրեց իրենց գերդաստանը։
Երեկոյին ներկա էր նաև հայկական կինոյի մեծանուն երախտավորներից՝ ԱՄԱՍԻ ՄԱՐՏԻՐՈՍՅԱՆԻ թոռնուհին՝ ռեժիսոր, մուլտիպլիկատոր, բազմաթիվ սիրված ստեղծագործությունների հեղինակ ԳԱՅԱՆԵ ՄԱՐՏԻՐՈՍՅԱՆԸ, որը շատ լավ տեղյակ լինելով հայկական կինոյի երբեմնի անցուդարձին, խոսեց թե «ԶԱՐԵ» ֆիլմի, որը ծնվել է նաև ԱՄԱՍԻ ՄԱՐՏԻՐՈՍՅԱՆԻ մասնակցությամբ, թե իր պապիկի անցած ճանապարհի մասին, որը շատ հետաքրքիր էր հատկապես երեկոյին ներկա բազմաթիվ երիտասարդների, ավագ դպրոցների աշակերտների համար, որոնք երեկոյին մասնակցում էին առանց հատուկ հրավերի, իրենց երեկոն հայկական կինոյի հետ անցկացնելու մտադրվածության արդյունքում, ինչն անչափ ուրախալի է։
Ֆիլմի դիտումից առաջ և հետո «ԶԱՐԵ»-ի, ՀԱՄՈ ԲԵԿՆԱԶԱՐՅԱՆ հանճարեղ անհատի, նրա ստեղծագործությունների, հայկական կինոյի մասին խոսեցին կինոգետ, կինոքննադատ, արվեստագիտության թեկնածու, դոցենտ ՍԻՐԱՆՈՒՅՇ ԳԱԼՍՏՅԱՆԸ, կինոգետ, կինոքննադատ, պրոֆեսոր ԱՆԵՏԱ ԵՐԶՆԿՅԱՆԸ, կինոգետ, խմբագիր ՌՈԲԵՐՏ ՄԱԹՈՍՅԱՆԸ, իսկ հարց ու պատասխանը լրացրեց բոլոր այն բացերը, որոնք կարող էին լինել։
Այնքան հետաքրքիր էր երեկոն, որ նրան ներկա օտարերկրացի զբոսաշրիկներից մեկը մինչև երեկոյի ավարտը ժամանակակից տեխնոլոգիաների միջոցով թարգմանելով զրույցը, մինչև վերջ մասնակցեց երեկոյին։
Նորից կրկնենք, որ անչափ ուրախալի էր հատկապես մեր դպրոցականների, երիտասարդների ներկայությունը, որոնք նախընտրել էին իրենց երեկոն անցկացնել հայկական համր ֆիլմի դիտումով։
Իսկ մեր մշտական այցելուների, մեր սիրելի թիվ 112 ավագ դպրոցի աշակերտների և ուսուցիչների ներկայությունն արդեն չի զարմացնում։
Աշնանային կինոերեկոները կինոյի տանը շարունակվելու են։
ՈՒշադիր եղեք, բաց չթողնեք։ ❤❤❤
