31/12/2025
2025-ը գնում է՝ իր հետ տանելով չկատարվածը, չհասցրածը։
Կգա 2026-ը ու կասի՝
քթներս չկախենք չիրականացվածի համար,
քանի որ ոչ բոլոր չարված քայլերն են պարտություն,
և ոչ բոլոր ուշացումները՝ սխալ։
Տարին սկսվում է նոր էջից,
և կարևորը՝ գրենք այն մաքուր խղճով, մտածողությամբ ու արժանապատվությամբ։
Նույն ու ամեն տարի կրկնվող մաղթանքները թող չմնան լոկ մաղթանք։
Ապրենք մեր մաղթածի ու ցուցադրած ջերմությանը համարժեք։
Այն բարությունն ու ժպիտները, որ երևում ու դրսևորվում են այս մի քանի օրվա ընթացքում, անկեղծորեն ու լիաթոք թող բխեն մեզանից և մեզ շրջապատեն ամբողջ տարվա ընթացքում։
Բոլորիս օջախներում ու սրտերում թող այս գիշերը դառնա առիթ՝ նորովի արժևորելու, գնահատելու և անդրադառնալու մեր ապրած կյանքին ու սկզբունքներին։
Թող գալիք նոր տարում լինեն միայն առաջընթացներ՝ հետևում թողնելով ոչ մնայուն ու թույլ հարաբերություններն ու արժեքները։
Ավելանա միայն սերն ու ազնվությունը։
Պինդ պահեք նրանց, ովքեր ձեր կողքին են, ձեզ հետ, ում սրտում եք, ում սիրում եք։
Առողջ եղեք, որ ձեր վաստակածը կարողանաք օգտագործել իմաստալից ու ուրախ բաների վրա։
Ով չունի, թող հանդիպի, ով ունի, թող միշտ առաջ գնա։
Միշտ պատրաստ եղեք սովորելու, փոխվելու և հզորանալու, բայց միայն դրական առումով։
Եվ ամենակարևորը՝ սեր՝ ընկերոջ, մերձավորի, անգամ անծանոթի ու երկրի հանդեպ։
Թող 2026-ը լինի մաքուր մտքի, պատասխանատու սիրո և արժանապատիվ կյանքի տարի։
