31/12/2025
✸ 2025-ը Գեղագիտության ազգային կենտրոնի համար ամենանշանակալի տարիներից մեկն էր: Մենք իրականացրեցինք մեծ ու փոքր տարբեր գունեղ ու կարևոր նախագծեր, հյուրընկալեցինք միջազգային փորձագետների, Հայաստանը ներկայացրեցինք միջազգային տարբեր հարթակներում:
Բայց, ամենակարևորը, իրականացրեցինք վերջին տարիների մեր ամենամեծ նպատակներից մեկը:
📍 Վերաբացվեց Մանկական արվեստի թանգարանը: Կենտրոնին վերադարձվեցին պատմականորեն իրեն պատկանող տարածքները և այնտեղ նոր շնչով ու հնարավորություններով վերաբացվեց արվեստային մի միջավայր, որը, վստահաբար, եղանակ փոխողներից է մեր մշակութային իրականության մեջ: Հավատարիմ մնալով իր հիմնադիրների՝ Հենրիկ Իգիթյանի և Ժաննա Աղամիրյանի սկզբունքներին ու տեսլականին՝ Մանկական արվեստի թանգարանն այսօր ներկայանում է ֆունկցիոնալ առումով վերաիմաստավորված ու վերազինված: Թանգարանը 2026 թվականին դեռ շատ նորություններով կուրախացնի իր մեծ ու փոքր այցելուներին:
📍 Այս տարի ևս հաջողությամբ իրականացրեցինք «ԳԱԿ մշակութային խաչմերուկ» նախագիծը: Դրա շրջանակում Վրաստանից, Իրանից, Ֆրանսիայից, Իտալիայից, Գերմանիայից և Չինաստանից ժամանած ժամանակակից արվեստագետները վարպետության դասեր, աշխատարաններ և հանդիպումներ ունեցան Հայաստանում։ Սա կենտրոնի շարունակական նախագծերից մեկն է, որն անչափ կարևոր է իր ձևաչափով: Նախագիծն իրականացվեց Երևան, Վանաձոր, Գորիս, Դիլիջան և Բերդ քաղաքներում՝ այդպիսով ապակենտրոնացնելով արվեստային փորձառություններն ու կրթությունը:
📍 Արդեն շարունակական դարձած նախագծերից մեկն էլ արվեստի ոլորտի ուսուցիչների համար կազմակերպվող վերապատրաստման դասընթացն էր: Այն նպատակ ուներ զարգացնել նրանց ստեղծարար մտածողությունն ու երևակայությունը, ծանոթացնել միջառարկայական կրթական միջավայր ստեղծելու ժամանակակից մոտեցումներին, հաշմանդամություն ունեցող անձանց հետ աշխատանքի նոր մեթոդներին: Այս տարի դասընթացին մասնակցեցին 27 ուսուցիչներ:
📍 Իրականացրեցինք նոր հետաքրքիր նախագիծ՝ «Թատրոն դասասենյակում»: Սա նոր ձևաչափ էր, որ կյանքի կոչվեց շվեյցարացի դրամատուրգ և ռեժիսոր Լուսիեն Հոգի հետ միասին: Գեղագիտության ազգային կենտրոնի Փոքր թատրոնի, Մետրո թատրոնի, Գյումրիի ստորաբաժանման թատերական ստուդիայի և Գյումրիի «Էտյուդ» ստուդիայի սաների հետ միասին դեռահասներին հուզող տարբեր թեմաների շուրջ ներկայացում բեմադրեց: Այն ցուցադրվեց Երևանի և Գյումրիի մի քանի դպրոցներում՝ հենց դասասենյակներում, ինչը հետաքրքիր փորձառություն էր ինչպես մասնակիցների, այնպես էլ հանդիսատես աշակերտների համար:
📍 ԳԱԿ Փոքր թատրոնը մեծ հաջողությամբ մասնակցեց Գերմանիայի Լինգեն քաղաքում անցկացվող Մանկական թատրոնների 16-րդ համաշխարհային հեղինակավոր փառատոնին: Ավելի քան 800 թատերասերներ դիտեցին Շեքսպիրի սոնետների հիման վրա բեմադրված «Որտե՞ղ ես, մուսա» ներկայացումը: ԳԱԿ տնօրեն Վահան Բադալյանը և Փոքր թատրոնի ստեղծագործական կազմը նաև մասնակցեցին փառատոնի շրջանակում անցկացվող ռեժիսորների միջազգային ֆորումին:
📍 ԳԱԿ-ն արդեն երրորդ տարին շարունակ հյուրընկալեց իրանցի-ավստրալիացի թատրոնի դերասանուհի և կատարողական արտիստ Էլնազ Շեշգելանիին։ Նա աշխատարաններ անցկացրեց հայ երիտասարդների հետ՝ ծանոթացնելով նրանց պատմողական պարի (storytelling) թատերական ոճին՝ Շեքսպիրի «Համլետ» ստեղծագործության հիման վրա։
📍 ԳԱԿ սաները 2025 թվականի պատվով մասնակցեցին միջազգային մի շարք մրցույթ-փառատոներին՝ ունենալով հաղթանակներ: ԳԱԿ Պատկերասրահում թեմատիկ տարբեր ցուցահանդեսներով ներկայացվեցին մեր սաների աշխատանքները:
✸ Սա փոքր մասն է միայն այն արդյունավետ և գունեղ ճանապարհի, որ Գեղագիտության ազգային կենտրոնն անցավ 2025 թվականին: Առջևում նոր հնարավորություններով ու ստեղծագործական վառ գաղափարներով 2026 թվականն է: Շնորհակալ ենք ձեր մշտական ու անգնահատելի ներկայության և աջակցության համար:
