25/12/2020
Տարվա այս շրջանը հետհայացք գցելու ու տարին ամփոփելու հրաշալի առիթ է։ Այս տարի դա ստիպված ենք անել ոչ գլոբալ իմաստով, որ չգժվենք։ Մեզ մնում է միայն անել վերլուծություն սեփական արածների ու չարածների շուրջ, գտնել բացերը ու աշխատել դրանք լրացնելու ուղղությամբ։ Այս տարի մենք ստիպված եղաք հրաժարվել մեր նոր-նոր ոտքի կանգնող փոքրիկ տունիկից, սակայն դուք շարունակում եք մեզ կապել իր հետ ամեն անգամ զանգելով ու հարցնելով՝ տեղ ունե՞ք, որտե՞ղ է գտնվում, տեղափոխվե՞լ եք, ե՞րբ կվերաբացվեք և այլն․․․ մենք էլ շատ ենք կարոտում Թեյնիկը ու հատկապես Ձեզ՝ մեր աշխատելու ամենամեծ ու կարևոր մոտիվացիային։Կարոտում ենք մեր երեկոները վառարանի ու պլեճի շուրջ, տաքացած զրույցները ու շաբաթ օրվա մաֆիան․․․ մի խոսքով, հիմա այլնի մասին․․․
Քանի որ շատ դժվար էր առանց ձեզ ու Թեյնիկի, մենք հրաժարվեցինք կտրվել մեր ստեղծած հեքիաթից ու սկսեցինք ամառը անց կացնել բնության հետ։ Բացահայտեցինք մեր մարզում աճող ուտելի-խմելի բույսերը, դրանց տեսակները, օգտակարությունը, ֆազաները, մշակման յուրահատկությունները ու արդյունքում գտանք ամենամեծ ու հասուն կարմիր մասուրները, ծանոթացանք սև մասուրի հետ, ժայռերում թաքնված արևքուրիկ հավաքեցինք, զիվանով սուրճ սարքեցինք, զարմացանք վաղենակի ու անթառամի օգտակարությամբ, արբեցինք դաղձի ու ուրցի բույրից, խառնեցինք դրանք բազմապիսի թեյերի ու չորամրգերի հետ, ու արդյունքում ունենք այն ինչ ունենք՝ թեյերի մի ո՜ղջ տեսականի, որը սկզբում պարզապես ընտանեկան ջերմ երեկոների համար էր, իսկ հիմա, երբ դրանք բոլոր փորձությունները անցել են, ցանկանում ենք կիսվել նաև ձեզ հետ։ Արդեն փորձված, շատ համեղ, բնական ու մաքուր թեյերը սպասում են ձեր երեկոները իրենց բույրով ու համով լցնելու իրենց հերթին ♥
Նկարները՝ մեր փոքրիկ ճամփորդությունից
