22/08/2026
🌄«Բակունցյան հետքերով»․ դեպի Դրնգանի ձոր
Բակունցյան աշխարհը միայն գրքի էջերում չէ․ այն ապրում է Գորիսի ժայռերի, ձորերի, ճանապարհների ու մարդկանց հիշողության մեջ։ Այդ աշխարհին նորից հաղորդակցվելու և այն հանրահռչակելու նպատակով կազմակերպվեց մշակութային քայլարշավ՝ «Բակունցյան հետքերով» խորագրով՝ դեպի խորհրդավոր ու բակունցյան շնչով ներշնչված Դրնգանի ձոր։
Քայլարշավի մասնակիցները, անցնելով գորիսյան բնաշխարհի գեղատեսիլ արահետներով, կարծես մի պահ հեռացան առօրյայից և մտան այն իրականության մեջ, որտեղ բնությունն ու գրականությունը միահյուսվում են։ Այստեղ ժայռերը դառնում են պատմության վկաներ, ձորերը՝ հիշողության պահապաններ, իսկ յուրաքանչյուր ճանապարհ՝ Բակունցի գրական աշխարհի մի նոր էջ։
Միջոցառմանը մասնակցեցին Սյունիքի գրողների միության նախագահ, բանաստեղծ Լեոն Սահակյանը, բանաստեղծ Վարուժան Գալստյանը և այլ մտավորականներ ու մշակույթի նվիրյալներ։
🏜️Այս քայլարշավը պարզապես բնության գիրկը տանող ճանապարհ չէր։ Այն վերադարձ էր դեպի Բակունցի աշխարհը, դեպի նրա ստեղծագործությունների կենդանի ակունքները, դեպի այն բնաշխարհը, որն իր գույներով, ձայներով ու մարդկային պատմություններով դարձավ մեծ գրողի ստեղծագործական ներշնչանքի անսպառ աղբյուրը։
«Բակունցյան հետքերով» քայլարշավը դարձավ գրականության, բնության և մշակութային հիշողության մի գեղեցիկ հանդիպում՝ ևս մեկ անգամ ընդգծելով, որ Բակունցի աշխարհը պետք է ոչ միայն կարդալ, այլև ճանաչել, զգալ և պահպանել։
