Themelimi i Galerisë daton me fillim-vitet ’70, periudhë kur asokohe Fakulteti i Arteve Figurative e kish rezervuar atë si një hapsirë alternative, për realizimin e proçesit të diplomave dhe ruajtjen e tyre. Më shumë një hapsirë didaktike konservimi e më rrallë me cilësi ekspoziteve e muzeale, ajo e shoqëroi proçesin mësimor përgjatë gjithë viteve ’80, për nevojat e brendshme të institucionit. Në
fillim-vitet ‘90 erdhën dhe ndryshimet e shumë pritura të sistemit. Ato sollën fillimisht ndryshimin strukturore dhe emërtimin e institucionit, nga Instituti i Lartë i Arteve në Akademinë e Arteve. Më pas ndoqën ndryshimet në rang Fakulteti, programesh e deri në riorientimin total të gjithë proçesit mësimor. Si pasojë edhe galeria e Fakultetit u rikonceptua si një hapsirë e re. Fillimisht ajo u zgjerua në sipërfaqe dhe rikonceptua si një hapsirë e aksesueshme për publikun nga jashtë. Projekti u bë i mundur pas një rinovimi total financuar nga një grup donatorësh privat. E gjithë kjo ishte pjesë e një projekti të rëndësishëm, riorientues për shumë aspekte që kishin të bënin jo vetëm me hapsirat ekspozitive, por dhe me proçesin didaktik. Najada Hamza ndërmorën një program ndërtuar mbi disa pika strategjike. Së pari me emërtimin e ri (FAB) dhe e zgjeruar, galeria kthehej në një nga hapsirat më të rëndësishme të Fakultetit, me hyrjen nga jashtë, për të pasur kontakt direkt me publikun. Si pjesë edhe të një politikë të re menaxheriale, ajo kthehej kështu në një arenë dialogu dhe ballafaqimi midis punëve të studentëve dhe publikut të gjërë. Kështu pjesa më e rëndësishme e kalendarit të saj vjetor do të konsistonte në projekte artistike studentore dhe ekspozita ndërtuar sipas secilit program studimi. Përveç kësaj aty do të gjenin vend projekte të organizuara nga bashkëpunimi me institucione të tjera, të huaja apo vendase, finalizuar me ekspozita, workshope, apo në formë të tjera alternative bashkëpunimi. Ndërkohë për një dialog të ndryshëm estetik galeria ofrohej si hapsirë ekspozitive edhe për pedagogët e shkollës, apo për artistë a grupime artistësh, të huaj, a vendas. Pika e dytë kishte të bënte me fondin e Fakultetit të Arteve të Bukura, i cili i nënshtrohej një rinovimi strukturor, fotografimi, arkivimi dhe dixhitalizimi. Kjo fazë e programit u finalizua me ekspozitën “Curriculum”, (2006) organizuar me vepra nga arkivi i viteve ’59-’62, sipas orientimit të ri që synonte eksplorimin dhe promovimin periodik të kësaj trashëgimie vizive. Pika e fundit kishte të bënte me realizimin e një broshure pasqyre e programeve që ofronte Fakulteti i Arteve të Bukura, ku pasqyroheshin programi, struktura, lëndët, laboratorët, stafi pedagogjik dhe strukturat mbështetëse. Pas këtij riorganizimi disa planësh galeria FAB u kthye një nga hapsirat më vitale të skenës së artit bashkohor në kryeqytet. Aktualisht ajo numëron mbi 20 aktivitete në vit, mes atyre realizuar me punimet e studentëve, ato të pedagogëve, institucioneve alternative, apo ato me artistë të ftuar. Synimi i saj primar mbetet dialogu mes produktit të brendshëm institucional dhe diskursit të përditshëm estetik, si rruga më e mirë për të stimuluar një krijimtari me standardet më të larta të artit bashkohor.
