10/01/2026
نیت دې که حق موندل وي آوارګي طواف دی
که دې نقاب پر تن وي که بیکیني، طواف دی
خدای دې چې زړه کې نه وي، حج د عربو رقص دی
خدای دې چې زړه کې وموند، آن رقاصي طواف دی
که پر طواف ختمه شوه، دا زندګي طاغوت ده
که شوه لټون کې ورکه، دا زندګي طواف دی
یو خوا د وږې کچنۍ له مجبورۍ نڅا ده
بل د ماړه دین پرست د حوربازي طواف دی
زړه د خدای خپل هنر دی، کعبه خلیل جوړه ده
عشق باطني رتبه ده، حج ظاهري طواف دی
که معصوم زړه دې مات وي، احرام پوشه ابرهه
له خاکي خونې ګردش، نمایشي طواف دی
یو منکسر صراط دی، هلته جدا درجې دي
عشق کې کړاو رتبه ده، درد د ولي طواف دی
"رفیق خاورین"
