03/09/2026
صندوق الخياطة كان بيوم من الأيام قطعة أساسية من جهاز العروس.. و كان ينشرى بأسعار عالية و بتصاميم فخمة و اله مكان بالدرسوار او على شي رف بغرفة القعدة..
صندوق الخياطة ما بيعرف طبقة.. بيلزم ببيت الامير و بيلزم ببيت الحاجب!!
اليوم صار غرض ثانوي مع أهميته.. كم مرة القميص قبل أول لبسة وقع زر من زراره؟ و كم مرة قبل مشوارنا بثواني اضطرينا نقطب زر او نعمل كم قطبة لقطعة من التياب؟..
بيلزم اجباري أضعف الإيمان خيط ابيض و خيط أسود و إبرة و مقص..
لازم يكونوا قراب و تحت النظر بأي لحظة..
صندوق الخياطة اسمه الدارج أكتر هو علبة الخيطان!! و للأسف غالباً هو علبة بسكوت فاضية..
أما أنا معروف من أي قسم.. انا مع صندوق الخياطة.. العتيق.. المشغول بكل تفصيلة من تفاصيله.. المدلل.. المليان قطع لابد نستخدمها ولو لمرة بس رح يكون وجودها بالبيت متل الدوا..
و انتِ لما جهزتِ اشتريتِ صندوق خياطة ولا من جماعة علبة البسكوت؟
