12/05/2026
جبل خندمہ مکہ مکرمہ کی اُن خوبصورت پہاڑی جگہوں میں سے ایک ہے جہاں سے بیت اللہ کا دل موہ لینے والا منظر دکھائی دیتا ہے۔
اجیاد کے علاقے سے ایک سڑک اندر کی جانب جاتی ہے، اور چند کلومیٹر سفر کے بعد انسان اس پہاڑی مقام تک پہنچ جاتا ہے۔ وہاں پہنچ کر بیت اللہ اور اردگرد کے مناظر دل کو عجیب سکون دیتے ہیں۔ اسی مقام سے ابراج البیت کلاک ٹاور کی بلند و بالا شان کا بھی بخوبی اندازہ ہوتا ہے۔ حیرت کی بات یہ ہے کہ آپ خود ایک پہاڑ پر کھڑے ہوتے ہیں، لیکن کلاک ٹاور پھر بھی آپ سے کہیں زیادہ بلند دکھائی دیتا ہے۔
زیادہ تر لوگ عصر کے بعد اس مقام کا رخ کرتے ہیں، کیونکہ دن کے وقت گرمی کافی شدید ہوتی ہے اور پہاڑ کی تپش موسم کو مزید گرم محسوس کراتی ہے۔ لیکن جیسے ہی مسجد الحرام اور کلاک ٹاور کی روشنیاں جگمگانا شروع کرتی ہیں، تو وہاں کا منظر واقعی دیدہ زیب بن جاتا ہے۔
جبل خندمہ تک پہنچنے کا ایک راستہ حی المعابدہ کی طرف سے بھی آتا ہے، مگر آبادی زیادہ ہونے کی وجہ سے وہ راستہ نسبتاً تنگ ہے۔ اس کے برعکس اجیاد والا راستہ زیادہ کشادہ اور آرام دہ سمجھا جاتا ہے۔
