05/05/2025
*Ndakamukwapaidza*
A small short story for today.
Author:CT Dumbu.
Zuva raipisa kuita senge raida kusvotesa zvirimwa zvakange zvaoma kare nekutsva.Gore iri ra 2008 zvaive pachena kuti raizove renzara sera 1992 rataingoudzwa.Sangano reCARE zvairatidza kuti raizoramba ririmo mudunhu medu zvichitevera chimiro chaive nezvirimwa uye mamiriro ezvinhu munyika.VeCARE ndivo vaipa vanhu hupfu,bota,bhinzi,mafuta ekubikisa,barley nezvimwe kuri kuedza kurwisa nzara yakanga yopfunya chisero.
Vachiuya kuzopa rubatsiro vesangano reCARE vaiedza kuchengetedza hupenyu hwevanhu hwaive parumananzombe.Chavasina kuziva ndechekuti kune vamwe vaizorasikirwa nehupenyu mumaraini nekuda kwerubatsiro urwu.Vamwe vairoiwa vachifa nenhau yekugoverwa kwechikafu tisingakangamwi vamwe vaiurairwa chigaro chekuva Sabhuku muraini.Sabhuku ndiye aigovera chikafu saka chigaro chake chakange chawedzerwa huremu nekudaro kuurairana huSabhuku chaisava chinhu chainyanyoshamisa zvacho mumaruzevha.
Mombe takange tadziunganidza mubani kuti timbowanawo kuzorora nekutamba neshamwari chero zvazvo kwaipisa.Panguva iyi ndakange ndiri chikomana chemakore gumi nemashanu ndichiita Form 3.SeWeekend kudai taiienda kumombe kuzorodza vaifudza pakati pevhiki isu tiri kuzvikoro.Ndivete pasi peMusekesa mubani takamirira kutamba bhora, pfungwa dzangu dzainetseka.Zvakanga zvaitika kuchikoro nezuro zvairamba kugamuchirika zvachose.
Kuti ndifunge kuti Memory kamusikana keForm 2 kaidiwa nevazhinji kakanga kandida zvezuva rimwechete kachizondiramba mangwana acho zvaindibaya baya pamoyo.Hongu musi wandadiwa naye waive musi weCivics day ndakapfeka mbatya dzekukwereta,asi akazosvitsa nyaya yacho kuna Memo ndiyani?Chinonakidza pakurambwa kweumwe chii ipapa?Ndakange ndozvibvunza mibvunzo gumi nevafararira asi chokwadi chaive chekuti yakanga yadeuka yemuguchu.
Ndakazobviswa mundangariro nezhowe zhowe revamwe vakomana vakange vouya nemombe dzavo kubani kune vamwe kuzowana kuzorora nekutamba bhora.Ndakazviudza musi uyu kuti wose achange asiri muTeam yangu pabhora acharipa mhaka iya yekurambiswa kwandakaita.Ndakanga ndazvipira kunzvenga vanhu nekumwisa sendakagarwa neshavi kuti zvimwe bundu rekurambwa raiserera.
Patakangoti titangise bhora kudai,ndakanzwa inzwi rambuya vangu richidana.
"Taaakuu!", Ndairiziva zvikuru izwi iri nokudaro ndakasiya bhora ndomhanyira kwaibva izwi.
"Mari iyi,mhanya kwamai Fadzi unotsvaga paraffin.Iti vamwe vako vakutarisire mombe womhanya kuti ukurumidze kudzoka", mbuya vaitaura vachinditambidza dzuwatsuwa remari yema Bearer Cheque yaishanda nguva iyoyo.Handichazivi kuti aive maBillion mangani asi yaikwana bhodhoro rimwechete re paraffin.Iyo paraffin yacho munoti yaimbove nekumeso here?Baba Fadzi nemudzimai wavo vaizvibikira paraffin iyi nemasaga nemapepa eplastic.
Zvavaiita vaidai ,Vaizadza mapepa muhari huru yakanamwa mativi ose zvawo asi yaizoisiiwa ine buri raibairwa imwe pipe.Pipe iyi yainofuura nemumvura saka hari yakanamwa kana yaiswa pamoto mapepa aive mukati aitsva kusvika hwave hutsi.Hutsi uhwe hwaizopinda mu pipe iya yaiiswa paburi hwofamba huri mupipipe.Pipe paraipinda nemumvura hutsi huya hwaitonhora hwochinja kubva kuve hutsi huchiita modonhwe emvura inoyerera.Iwaya madonhwe ndiyo yaizove paraffin yacho.Nhamo yakange yodzidzisa vanhu nzira dzekugadzira zvinhu.Sekune imwe nzvimbo isina vazhinji vanoziva,Chakata dzakange dzogadziriswa svutugadzike(tea).
Ndakati chitsoka ndibereke ndakananga kwamai Fadzi sezvo moyo wangu waive kubhora randakange ndasiiswa namai vababa vangu.Ndichisvika pamai Fadzi paya ndakawana vasipo vachinzi vaenda kuchigayo nemurume wavo.Vakange vasiya vana vavo vaviri Fadzi naNhemiya avo vaive nemakore ari pazasi pegumi vose vari vaviri kudaro.Ndakaona zviine njere kugara zvangu ndakamirira varidzi vemusha sezvo vainzi nguva yakange yareba vaenda saka vaigona kunge vaive vave munzira kudzoka.
Ndakagara seri kweKitchen yaMai Fadzi moyo uchingofunga bhora.Nekune rumwe rutivi Fadzi nehanzvadzi yake Nhemiya vaivewo nedzimwe pfungwa.Pandakatanga kutukwa ndichinzi ndibve pamusha apa nezvana izvi ndakangoti kuita kwepwere hazvina basa.Zvechokwadiwo hwaive hudiki nekuti hakuna munhu mukuru angadzinga customer ine mari iri kuda kutotenga zvisina chikonzero.Ndakaramba ndakanyarara hangu ndichitukwa ndikati kuita kwepwere hadzina chadzinoziva.
Zvana pazvakaona kuti kutuka hakushandi zvakatsvaka zano repiri rekudimwaya ivhu.Ndakatanga kukushwa ivhu ndigere pasi ndikangoti regai ndiite moyo murefu.Mudzidzisi wedu weSunday school aigara achitikurudzira kuti chero tikadenhwa sei tisaite zvekurwisana kana kurovana nevamwe nekuti zvaivengwa naMwari.
Ndakanga ndongodemba kuti dai vana Mai Fadzi vachikasika havo kudzoka ndisati ndapara mhaka sezvo moyo murefu wangu wakange woita uchipera.
Fadzi naBhudhi vake vachiona kuti zve Ivhu zvaramba vakabva vachinja magiya.Vakanovhunha shamhu mbiri ndokuti uyu yake uyu yake.Nemhaka chaiyo yandanga ndapara zvekuti ndingarangwa neshamhu nepwere idzi ndakaishaiwa.
Paifamba vana ava vachiuya neshamhu ndaizvinetsa nekufunga.Ndoramba ndinyerere here ndoitwa party kana kuti ndotiza?Ndakazongoti mumoyo regai vauye vana ave vaedze zvavari kuda kuita ndigovaisa panzvimbo yavo chaiyo chaiyo.
Fadzi ndiye akatanga kuvhura chirongwa.Yaisarwadza hayo shamhu iyi kana tichiifananidza nedzatairohwa nadzo naVaMatanda kuchikoro kwaMapanzure.Nhemiya nemanyemwe akati handingasari achibva andichekawo neyake shamhu nemuhuro sezvo ndakanga ndakagara pasi.Iyi shamhu yepiri iyi yairwadza.Ndakanzwa hasha dzose dzekurambwa naMemo ndisina kana kupiwa chero mbundiro hayo dzichiuya pandiri.Umwe munhu aifanira kuripa chete!Handizivi kwakabva simba revanhu vatatu richiuya kwandiri,ndakangoona ndasumuka nehasha ndakananga Nhemiya sezviya zvinoita huku ine nhiyo kana wada kubata vana vayo.
"Pwaaaa!"Yakarira mbama pakashaiwa akabata muromo sezvo Fadzi akange obereka tsoka achitiza.Mbama yandakapa chikomana Nhemiya ndakanzwa ndega kuti apa ndakwapaidza munhu.Chanza changu chakakwana padama romwana asi zvigumwe zvakashaya nzvimbo padama ndokunozorora kumhino nekumuromo wechikomana.Ndakaona chana chichizeya kuenda kuruboshwe sezvo mbama ndakachitambidza nerudyi.Ndakatambunudza ruboshwe ndokuregedzera umwe mucheka wemba ndichidzosera munhu kurudyi kwaanga ambobviswa nembama yekutanga.Ndakaona turopa twobuda nemumhino ndikaziva kuti huturu ndakange ndawanzisq.Chakanga chasara kuita hushamwari nemhepo varidzi vemusha vasati vasvika.
Mukubwaira kweziso ndakakwanisa kunhonga bhodhoro rangu rekuisira paraffin, zvitsitsinho ndokutema gotsi ndoshamwaridzana nemhepo.Mbuya kumba vaida parrafin saka zano ndakamhanya ndichifunga zvekuti ndakazonosvika kwataifudzira mombe ndave naro.
"Munhu arova mwana wangu haanetsi kubata.Mai vacho vachataura kuti ndakatuma mwana ku paraffin asi haana kuuya nayo.Zvadaro ini ndichaziva kuti ndivo mai vane mwana akarova mwana wangu.", ava ndibaba Fadzi vakange votaura vachitengesera shamwari yangu Joe yandakange ndatuma paraffin.
"Chikomana chacho chinopfuura neparoad apo chichienda kuchikoro kwaMapanzure",Fadzi akazivisa baba vake asi chavasina kuziva ndechekuti bhururu wemhandu yavo ndiye aitonzwa nyaya dzacho achiita seumwe mutengi abvawo kumba kwavo.
Kana Joe anzwa hurongwa aizodii paya?Zvakava pachena kuti kushandisa kwangu road yekwana baba Fadzi mumazuva aitevera kwaitokona ndotsvaga imwe nzira.Ko dzaizivana here?
THE END.
