Al-Rawi الراوي

14/06/2026

قريبا ….

22/05/2026

18/05/2026

في الوقت اللي بيشتكي فيه الناس من قلة الفرص .. وبيقولوا إن النجاح بقي صعب .. بنلاقي طالبة مصرية من محافظة الغربية اسمها " سلمي أشرف " ، راحت تنافس العالم كله ورجعت بعد ما حققت المركز الثاني علي العالم في معرض " آيسف " الأمريكي ، اللي هو أحد أقوي المعارض العلمية في العالم ..
وهي منافسة علمية جادة .. لا هي مسابقة في الغناء ولا في فن الطبخ .. لكنها تخص إبتكار روبوت ذكي قادر علي حمل الأوزان الثقيلة .
والرسالة هنا مش عن " سلمي "
بس .. إنما الرسالة هي إن العقول المصرية لسه قادرة علي إنها تبهر العالم ، لما تلاقي حد يؤمن بها يصدقها .. أو لما تقرر هي أن تصدق نفسها .
والتاريخ بيحكلنا عن كوكب اليابان اللي خرجت من الحرب العالمية الثانية مدمّرة بالكامل .. مدن محروقة .. إقتصاد منهار .. وبنية تحتية هدمتها القنبلة النووية والعالم كله اعتقد إن دي نهاية اليابان وأنها لن تقوم لها قائمة مرة أخري .. لكن اليابانيين قرروا يقوموا من تحت الركام .. وقرروا يتحدوا الفناء والإندثار ، فتسلحوا بالعلم والتكنولوجيا.. وبعد أقل من جيل واحد ، رجعت اليابان واحدة من أقرب دول العالم .

والتاريخ بيقول إن الأمم ما بتقومش بالقوة فقط… لكن بالعقول اللي ترفض الاستسلام.
العالم بيتغيّر بالعلم، بالتكنولوجيا، بالابتكار… واللي هيتأخر النهارده، هيبقى بيتفرج بكرة.
يمكن اللي ناقص شباب كتير مش الموهبة… يمكن بس محتاجين يقتنعوا إنهم يؤمن بها ويصدقها

08/05/2026

زمن التحالفات الناقصة

إحنا عايشين النهارده في زمن “التحالفات الناقصة” أو “التحالفات الجزئية”. زمان، التحالفات كانت واضحة وكاملة؛ يعني الدول المتحالفة كانت مواقفها متطابقة تقريبًا في أغلب الملفات السياسية والاقتصادية والعسكرية، من غير تناقضات كبيرة.
شفنا ده في تحالفات قديمة زي " حلف ديلوس " اللي اتأسس في القرن الخامس قبل الميلاد، وضَمّ دويلات بلاد اليونان تحت قيادة أثينا لمواجهة الخطر الفارسي. وشفناه كمان في العصر الحديث مع تحالف دول عدم الإنحياز، وكمان في حلف وارسو وحلف شمال الأطلنطي ( الناتو ) وكلها كانت تحالفات بين دول عندها قدر كبير من التوافق في الرؤية والمصالح.
لكن النهارده، وبسبب تشابك المصالح وتداخلها بين كل دول العالم، ظهر شكل جديد من العلاقات الدولية نقدر نسميه -إن جاز التعبير- “التحالفات الناقصة” أو “التحالفات الجزئية”.
وده واقع جديد فرضته طبيعة العالم الحالي… عالم المصالح المتقاطعة. فبقى عادي جدًا إن دولتين يختلفوا في ( 8 ) ملفات من أصل (10) ، لكن يتحالفوا في ملف أو اتنين بس، لأن مصالحهم اتقابلت فيه.
فما تستغربش لما تلاقي دولة “أ” متحالفة مع دولة “ب” في ملف أو ملفين مثلًا، رغم إن نفس الدولة “ب” متحالفة في ملفات تانية مع دولة معادية لـ “أ”. وفي الوقت نفسه، تلاقي الدولة “أ” نفسها بتتحالف مع دولة تالتة معادية للدولة “ب” في قضية مختلفة.
المشهد بقى معقد جدا… ومتداخل أوي… وأحيانًا متناقض بالنسبة للناس.
سواء عامة الناس أو حتى المثقفين والمتعلمين، بقوا كتير مش قادرين يفهموا: مين مع مين! ومين ضد مين! ومين العدو! ومين الصديق!
لأن ببساطة… اللي ممكن يكون خصمي في ملف، ممكن جدًا يكون حليفي في ملف تاني. أختلف معاه هنا، وأتفق معاه هناك. أهاجمه في موقف… وأدعمه في موقف تاني.

وده اللي خلّى العلاقات الدولية النهارده مليانة تحركات وتحالفات صعب توقّعها أو تفسيرها بالمنطق التقليدي القديم.

دي ببساطة طبيعة زمننا…زمن التحالفات الناقصة… لو جاز التعبير.

06/05/2026

بينما ننتظر ان يمر المر ، نكتشف أن العمر قد مر

29/04/2026

أخطر حاجة في الاكتئاب… إنه مش بيقتلك مرة واحدة، هو بيقنعك إن مفيش سبب تعيش عشانه

في عالم كله ضغط وسرعة، بقى فيه أكتر من 280 مليون إنسان بيحاربوا الاكتئاب، وآلاف بيسقطوا كل سنة في معركة محدش شايفها.

بس التاريخ بيقول إن المعركة دي عمرها ما اتكسبت بالسكون.

كان Winston Churchill بيسميه “الكلب الأسود”، ومع ذلك كان بيجبر نفسه يتحرك ويقرر… لأنه فهم إن الثبات هو أخطر مكان لنمو الاكتئاب

وAbraham Lincoln رغم صراعه الطويل اختار يواجه أفكاره بالشغل وخدمة الناس… لأنه عارف إن العقل لو فضل لوحده، هيهزم صاحبه.

الاكتئاب مش مجرد حزن… ده فقدان للمعنى. ولو سِبته يكبر، بيقنعك إن مفيش طريق او مافيش امل

عشان كده أهم درسين من التاريخ:
إنك تتحرك حتى وإنت مش قادر… وإنك تقرّب من الناس حتى وإنت عايز تعزل نفسك. لأن المعركة دي مش بتكسبها وإنت في أفضل حالاتك… بتكسبها لما تقوم… وإنت أصلاً واقع.

23/04/2026

في الوقت اللي العالم كله في حالة صراع على السيادة والهيمنة واستعراض القوة، في ناس كتير أوي بتسأل: إيه اللي ممكن نعمله وسط كل هذا الصدام؟ وسط معارك تكسير العظام من أجل استعراض القوة بكل أشكال العنف وكل صنوف الهدم والتخريب… تخريب مدن ومباني ومزارع، وهدم وزعزعة اقتصاد، وانهيار صناعات كبرى، وإفلاس لشركات عالمية، وفقدان موظفين لوظائفهم في معظم أرجاء العالم.

الحقيقة إن كل اللي بيحصل ده مش جديد على العالم، لأنه حصل كتير قبل كده عبر كل العصور، زي ما بيحصل دلوقتي وحيحصل تاني في المستقبل، لأن الدول المتغطرسة دائمًا تعتقد خطأً أن: "البقاء للأقوى"، مع إن التاريخ علمنا أن: "البقاء للأصلح".

وكمان التجربة الإنسانية عبر العصور علمتنا إن اللي ما يقدرش يغيّر الظروف، لازم يغيّر نفسه، أو بعبارة أدق: لازم يطوّر نفسه… لأن الحروب طول عمرها كانت بتولع وبتنطفي، بتبدأ وبتنتهي.

لكن اللي فضل باقي عبر الأزمان، ووسط كل هذه الظروف، هو الإنسان اللي اشتغل على نفسه، وطور مهاراته، ورتّب منهجية عقله.

وسواء كان عمرك 16 سنة أو حتى تخطيت الـ60، فإن أذكى قرار في الفترات دي هو:

"إنك تستثمر في نفسك"

اتعلم… طوّر نقاط قوتك… واجه نفسك بنقاط ضعفك واشتغل عليها… وخليك مؤمن إن قيمتك الحقيقية مش في اللي حواليك أياً كانوا لأن قيمتك الحقيقية في اللي جواك… وده هو اللي اتعلمناه من التاريخ ومن التجربة الإنسانية.

والمكافأة أو العوض أو النجاح… جاي لا محالة، حتى ولو جاء متأخرًا.

17/04/2026

أعرف نفسك

09/04/2026

كان في راجل عايش في بيت صغير… هو ومراته، وأولاده الأربعة، وأمه، وحماته… البيت زحمة، والنفس ضيق، وكل يوم خناقات على أتفه الأسباب، بقى حاسس إنه مخنوق ومش طايق يعيش، فراح لحاخام حكيم في آخر الحارة وقال له: “أنا تعبت… البيت بقى لا يُطاق.”

الحاخام بص له وقال بهدوء: “الحل بسيط… هات خنزير وعيشه معاك في البيت.”

الراجل اتصدم… قال له: “هو أنا أصلاً مستحمل اللي عندي؟ هزود كمان؟!”
الحاخام قال له: “اسمع الكلام.”

رجع الراجل… وجاب الخنزير ومن هنا… الحياة اتقلبت فعلًا رأساً على عقب.
الفوضى بقت مضاعفة، الريحة لا تُحتمل، صوت وخناقات طول اليوم، البيت اللي كان زحمة بقى كارثة، واللي كان ضيق بقى خانق، أيام قليلة والراجل بقى مش طايق نفسه ولا بيته ولا اللي فيه.

رجع للحاخام وهو منهار وقال له: “أنا مستعد أعمل أي حاجة… بس خلّصني من اللي أنا فيه.”

الحاخام قال له ببساطة: “طيب… نشيل الخنزير.”

أول ما الخنزير خرج…
سكت كل شيء.
نفس البيت… نفس الناس… نفس المساحة… بس الإحساس اتغيّر .... الزحمة بقت محتملة… والدوشة بقت عادية… والبيت اللي كان خانق… بقى مريح

والراجل خرج وهو شايف إن الحاخام حل له أزمة كبيرة… رغم إن الحقيقة أبسط من كده بكتير.

الحاخام ما حلّش حاجة… الحاخام خلق المشكلة من الأول… وبعدين شالها.

ولو بصّيت على اللي بيحصل حوالينا… هتلاقي نفس اللعبة بتتكرر، بس على مستوى أكبر بكتير. مش لازم المشكلة تكون حقيقية من البداية…
يكفي إنها تبقى “مُضافة”.
يكفي إن حد يزود عنصر جديد يخلي المشهد كله يختل… يخلّي الطبيعي يبقى صعب… والمقبول يبقى رفاهية.

وبعدين… في اللحظة المناسبة… العنصر ده يتشال.

فتظهر نفس الحياة القديمة… كأنها إنجاز
الناس تتنفس… وتقول: “الأزمة خلصت.”

رغم إن اللي حصل فعليًا… إنهم اتعودوا على وضع أسوأ… وبقوا شايفين الأقل سوءًا على إنه حل
وفي النص… في بيوت اتأذت… وفي ناس دفعت تمن… ووفي طرق كانت مفتوحة بقت محل حساب… وفي حاجات عمرها ما كانت أزمة… بقت ورقة ضغط واللعبة بتكمل.

الفكرة مش في الخنزير… الفكرة في اللي قدر يخلي وجوده يبدو منطقي… وبعدين يخلي خروجه يبدو إنجاز

01/04/2026

في القرن السادس عشر اشتعلت الحرب في اليمن، والغريب أن اليمنيين ماكانش ليهم ناقة ولا جمل في هذه الحرب، لأن الصراع كان داير بين الدولة العثمانية والإمبراطورية البرتغالية من أجل السيطرة على طرق التجارة في البحر الأحمر. وبدل ما القوتين يواجهوا بعضهم بشكل مباشر، بدأ كل طرف منهما يُغذّي الاقتتال بين الأطراف المحلية المتنافرة داخل الشعب اليمني. وبدأ الطرفان المتحاربان يدعمان أطرافًا يمنية محلية: فلوس وسلاح وتحالفات.

والنتيجة حرب شعواء دفع ثمنها جميع اليمنيين، اللي هم في الأصل ماكانوش أصحاب قرار في بدء الحرب ولا في تسيير مجرياتها، إنما تم دفعهم دفعًا داخل الصراع العسكري لصالح قوى أكبر. ليظهر مفهوم "الحروب بالوكالة"… حروب تُدار من بعيد، ويتقاتل فيها ناس مش أصحاب قرار، ولا حتى أصحاب مصلحة، وإنما يُساقون للمحرقة ويُدفعون للمذبحة والاقتتال في حرب بالوكالة لصالح قوى عظمى تستخدمهم في صراعاتها، وتجبرهم على دفع فاتورة الحرب من دماء أبنائهم، ومن عوائد ثرواتهم، ومن أمن واستقرار شعوبهم.

ولو بصيت حواليك النهارده، هتلاقي نفس السيناريو بيتكرر، وبشكل أكثر ذكاءً… أو بالأحرى أكثر خبثًا. فما أشبه الليلة بالبارحة. فالصراع الآن شغال على أشده من أجل مصالح قوى عظمى بتحاول بشتى الطرق أن تُجبر دولًا أخرى لتحارب معركتها بدلًا منها، أي بتحاول "تعلّق الجرس" في رقبة دول لا ناقة لها ولا جمل في الصراع الدائر، لتخوض حربًا بالوكالة تستنزف فيها ثرواتها وقوتها، وتدفع فاتورتها من أرواح وأموال شعوبها.

وهكذا تُغيّر القوى العظمى قواعد اللعبة واللاعبين، لتصب الأمور في النهاية لصالحها ولمصالحها. واللعبة اللي بيلعبوها – بحرفنة – هي البحث عن "كبش فداء" يتولى حروبهم بالوكالة، تحمّله كل الأوزار، وتجعله يدفع تكلفة أو فاتورة الحرب، لتجني هي الثمار من ورائه.

علشان كده، الدول العظمى دي – أو ممكن تسميها الدول الخبيثة – هي اللي بتحدد موعد وطريقة إشعال الحريق وبدء الصراع، ثم تترك الوكلاء يقاتلون ويقتتلون، بينما هي تراقب الموقف من بعيد، وتنتظر لحظة جني الثمار.

والدول القوية العاقلة فاهمة كويس جدًا هذا السيناريو الذي يُحاك في الخفاء لجرّها لدخول "حرب بالوكالة"، بل ومتحسبة لعواقبه الوخيمة. مش بس كده، دي كمان بتنبه كل جيرانها، وبتكشف لهم – بالدلائل والشواهد – ما يُدبّر لهم من سيناريوهات مدمّرة… ولسان حالها يقول:
"اللهم بلغت… اللهم فاشهد."