04/07/2026
HANDS OFF SANGILO FARMERS!
ALERT: MGA MAGSASAKA NG SITIO SANGILO, BINANTAAN NG PANUNURO AT SAPILITANG PAGPAPALAYAS SA SARILING LUPA!
3,500-7,000 EKTARYANG PRODUKTIBONG SAKAHAN NA GUSTONG KAMKAMIN NG MTERRA SOLAR PROJECT, MALAKING PELIGRO PARA SA KABUHAYAN NG MGA MAGSASAKA NG NUEVA ECIJA AT BULACAN!
Nakatanggap ng harapang banta ang mga magsasaka at residente ng Sitio Sangilo, Barangay Macabaklay mula sa Gapan City, Nueva Ecija noong Hulyo 2, 2026, nang sila ay sugurin at pagbalaan ng sapiliting pagpapalayas at pagsuro sa lupang sinasaka nila sa Sitio Sangilo. Nagpakilala bilang may-ari ng lupa ang isang indibidwal na nagngangalang Rey Tan, at aniya'y sisirain na ang lahat ng pananim pagsapit ng alas siyete kahapon ng umaga (Hulyo 3, 2025, 7:00 AM) kung hindi pa lalayas ang mga magsasaka na nagbubungkal sa lupain. Kasabwat niya rito ang Chief of Police ng Gapan City na si PLTCOL Wilmar Binag, dalawa o tatlo na mobil ng pulisya, at ilang mga armadong tauhan na nakasibilyan.
“Dumating sila sakay ng limang sasakyan, mga alas-11 o alas-12 ng tanghali, armadong naka-sibilyan na malalaki ang katawan.” ani BMSAI Spokesperson na si Mary Jean Bote.
Ang insidente na ito ay hindi maitatanggi bilang taktika ng intimidasyon upang pahupain ang pakikibaka ng mga magsasaka para sa lupa at buhay. Kung maaalala, inilunsad na nitong Lunes, Hunyo 29, 2026, ang unang kombensyon para sa pagtatag ng Movement Against Destructive Solar Farms (MADSOLAR), isang alyansa ng mga asosasyon ng magsasaka at progresibong organisasyon, na nagnanais labanan at patambulin ang isyu hinggil sa mapanirang MTerra Solar Project. Lalong maraming mga mamamayan ang namumulat at nakikibaka kasama ang mga magsasaka ng Nueva Ecija laban sa mga mapaminsalang solar farms.
Simula 2024 ay hinahatulan na ang mga magsasaka ng Sitio Sangilo ng gawa-gawang kaso, at patuloy ang pagbabanta sa kanilang buhay at kapakanan. Sinusunog ang mga pananim, binabansagang kriminal at ninanakawan ng kabuhayan ng mga ganid na burukrata kapitalista, malalaking negosyante at landlords ang mga magsasaka upang mapawi ang kanilang paglaban.
Sa kasalukuyan, nananatili pa ring nakaamba ang posibleng pagsuro ng lupain sa Sitio Sangilo. Kung hahayaan ang pangangamkam dito, lalong madadagdagan ang mahigit 30 ektaryang lupang sakahan na nasalakay na upang pagtayuan ng mga solar farm. Sa ngalan ng hungkag na renewable energy farms, pinapalitan ang paggamit sa libo-libong ektaryang lupain mula sa Nueva Ecija at Bulacan. Imbes na ipamahagi ang lupa sa mga magsasaka, pinapalayas at niyuyurakan ang kabuhayan ng mga magsasaka upang gawing panirikan ng mga solar panels ang mga lupain, na lalo pang nagbubunga ng mas malalang kawalan ng sariling lupa.
Mula sa MTerra Solar Project na lunsad ng Meralco at General Atlantic, 3,500-7,000 ektaryang lupain ang pinaplanong pagtatayuan ng solar farms, ngunit 60% lamang nito ang mapupunta sa mga Pilipino habang 40% ay pakikinabangan lang rin ng mga dayuhang kontraktor at investor. Malinis at sustenableng enerhiya ang pangako nito para sa milyun-milyong kabahayan, subalit hindi kasali ang mga pamilyang palalayasin sa bilang na ito. Gayundin, lupa at mga magsasaka natin ang maaapektuhan, ngunit malaking pursiyento ng enerhiya na aanihin ay sa pudar ng dayuhan lang rin mapapadpad.
Sa kabuuan, ang proyekto na ito ay magsisilbi lamang para sa pagpapalaki ng tubo ng mga lokal na malalaking negosyante, hindi rin sa masang Pilipino mapupunta ang lahat ng enerhiya na aanihin, at lahat ng ito ay aprubado ng traydor na estado. Bilang kapalit, ang mga magsasaka na tumututol sa imperyalista at kapitalistang interes ay pilit na pinapatahimik ng mga pulis at militar.
Malinaw na walang 'sustenable' sa MTerra Solar Project na magpapalayas sa libu-libong magsasaka mula sa sarili nilang lupa bilang kapalit ng enerhiya. Hindi malinis ang serbisyo na mayroong bahid ng dugo, at ang pag-unlad ay hindi dapat nakatanim sa ibabaw ng puntod ng mga magsasakang Pilipino!
Sa harap ng matinding pasismo, lalo lamang mabibigyang-sigla ang mga magsasaka upang kumilos at ipaglaban ang kanilang karapatan sa buhay at lupa. Nararapat lamang din na makihanay ang kabataan-estudyante sa mga magsasakang Novo Ecijano upang bitbitin ang kanilang mga panawagan, at makiisa sa kanilang laban. Lahat ay hinihikayat upang maging mapanuri at nakatutok sa sitwasyong kinakaharap ng Sitio Sangilo, kabilang na ng buong Nueva Ecija at Bulacan, sa kasagsagan ng pananalasa ng malagim na solar farms.
DEFEND SITIO SANGILO FARMERS AGAINST DESTRUCTIVE SOLAR FARMS!
ITIGIL ANG PANUNURO AT PANGANGAMKAM SA LUPA NG MGA MAGSASAKA!
Larawan mula sa Movement Against Destructive Solar Farms (MADSOLAR)
