Explore with Poe Ei Phyu

13/03/2026

အရမ်းကြိုက်မိတဲ့နေရာလေး 😍
ရိုက်ထားကြာပြီ အခုမှပဲတင်ဖြစ်တော့တယ်။

ဒါလတ်မှာနေရင် Day Tripသွားလည်သင့်တဲ့နေရာလေး The Florest--Location - https://maps.app.goo.gl/kYkkXtWQa3QVLyV7A--Update video အတိုလေးတွေအတွက် အမတို့ရဲ့ ဒီ TikT...

04/03/2026

သူများတွေ LV အိတ်တလုံး ရရင်ခံစားရတဲ့ ခံစားချက်က ကိုယ်တွေ မြန်မာထမင်းဟင်းအရသာစစ်စစ်၊ မုန့်ဟင်းခါးအရသာစစ်စစ် တစ်ပွဲ စားလိုက်ရတဲ့ ခံစားချက်လိုများလား 🤔

ဒီတခေါက် ထိုင်းပြန်သွားတာ မြန်မာဆိုင်တွေအတော်လေးများလာတယ်ကော။ Restaurant တွေကော ၊ grab မှာရော အများကြီးပဲ။ အကုန်စုံအောင်ပါတ်စားဖို့ ရည်ရွယ်ထားတယ် 😁

ဒီနေ့ကတော့ ခိုင်ခိုင်ကျော်မှာသွားစားတာ မြန်မာထမင်းဟင်းလည်းအရသာရှိပြီး အတော်လေးလည်းတန်တယ်။

ကိုယ်တွေကတော့ Da Latရဲ့ရာသီဥတုကိုလွမ်းပေမယ့် အခုတော့ ထိုင်းမှာပျော်နေပါပြီ

03/03/2026

# # # ထိုင်း Tourist Visa (2)လ ကိုယ်တိုင်လျောက်နည်း အသေးစိတ်

Ps. အမ ဘာservices မှမပေးပါဘူးရှင့်။ ဒီအတိုင်း ကိုယ်လျောက်ဖူးလို့ ပြန် sharing လုပ်ပေးတာပါ။ မသိတာရှိရင်တော့မေးလို့ရပါတယ် ။ အမသိသလောက် ပြောပြပေးပါမယ်နော် 🤗

- ကြာချိန် **Single Entry (၆၀) ရက် -** Working day 3-7 days (3ရက်အတွင်းရတတ်)
အကယ်၍ စာရွက်စာတမ်း အခက်အခဲရှိလျှင် သို့မဟုတ် အလုပ်များချိန်ဆိုလျှင် ၁ ပတ်မှ ၂ ပတ်အထိ ကြာမြင့်နိုင်တာကြောင့် ခရီးမသွားမီ ကြိုတင်လျှောက်ထားသင့်ပါတယ်။
- ဗီဇာကြေး - USD 40 ခန့် (E-Visa လျှောက်စဉ်မှာတင် Credit Card သို့မဟုတ် Debit Card နဲ့သာ ပေးချေရပါမယ်-VISA, Master,JCB)

# # # လိုအပ်တဲ့ စာရွက်စာတမ်းများ
(အမကတော့ ဗီယက်နမ်မှာ ၃ လ (90-day) Visa နေပြီး Vietnam ကနေလျောက်တာပါ)

ထိုင်းနိုင်ငံကို ၂ လ (60 days) Tourist E-Visa လျှောက်တဲ့အခါ လိုအပ်တဲ့ စာရွက်စာတမ်းများ
(Scan ဖတ်ပြီး Upload တင်ရမှာပါ.တင်မယ့်**File Size**တွေက 3MB ထက် မကျော်ရပါ)

- **ပတ်စပို့ (Passport):** အနည်းဆုံး သက်တမ်း ၆ လ ကျန်ရပါမယ်။
- **ဗီယက်နမ် ဗီဇာ (Vietnam Visa):** မိမိလက်ရှိ ဗီယက်နမ်မှာ နေထိုင်ခွင့်ရှိကြောင်းပြသသည့် ၃ လ ဗီဇာ ။
- **ဓာတ်ပုံ:** နောက်ခံအဖြူရောင် (Digital format- Photo size 3.5cm x 4.5cm)။
- **လေယာဉ်လက်မှတ် (Travel Booking):** ထိုင်းသို့ အသွား/အပြန် Confirmation။
- **နေထိုင်မည့်နေရာ (Proof of Accommodation):** ထိုင်းမှာတည်းခိုမယ့် ဟိုတယ်ဘိုကင် ။
- **ငွေကြေးအထောက်အထား (Proof of Funds):** ဘဏ်စာရင်းထဲတွင် အနည်းဆုံး ဘတ် ၂၀,၀၀၀ (သို့မဟုတ် ညီမျှသော USD/MMK?SGD) ရှိကြောင်းပြသရန် (Bank Statement)။

ဒါတွေအရင်စုပါ။
စုံပြီဆို ဦးဆုံး [thaievisa.go.th](https://www.thaievisa.go.th/) Websiteကို သွားပါ။။ အကောင့်မရှိရင် အကောင့်ဖွင့်ပြီး အကောင့်ရှိရင်တော့ တခါတည်းတန်းဝင်လို့ရပါပြီ

အောက်က ပုံတွေမှာ ရှင်းပြပေးထားပါတယ်
အားလုံးပဲအဆင်ပြေကြပါစေနော်

01/03/2026

ထိုင်းမှာဆို ဒါမျိုးလေးတွေကြောင့် 7/11 ရှိတဲ့နားပဲနေချင်တယ် 😁😍

01/03/2026

ဒီတခေါက် ထိုင်း immigration က စစ်ချက်ဆိုတာ supervisor ဆီပါရောက်သွားတဲ့အထိပဲ။

အရင်ကလည်း ခဏခဏသွားနေကျ အဲ့တုန်းက ဘာမှ မမေးဘူး။ အဲ့တုန်းကရက်တို ၄/၅ရက် အလည်ပေါ့။
အခုတခေါက်က ရက်ရှည် (၂)လ နေမှာ၊ ကိုယ့်ဖက်က အကုန်အစုံ ပြနိုင်၊ ပြင်ထားတယ်။ သူတို့ကလည်းအကုန်မေးတယ်။ အပြန်လေယဉ်လက်မှတ်၊ evisa အစုံပေါ့။ ဒါကထားတော့။

နောက်ထပ် ဘာတွေမေးလဲဆိုတော့ passport စာအုပ်ကြည့်ပြီး

- Cambodia ကိုဘာလို့သွားတာလဲ
- ဘာလို့ စင်ကာပူမှာအလုပ်လုပ်ပြီးပြန်တော့ ကိုယ့်နိုင်ငံကို မပြန်တာလဲ
- အခုအပြန်လက်မှတ်ကကော ဘာလို့ ကိုယ့်နိုင်ငံကိုမပြန်ပဲ Vietnam ကိုဖြတ်ထားတာလဲ
- Vietnam မှာကောဘာလို့ အကြာကြီးနေနေတာလဲ
- ဒီမှာ (၂)လတောင် ဘာလို့နေမှာလဲ
- ဒီမှာ condo ပိုင်လား
- ထိုင်းမှာဘာတွေလုပ်မှာလဲ

ကိုယ်တွေလည်း သေချာလေးပါးပ့ါးနပ်နပ်ဖြေခဲ့တယ်။
လူတိုင်းတော့မေးခံရချင်မှခံရမှာပေါ့လေ။
တကယ်လို့မေးခဲ့ရင် ဖြေနိုင်အောင် စဉ်းစားထားလို့ရတာပေါ့။ show money တွေဘာတွေတော့မပြခိုင်းဘူး။

ဒါနဲ့ immigration ဖြတ်ပြီး Grab ခေါ်တော့ အရင်လို ၅ မိနစ်လောက်စောင့်တာနဲ့မရတော့ဘူးပြီးတော့ နေရာကပြောင်းသွားပြီ။ 1st floor က Gate 4 ရဲ့ ဟိုးအပြင်ဖက်မှာ သွားစောင့်ရတယ်။ အဲ့မှာ Grab စောင့်တဲ့သူတွေနဲ့ ကားတွေနဲ့ပြည့်ညှပ် အုံခဲနေတာပဲ။ ကားခေါ်ပြီး ကားစောင့်တာ အနည်းဆဲုး (၁)နာရီကြာတယ်။ ဒါလတ်လိုအေးအေးဆေးဆေးနေရာကနေ ဟိုချီမင်းရောက်တော့
လူရှုပ်လိုက်တာလုပ်နေတာ ထိုင်းလေဆိပ် grab စောင့်တဲ့နေရာကလူအုပ်ကြီးက ပွဲစျေးမှာလျှောက်နေရသလိုဘဲ 🤧

28/02/2026

လွမ်းရအုံးမယ် Da Lat မြို့လေးရေ

ဒါလတ်ရောက်မှ Healing ဖြစ်တာတွေရော အတွေ့အကြုံသစ်တွေ ရတယ်လို့ရေးနေရုံရှိသေး နောက်ထပ် miracle လေးတခုက ထပ်ပေါ်လာပြန်ပါပြီ။ 🤗 ( အမတို့ လင်မယား၂ယောက် (၁) နှစ်လောက် မျော်လင့်နေတဲ့ ဟာလေးတခုပေါ့)

ဒါပေမယ့် ဒီကိစ္စလေးကြောင့်ပဲ Da Lat ကနေတော့ပြောင်းရတော့မယ်။ အစကတော့ ဒါလတ်မှာပဲ ၁ နှစ်လောက်နေမယ်စဉ်းစားထားတာ။ အခုတော့ကံရှိသလောက်ပဲပေါ့

26/02/2026

Da Lat မှာ ဒီ ပုဂ္ဂလိကဆေးရုံလည်း အတော်လေးသန့်ပြီး အနံလည်းမရှိသလို လူလည်းမများဘူး။ အေးဆေးပဲ။
resort လိုလို Hotel လိုလိုလေးနဲ့ ဆေးရုံလို့ကိုမထင်ရဘူး။

ဝန်ထမ်းတွေကော ဆရာဝန်တွေကပါ အေးဆေးနဲ့အတော်လေးသဘောကောင်းပြီး E လိုပြောနိုင်ကြတယ်။

စျေးကလည်းမများဘူးလို့ထင်တယ်။ ဆရာဝန်နဲ့တိုင်ပင်ပြီး ultrasound ရိုက်တာအပြီးအစီးကိုမှ VND 4 သိန်းဝန်းကျင်ပဲကျတယ်။

24/02/2026

ထိုင်း Tourist Visa လျောက်တာ ၃ရက်နဲ့ရတယ်။
ပေးရတဲ့ အချက်အလက်ကတော့ စုံစိနေရော။
လျောက်ခကတော တစ်ယောက်ကို USD 40 ကျတယ်။

လျောက်နည်းနဲ့ လိုအပ်တာတွေ နောက်နေ့မှသေချာလေး တင်ပေးမယ်နော်

22/02/2026

အရင်ကတည်းက တစ်ယောက်တည်း အေးအေးဆေးဆေး နေရတာကို ပိုသဘောကျတဲ့သူဆိုတော့ Socialize လုပ်ဖို့ သိပ်စိတ်မဝင်စားခဲ့ဘူး။ ဒါပေမဲ့ နိုင်ငံရပ်ခြားမှာ နေထိုင်ရင်း Community တစ်ခုနဲ့ ထိတွေ့လိုက်ရတဲ့အခါ ရလာတဲ့ အတွေ့အကြုံတွေက တကယ်ကို တန်ဖိုးဖြတ်လို့မရဘူးဆိုတာ နားလည်လာခဲ့တယ်။

တကယ်တော့ ကိုယ်တွေရောက်နေတဲ့ နေရာသစ်မှာ မိတ်ဆွေသစ်ဖွဲ့ဖို့နဲ့ လေ့လာစရာ နည်းလမ်းတွေ အများကြီးရှိတယ်။ ဒါကို အမတို့ကအကျင့်မရှိသေးတာကြောင့် သိပ်မသိကြတာမျိုးပဲ ရှိတာပါ။

ပြီးခဲ့တဲ့လက မထင်မှတ်ဘဲ Community ပွဲလေးတစ်ခု တက်ဖြစ်ရာကနေ Local တွေရော၊ Expats တွေနဲ့ပါ သိကျွမ်းခွင့်ရခဲ့ပြီး အမြင်သစ်တွေ အများကြီး ရလာခဲ့တယ်။ အဲ့ဒီကနေတစ်ဆင့် ကိုယ့်အတွက် Value အသစ်တွေ၊ Active ဖြစ်တဲ့ Lifestyle တွေနဲ့ မလုပ်ဖူးတာတွေကိုပါ စမ်းလုပ်ကြည့်ဖြစ်လာတယ်။ အဲ့နောက်ပိုင်း ကိုယ်တွေရဲ့ နေ့ရက်တိုင်းလိုလိုက သွားစရာ၊ လုပ်စရာတွေနဲ့ပြည့်နေခဲ့တာပေါ့။

ပြီးခဲ့တဲ့ရက်ကတော့ Da Lat ရဲ့ ရေကန်ဘေးမှာ သူငယ်ချင်းအသစ်တွေနဲ့အတူ Picnic ထွက်ရင်း အမြင်ချင်း ဖလှယ်ဖြစ်ကြတယ်။ လူတစ်ယောက်ချင်းစီမှာ မတူညီတဲ့ အတွေးအခေါ်တွေ၊ Unique ဖြစ်တဲ့ အချက်လေးတွေ ကိုယ်စီရှိကြတာကို နားထောင်ရတာ တကယ်ပဲ စိတ်လှုပ်ရှားဖို့ကောင်းသလို အမြင်လည်း ကျယ်စေတယ်။

Da Lat ကတော့ ကိုယ်တွေအတွက် Healing လည်းဖြစ်သလို အတွေ့အကြုံသစ်တွေ အမြဲပေးတဲ့ ချစ်စရာမြို့လေးပါပဲ။

21/02/2026

Da Lat မှာကိုယ်တိုင်အိမ်ရှာချင်ရင် ဒီ Facebook Group (2) ခုကနေရှာလို့ရပါတယ်နော်။
English လိုတော့ စာပို့ရပါတယ်။ ဒါပေမယ့် အခုက Gemini တို့လို AI တွေလည်းရှိနေပြီဆိုတော့ သူတို့သုံးပြီးစာရေးခိုင်းလို့ရတော့ အဆင်ပြေမှာပါ။ (scam တွေရှိနိုင်လို့သတိတော့ထားပါ။ ဒါပေမယ့် Da Lat မှာတော့ အလွန်နည်းပါတယ်)

ပြီးတော့ အိမ်ရှာမယ်ဆိုရင်အကြံပေးချင်တာက မရောက်သေးခင်အိမ်ရှာနေတာထက် ၊ ရောက်မှ ကိုယ်တိုင် လိုက်ကြည့်ပြီ အိမ်ရှာတာကပိုအဆင်ပြေပါတယ်။
ဘာလို့ဆို မရောက်ခင်က ကြိုပြောထားရင် ကိုယ်လာချိန်အဲ့အခန်းတွေရှိဖို့မသေချာပါဘူး။
Agent က ရတယ်ဘယ်လောက်ပဲပြောပြော မရတတ်တာများပါတယ်။ ရောက်မှလိုက်ကြည့်ပြီးဌားတာ ရဖို့ပိုသေချာပြီး ပိုမြန်ပါတယ်။

အိမ်ရှာလို့ရတဲ့ FB GP တွေ

https://www.facebook.com/share/g/18XG2AMGXi/

https://www.facebook.com/share/g/1ZhysTxn9H/

18/02/2026

သူ့ ရုရှားနာမည် Teresa (ထရီဇာ)၊ မြန်မာနာမည် ကဲကဲ(ကိုယ့်ဘာသာမြန်မာနာမည်ပေးထားတာ) ။
ကျွန်မရဲ့ ဝမ်းမနာသမီးလေးပေါ့ ဘာလိုဆို သူက ဘေးအခန်းက ရုရှားအန်တီကြီး မွေးထားတဲ့ ခွေးမလေးမို့လို့ 😁။
သူတို့အိမ်လာကြည့်တဲ့မနက်ကို မှတ်မိသေးတယ်။ အိမ်ရှင်ကလည်းခွေးချစ်တတ်တော့ အန်တီကြီးခွေးလေးကို မြူနေတာ လှမ်းတွေ့လိုက်သေးတယ်။
စိတ်ထဲတော့ ဒီအန်တီကြီးအိမ်ဌားရင် ခွေးချစ်တဲ့ငါတို့နဲ့တော့ ကွက်တိပဲ။ ခွေးကိုင်ရတော့မယ်လို့ တွေးပြီးပျော်နေသေးတာ။ (သေးပြီး အမွှေးရှည်တဲ့ ခွေးအမျိုးအစားတွေက်ု သိပ်မကြုက်ပေမယ့် ကိုင်ချင်တယ် သူတို့နဲ့ဆော့ချင်တယ်။)

ဒါနဲ့ပဲ အဒေါ်ကြီးအိမ်ပြောင်းလာတော့ သူခွေးကို ပထမရက်တွေက အပြင်သိပ်မလွတ်ဘူး။ လူမကြိုက်မှာစိုးလို့ထင်ပါတယ်။ ကိုယ်တွေက ကိုင်ချင်လို့ချောင်းနေတာ။ နောက်ရက်ကျ လွတ်လွတ်လာပြီး အခန်းထဲဝင်လာကော။ ဒါနဲ့ပဲ သူ့သခင်ကို ကိုယ်တွေက ခွေးလေးကိုချစ်ကြောင်းပြပြီး ဆော့ပေးတော့ နောက်ကျအဆင်ပြေသွားရော။

အခုဆို သူ့သခင်အပြင်ကပြန်လာလို့ တံခါးဖွင့်ရင် သခင်ကိုအရင်မကြိုပဲ ကိုယ်တွေ အခန်းထဲအရင်ပြေးလာလို့ သူ့သခင်ကိုတောင် မျက်နှာပူနေရသေးတယ် 😁။
အဲ့လိုအချိန်မှာ သခင်ခံစားရတဲ့ ခံစားချက်ကိုလည်းနားလည်တယ် ဘာလို့ဆို ရန်ကုန်မှာတုန်းက အိမ်မှာ ခွေးလေးတွေမွေးခဲ့ဖူးတော့ သူတို့ကို အလိုလိုက်တဲ့ အပြင်လူလာရင် သခင်ထက်ပိုချစ်ပြ၊ ကြိုပြရင် အဲ့ကောင်တွေကို ကြည့်မရတော့ဘူးလေ။ ပြီးရင်လည်းသူတို့ကို ပြောတာပေါ့ “ အေးနင်တို့က အပြင်လူပဲကောင်း ၊ သခင်ကိုတော့ ပစ်ထားလို့ “။
နောက်တော့လည်း ခံရပါများလာတော့ ဒါသူတို့ ပုံစံပဲဆိုတာနားလည်လာတော့ လက်ခံလိုက်တယ်။

အခုလည်း Teresa လေး ကိုယ့်ဆီမှာပဲနေရင်၊ ကိုယ့်ဆီပဲအရင်လာရင် သူ့ကိုလည်းပြောရတယ် “ နင့်သခင်ကနင်ကိုအမြဲစောင့်ရှောက်တဲ့သူ၊ ငါတို့က အပြင်လူ သခင်ကိုဦးစားပေး၊ သိတတ်လို့ “ သူတို့နားမလည်မှန်းသိလဲ ကိုယ်ကတော့ တတွတ်တွတ်ပြောနေတာပဲ။

ဒါနဲ့ သူ့ကိုကိုင်နေရင်းနဲ့ အခုလို ခွေးသေးသေးလေး မွေးရင်ကောင်းမလား စဉ်းစားသေးတယ်။ ခွေးမွေးရင် ငါ့ခွေးက အပြင်လူပိုခင်ရင် ငါခံစားနေရအုံးမယ် တွေးပြီး အဲ့ပြသနာတွေကင်းအောင် ကြောင်မွေးဖို့စဉ်းစာပြန်ရော။ ကြောင်ဆိုရင်တော့ သူတို့က ချေကြတော့ သခင်ကလွဲရင် ဘယ်သူမှကပ်မရတော့ဘူးလေ 🤣။

ကြောင်ဆိုလည်း မြန်မာကြောင်လို ပုံစံ အမွေးတို အမဲအကြားလေးမှလိုချင်တယ်။ ပြီးတော့ကြောင်ဆို အီးပါဖို့သဲဝယ်ပေးရအုံးမယ်။ သူများနိုင်ငံ မှာနေတော့ visa run တာတို့ အိမ်ဌားတာတို့ ကြောင် passport လုပ်တာတို့ နဲ့ အလုပ်ရှုပ်ပါတယ်ဆိုပြီး မွေးမယ့်အကြံကိုစွန့်လွတ်။
ဒါနဲ့ပဲမွေးမယ်လုပ်လိုက် သံသရာလည်လိုက်နဲ့ပဲ မမွေးဖြစ်ဘူး( သူများနိုင်ငံမှာ ခွေးတွေ၊ ကြောင်တွေ မွေးတဲ့သူတွေကို တကယ်လေးစားပါတယ်)
နောက်ဆုံးတော့
သူများခွေး​တွေပဲ guilty ဖြစ်ဖြစ်နဲ့ပဲ လိုက်ကိုင်နေပါတော့တယ်လို့ 😁။

18/02/2026

ခေါက်ဆွဲကြော်နဲ့ ထမင်းကြော်
ကြိုက်ရင် ဒီဆိုင်လေး ကောင်းတယ်။