Rajan Kailas..Poet in Malayalam

08/09/2026

പ്രളയം... 😳

08/08/2026

കവിത...

#പാതിയുടഞ്ഞൊരു_ബുദ്ധൻ
~~~~~~~~~
____ രാജൻ കൈലാസ്.

കരുമാടിയിലെ കുട്ടൻ,
പാതിയുടഞ്ഞൊരു ബുദ്ധൻ,
നൂറ്റാണ്ടുകളായ്‌ തോട്ടിൽ,ചെളിയിൽ
നിദ്രയിലാണ്ടു കിടന്നു.
ബ്രിസ്റ്റോ * യെന്നൊരു സായിപ്പല്ലോ
പൊക്കിയെടുത്തു നമുക്കായ് !
കണ്ണുമടച്ചു തപസ്സാണിന്നും
ഉള്ളിലെയുണ്മകൾ തേടി,
മെലിഞ്ഞു കറുത്തൊരു
മെയ്യിൽ, മുഖത്തും
സൂര്യനുദിച്ചേ നിൽപ്പൂ...
തൊഴുതൂ ഞാനും മുന്നിലിരുന്നൂ
എന്നിലെയെന്നെത്തേടി...
മൗനച്ചിരിയാലെന്നോടോതി
'ഞാനും നീയുമിതൊന്നേ!'
ഇടതുവശം പോയെങ്കിലുമെന്നിൽ
ഹൃദയമിടിപ്പുണ്ടിന്നും.
ഒരുനാളെന്നെ തല്ലിയുടച്ചവർ
നിന്നെത്തേടിയുമെത്തും!
'കരുതലിൽ നിന്നെക്കാക്കുക നിത്യം '
പുതുയുഗബുദ്ധൻ ചൊല്ലി.
കണ്ണുകൾ രണ്ടുമടച്ചൂ ഞാനും
മെയ്യില്ലാത്തവനായി,
എന്നുടെയുള്ളിന്നുള്ളിലുമൊരു ചെറു
ബോധസ്സൂര്യനുദിച്ചൂ....
ആയിരമർക്കകരങ്ങളിലെന്നെ
കോരിയെടുത്തൂ ബുദ്ധൻ!

__________________

*റോബർട്ട് ബ്രിസ്റ്റോ...
ഈ പ്രതിമ തോട്ടിൽ നിന്നും കണ്ടെടുത്ത ബ്രിട്ടീഷ് എഞ്ചിനീയർ.

______________________________
രാജൻ കൈലാസ്
(എഴുത്ത് മാസിക.
2026 ഓഗസ്റ്റ് )

07/21/2026

#കവിത..
#മണ്ണക്ഷരങ്ങൾ
രാജൻ കൈലാസ്
(ഭാഷാപോഷിണി.. മെയ്‌ 2026)
ശബ്ദം...ലേഖ അനിൽ, പെരുന്തട്ട.

07/09/2026

#മാവുപൂക്കാത്ത_കാലം
https://dcbookstore.com/books/mavu-pookkathakalam
ഓൺലൈൻ ആയി വാങ്ങാൻ പ്രിയപ്പെട്ടവർ
ഈ ലിങ്ക് ഉപയോഗിക്കുമല്ലോ ❤️

07/06/2026

കവിത.. #ജലം
#ഗീതശ്രീകുമാർ ചൊല്ലുന്നു ❤️👌🏻
നന്ദി.. സ്നേഹം.. പ്രിയ ഗീതാ...

06/23/2026

കവിത

#ജലം
______
ജലത്തിൽ ജീവനാരംഭം
ജലം ജീവിത സഞ്ചയം
ജലത്തിൽ മൽസ്യമായ് വന്നു..
ജഗദീശ്വര സൗഭഗം!

ജലം പുണ്യാഹമാകുന്നു
പുഴ ദേവിയും അമ്മയും
മക്കൾ തൻ പാപകോപങ്ങൾ
ഏറ്റു വാങ്ങി വരണ്ടവൾ

ജലത്തെ വിഷമാക്കുമ്പോൾ
നിലയ്ക്കും ശിശു ജന്മങ്ങൾ...
കുലമാകെയൊടുക്കീടും
മഹാ ശാപവിനാശനം..!!

വേനലിൽ ഭൂമി നീറുമ്പോൾ
നീരദം വർഷമാകുന്നു
ജലവും സൂര്യനും ചേർന്നേ
മുള പൊട്ടുന്നു ജിവിതം..!!

ജലപീരങ്കിയെന്നൊന്നു
കേട്ട ഞെട്ടലിലാണു ഞാൻ ജീവനാം ജലമങ്ങനെ മാരകായുധമായിടും?

ചീറുന്ന വെടിയുണ്ട പോൽ
ജലം ജീവനെ നേരിടും
ജലം തുള്ളിയിറക്കാതെ
ജലം കൊണ്ടു മരിച്ചിട്ടും!

ജീവനാം ജലപുണ്യത്തെ
ജീവഹത്യയ്ക്കെടുക്കുകിൽ
ജലം ഹേതു മഹായുദ്ധം
മർത്ത്യനാശം,മഹാന്തകം!

2.

ചന്ദ്രനിൽ ജലമുണ്ടെങ്കിൽ
ജീവനുണ്ടെന്ന സംശയം!
ഭൂമിയിൽ ജീവനുണ്ടെങ്കിൽ
ജലമുണ്ടെന്ന സംശയം..!!

**************
__രാജൻകൈലാസ്.

06/19/2026

06/19/2026

വായനാദിനത്തിൽ....
#അക്ഷരപ്പാലം