25/08/2026
عالسلامة متتبعينا الكل في الرحالة ، اليوم نحب نحكيلكم شوية على موضوع مهم برشا في هالفترة، السخانة الكبيرة إلي عايشينها.⚠️🌡 كل عام في الصيف للأسف نشوفو حالات ضربة شمس وجفاف، وأغلبها كان ممكن نتفاداوها بشوية احتياطات بسيطة.🙏
أول حاجة احنا الكبار؛🫡🤔
مافيها باش نردّوا بالنا على رواحنا، مايلزمش السهو على الماء، و لازم نشربو حتى قبل ما نحسو بالعطش، و نحاولو نبعدو على القهوة والمشروبات الغازية لأنهم يزيدو في الجفاف موش يعاونو فيه. ووقت الظهر، من 11 للـ 16، نحاولو ما نخرجوش إلا للضرورة، الشمس في هالوقت تكون في أوجها، ننصحوا بعضنا زادة بلبسة خفيفة وفاتحة، القطن أحسن حاجة يخلي الجسم يتنفس. 👌
توا نجيو للصغار، و اللي هوما الأكثر عرضة للخطر؛👶🙏
حاجة أساسية برشا ونحب نأكد عليها، ما تخليوش الأطفال في الكرهبة أبدا، حتى دقيقتين. الحرارة وسط الكرهبة تطلع بسرعة رهيبة و خانقة وممكن تكون خطيرة على حياتهم. خلوهم يشربو بكثرة وراقبوهم مليح، لأن جسمهم ما يعرفش يتأقلم بسرعة كيف الكبار.
الرضاعة الطبيعية أو الحليب الاصطناعي يبقى كافي للرضع الصغار تحت 6 أشهر، ما تزيدوش ماء زيادة على الرضاعة إلا إذا الطبيب قالكم بيها. أما الأطفال الأكبر، خليوهم يشربو ماء بانتظام حتى لو ما طلبوش، لأن الصغار أحيانا ما يحسوش بالعطش قبل ما يوصلو للجفاف.
راقبو علامات التعب عندهم: بكاء بلا دموع، فم يابس، تبول قليل، أو خمول غير عادي، هاذي كلها علامات تحذيرية تستوجب تبريد فوري وربما زيارة طبيب. وقت النوم، خلو الغرفة متهوية ومظلمة شوية، وتفادوا الأغطية الثقيلة عليهم بالليل.
وما ننسوش أصحابنا الحيوانات؛🦮🙏
الكلب أو القط متاعكم يحتاج ماء طول الوقت. وإذا حبيتو تمشيو بيه، تفادوا الزفت والرصيف وقت الظهر، خاطر الأرض تكون سخونة برشا وتحرقلهم رجليهم. الصباح الباكر أو بعد الغروب أحسن وقت للخرجة معاهم.
في الأخير، إذا حسيتو بدوخة، صداع، أو جلدكم ولى سخون وبلا عرق، ما تستهينوش بيها، هذه علامات ضربة شمس ولازم تبريد فوري وتتصلو بطبيب.
و ربي يحمي و يحفظ الجميع.🩷🌸✅️
