09/08/2025
الحقيقه المُرّة في Pack Mariage Salle des fêtes
السمسرة في خدمة التصوير والفرق و السرفارات
الو؟ شكري ؟
أنا: آلو، وي، مرحبا تفضل.
هو: أنا فلان الفلاني، سمسار حفلات صاحب salle des fêtes ### (معروفة) أكيد راك تعرفها. شفت خدمتك على Facebook وخدمتك عجبَتني، و عندي ليك offre فرصة العمر!!
أنا: تفضل، هاني نسمع فيك
(وفي داخلي: كنت متوقّع شنو باش يقول... خاطر تقريبا كل saison تجيني 3 ولا 4 عروض من النوع هذا. تظاهرت بالاهتمام.)
هو: عنا إن شاء الله أكثر من 40 soirée في saison هاذي. وحبّينا نوفر كل شيء للعرايس: serveurs, décor, الفرقة... والمصور! وهيك علاش حبّيناك تكون معانا..وكيف ما يقولوا: "الماء ماشي للسدرة، الزيتونة أولى بيه".
أنا: كيفاش؟ فسرلي...
هو بنبرة فيها ثقة واستهزاء: يعني pack كامل وانتي ما عليك كان تجي وتصور، والبقي علينا ..نحسبوا service photo + vidéo بـ600 دينار، نعطيوك 480، وناخذوا 120 دينار.
جاوبت وأنا مصدوم من سوم اللي يحكي عليه ما يخلصش حتى في عيد ميلاد ! : أي.. أما أنا مش ديما فاضي، عندي des dates محجوزة وفي العاده في خدمه نحب قبل العرايس نحكي معهم في التفاصيل.
جاوبني وكأنه يعطي درس: ما فما حتى مشكل اعمل كيما اللي كان يخدم معانا قبل جيب زوج stagiaires يلبسوا t-shirt مكتوب عليهم Labidi photograf وانت ما يلزمكش تحضر. أحنا كان يخدم معانا فلان الفلاني... (سَمّى اسم مصوّر نعرفه) أمـــا كرشو كبرت ولا يحب الزيادة ... واسمعني مليح ماكش باش تحط لوغو، ماكش باش تهبط التصاور وما عندك حتى علاقة بالكليونت... نخلصوك نهار التصوير، وتهنّى...
بصراحه حاجه توجع ملا مستواه وصلنا له ملا قله احترام للمهنه اما حبيت نقطع المكالمه بطريقه لايقه
: قلتله، "اعطيني أيام نفكر ونرجعلك".
كلمت صديقة باش تتصل بيه بعد أيام كأنها عروسة. طلبت منه تفاصيل Pack Mariage. بعثتلّي screenshot فيه les prix: Packs تبدأ من 8 ملايين، والمصوّر محسوب أقل حاجة بـ1000 دينار!
يعني صاحبنا هذا، ياخو من عند المصوّر 120 د، ويبيع للعرايس بـسوم خيالي د. يربح أقل حاجة 500دينار على كل عرس في التصويرخلي الباقي!؟
نعرف كلامي باش يغيّض برشة ناس والبعض باش يقول "ما تعممش"، "مش الكل كيف بعضهم"... واكيد المستفيدين بش يدافعوا على العقليه هذه! ومن توا باش نقول لك كان :
📍 انت سمسار و صاحب salle des fêtes تعرف أنو بيع مشروط ممنوع قانونياً.
ومستحيل باش تقنعني انك تقدم في servies هذا بلاش اكيد باش تربح حاجه واكيد باش تَسمسر وتستفيد .
📍 ولا انت ولد دومان ( سامحنيما نجمش نقول عليك مصور):
*يا تخدم في noir وما عندكش studio، ووبالطبيعه الوضعيه هذه تساعدك خاصه كي تبدا موظف تدبر في راسك على حساب مصورين الصحاح !!
*يا Amateur تتعلّم الصنعة في عرايس الناس وتدبر في مصروفك.
*يا عندك studio وتخلي équipe 2em تخدم في les salles وهذه الطعمه الكبرى على خاطرك قاعد تدمر في دومين وتقطع في ارزاق زملائك بالاسوام هذه مستحيل انك تنجم تخدم حاجه فيها جوده وفي الاخر انت باش تخسر وباش تخسر الناس الكل معك
📌 بالنسبة للعرائس نحب نوضحلكم حاج في كلمتين:
باش تدفعوا أكثر من حق الخدمة، وفي الآخر تاخذوا حاجة عادية ولا حتّى أقل من العادي… والأخطر من هكا باش تضيعوا ذكريات أهم نهار في حياتكم وتخسروا حقكم الطبيعي في إنّكم تختاروا. أصحاب Pack Mariage هذا يتعاملوا معاكم كيما السلعة: همّا يطبخوا، وأنتوما تاكلوا وتسكتوا !!
أنا حكيت من باب الغيرة عالـ domaine ومن حرصي على مصلحة الناس الكل، خاطر الـ Pack Mariage هذي ما هيش في صالح لا الـ photographes لا حتى العرائس.. أنا حكيت الواقع ومن تجربتي، وأي حد عندو ريى آخر يتفضل مرحبا... يتبع
منقول
