17/03/2026
ဘဝမှာ "သစ္စာရှိတယ်" ဆိုတဲ့ စကားလုံးကို လူတိုင်း လွယ်လွယ်ကူကူ ပြောလေ့ရှိကြပါတယ်။ ဒါပေမဲ့ တကယ့်သစ္စာတရားဆိုတာ အဆင်ပြေနေချိန်၊ ပျော်ရွှင်နေချိန်မှာ တိုင်းတာရတာ မဟုတ်ပါဘူး။ အခြေအနေတွေ ဆိုးရွားလာတဲ့အခါ၊ အထူးသဖြင့် "ဒေါသထွက်လာတဲ့အခါ" မင်းရဲ့ အပြုအမူတွေက ဘယ်လိုရှိသလဲဆိုတာကမှ မင်းရဲ့ သစ္စာတရားကို စစ်ဆေးတဲ့ အစစ်ဆေးခံလွှာပဲ ဖြစ်ပါတယ်။
လူအတော်များများက "ငါ ဒေါသထွက်သွားလို့ လုပ်မိတာပါ" ၊ "စိတ်တိုနေလို့ ပြောမိတာပါ" ဆိုတဲ့ ဆင်ခြေတွေကို အသုံးချတတ်ကြပါတယ်။ ဒါပေမဲ့ လက်တွေ့မှာတော့ ဒေါသဆိုတာ မင်းရဲ့ ရင်ထဲမှာ ကိန်းအောင်းနေတဲ့ "ဗီဇအစစ်" ကို အပြင်ထုတ်ပေးလိုက်တဲ့ အရှိန်အဟုန်တစ်ခုပါပဲ။ ဒေါသထွက်လာလို့ တစ်ဖက်လူကို သစ္စာဖောက်တာ၊ ဒုက္ခပေးတာ ဒါမှမဟုတ် ကျောခိုင်းသွားတာမျိုးဟာ ဒေါသကြောင့် ဖြစ်လာတာမဟုတ်ဘဲ မင်းရဲ့ စိတ်ထဲမှာ အဲဒီလိုလုပ်ဖို့ အစီအစဉ် ရှိနေပြီးသားမို့လို့ပဲ ဖြစ်ပါတယ်။
မင်းရဲ့ သစ္စာတရားက အခြေအနေကောင်းမှ၊ စိတ်ချမ်းသာမှ ရှိတာမျိုးဆိုရင် အဲဒါကို "သစ္စာ" လို့ မခေါ်ပါဘူး။ အဲဒါကို "အခွင့်အရေးယူခြင်း" လို့ပဲ ခေါ်ပါတယ်။ စစ်မှန်တဲ့ သစ္စာရှိသူဟာ တစ်ဖက်လူအပေါ် ဘယ်လောက်ပဲ စိတ်ဆိုးနေပါစေ၊ ဘယ်လောက်ပဲ ဒေါသထွက်နေပါစေ"သစ္စာဖောက်ခြင်း" ဆိုတဲ့ လမ်းကြောင်းကိုတော့ ဘယ်တော့မှ ရွေးချယ်မှာ မဟုတ်ပါဘူး။ ဒေါသကြောင့် သစ္စာဖောက်မိတယ်ဆိုရင် မင်းဟာ အစကတည်းက သစ္စာရှိခဲ့သူ မဟုတ်တာ သေချာပါတယ်။
ရင့်ကျက်တဲ့သူတွေဟာ သူတို့ရဲ့ "ခံစားချက်" ထက် သူတို့ရဲ့ "မူဝါဒ" ကို ပိုပြီး တန်ဖိုးထားကြပါတယ်။ စိတ်ဆိုးရင် ရန်ဖြစ်မယ်၊ ငြင်းခုံမယ်၊ လမ်းခွဲမယ်ဒါတွေက သဘာဝကျပါတယ်။ ဒါပေမဲ့ "သစ္စာဖောက်ဖျက်ခြင်း" ကတော့ မင်းရဲ့ လူသားတန်ဖိုးကို ဖျက်ဆီးပစ်တာဗျ။ ဒေါသနောက်ကို လိုက်ပြီး သစ္စာမဲ့တဲ့ အလုပ်တွေကို လုပ်မိသူတိုင်းဟာ သူတို့ကိုယ်သူတို့ ဘယ်လောက်ပဲ ဆင်ခြေပေးပါစေ၊ သူတို့ရဲ့ စိတ်ဓာတ်ဟာ အစကတည်းက ယိုင်နဲ့နေခဲ့တာပဲ ဖြစ်ပါတယ်။
ဘဝမှာ "သစ္စာရှိသူ" လို့ အမွှမ်းတင်မခံခင်၊ မင်း စိတ်အဆိုးဆုံး အချိန်မှာ မင်း ဘာတွေလုပ်တတ်သလဲဆိုတာကို အရင်ပြန်ကြည့်လိုက်စမ်းပါ။ ဒေါသက မင်းကို သစ္စာမဲ့စေတယ်ဆိုရင် မင်းဟာ သစ္စာတရားရဲ့ တန်ဖိုးကို နားမလည်သေးသူသာ ဖြစ်ပါတယ်။ "စစ်မှန်တဲ့ သစ္စာတရားဆိုတာ မုန်တိုင်းထန်နေတဲ့ အချိန်မှာတောင် ခိုင်မြဲနေတဲ့ ကျောက်ဆောင်တစ်ခုလိုပဲ ဖြစ်ရပါမယ်"။
