22/06/2026
حنضل مسـ ـموم
بيت مرشوش بموية الوجع طينو مبلول بالحنين، راكوبة صغيرة كانت ضل من الهجير، من الدقش لهب الشاي والزلابية البحرق الحزن حريق، صوت الطيور وكتين تصلي على الرسول، ونشيد العلم يهز القش والحصير، بعد المغيرب وقف النذير ينادي فطين:
يا نوارة الفريق وست الكل، بكورك ليك إلا الحِسيس بالحيل شين، علك طيبة والشفع كويسين، نسيت أقولك إنو ولدك البشير سافر البندر قال بدور يبقى شيتًا كبير، يصلح الفريق، يجيبلنا كهرباء وموية نضيفة ما زي موية الترعة والحفير، وأريتك أكان شوفتي حسين كبر لمن عمل دقنًا طويل، ختم القرآن الكريم وعملولو احتفال بشيخ نورين، وبت النذير الوحيدة شايلة ملامحك إلا أصغر منك حبتين، نفس الخديدات والخشيم، المشي، صوتك حتى الضحك ياها إتي، مافي شك.
وريتك أنا؟
أمس رسل لي البشير كوم جرايد ومناديل ببرد بالجرايد جـ ـرحًا غريق، وبمسح بالمنديل دميعات سالت غصب، هسي بدور أكتبلو الجواب أقولو بدور لي مـ ـصيبة كده بتتلبس فوق العيون، بتقرب البعيد يمكن ألمحِك مع إنو العوينات أمرضها البكا، بقت شايلة ذي السحاب مطرًا كتير.
نسيت أقولك برضو ولد...
_ يا أبوي بتكلم منو!
ماك كبير عشان نقول خرفتَ شن شايف ونحن ما شايفين؟
-يا بنية هوي مالك معاي؟
بنضم مع أمك والتوأم السمحين، شوفي السكوت، اتعلمي حسك بالحيل سنين.
ردت بصوتًا حزين:
_ يا يابا أمي والتوأم عند الغفور الرحيم، استغفر الله أنت زولًا فاهم أمور الدنيا والدين.
كلامها بـ ـتر جناحات الأمل، طفا آخر شعاع منور طريق النذير، لملم فوانيس العشم طفا شمعتا، قبل على سرير فطين، بعديها ما نطق، أظن الكلام وقف في حلقو وخنق.
#سونا
#آيســـــــــــــــــــل
