03/08/2026
,,३३ दिनकी छोरीलाई आमाको काख नपुग्दै वेदनाको दुःखद् अन्त्य।
झिम्रुक गाउँपालिका–२, गडेरपानी निवासी २३ वर्षीया वेदना थापा अब हामीमाझ रहनुभएन। केही दिनअघि मात्रै ३३ दिनकी छोरीलाई जन्म दिनुभएकी वेदना उपचारका लागि जाने क्रममा झिम्रुक गाउँपालिका–५, ढाँडा बजारबाट बिहान करिब ७ः३० बजे सम्पर्कविहीन हुनुभएको थियो।
परिवार, आफन्तजन र स्थानीयको निरन्तर खोजीका बाबजुद उहाँलाई सम्भावित सबै स्थानमा खोज्दा पनि तत्काल फेला पार्न सकिएको थिएन। अन्ततः झिम्रुक–५ र झिम्रुक–७ को सीमाना क्षेत्रमा पर्ने खोलाको ठूलो ढुङ्गामुनि कोपेरामा उहाँ मृत अवस्थामा फेला पर्नुभएको छ।
आमाको काखमा रमाउने, आमाको दूधको न्यानोपन पाउने उमेरकी ३३ दिनकी अबोध छोरीले आमाको माया नपाउँदै आमालाई गुमाएकी छन्। यति सानी छोरीलाई अब कसरी हुर्काउने भन्ने पीडाले श्रीमान् दिपाल थापाको आँखामा आँसु र मनमा गहिरो पीडा छ।
वेदनाको स्वास्थ्यमा केही समयदेखि समस्या देखिएपछि श्रीमान्–श्रीमतीबीचको सल्लाहमै उपचारका लागि अस्पताल गएर स्वास्थ्य जाँच गराउन उहाँ घरबाट निस्कनुभएको परिवारले जनाएको छ। तर, नियतिले यति कठोर मोड ल्यायो कि उपचारका लागि हिँडेकी वेदना कहिल्यै घर फर्किनुभएन।
वेदनाको खोजीकार्यमा बिहानैदेखि इलाका प्रहरी कार्यालय ओखरकोट, मच्छीका प्रमुख असई निर्दोष जिसीको नेतृत्वमा प्रहरी टोली खटिएको थियो। आफन्तजन, स्थानीयवासी लगायतले समेत सम्भावित स्थानहरूमा निरन्तर खोजी गर्नुभएको थियो।
यस दुःखद् घटनामा झिम्रुक गाउँपालिका अध्यक्ष पीतबहादुर महतरा क्षेत्रीलाई घटनाबारे जानकारी गराएपछि उहाँले समेत तत्काल सहजीकरण गर्नुभएको छ। स्वास्थ्य चौकीबाट स्ट्रेचरको व्यवस्था, गाउँपालिकाबाट सवारीसाधनको व्यवस्था लगायत आवश्यक सहयोग उपलब्ध गराइएको छ। झिम्रुक–२ का वडा अध्यक्ष कृष्ण पोखरेलज्यूले पनि सहजीकरण गरिदिनुभएको छ तथा झिम्रुक–७ का वडा अध्यक्ष कृष्ण जिसी लगायतको उपस्थितिमा उद्धार तथा व्यवस्थापनको कार्य अघि बढाइएको छ।
हाल मृत शरीरको मुचुल्का उठाउन जिल्लाबाट टोली घटनास्थलमा पुगेको छ भने पोस्टमार्टमका लागि जिल्ला अस्पताल लैजाने प्रक्रिया अघि बढिरहेको छ।
यस दुःखद् घडीमा खोजीकार्यमा प्रत्यक्ष तथा अप्रत्यक्ष रूपमा सहयोग गर्नुहुने सम्पूर्ण आफन्तजन, स्थानीयवासी, प्रहरी टोली, जनप्रतिनिधि तथा सहयोगी मनहरूप्रति हार्दिक आभार व्यक्त गर्दछौँ।
विशेषगरी विपद् तथा दुःखद् घटनाका बेला स्ट्यान्डबाइमा रहेर तत्काल सहयोग गर्ने झिम्रुक गाउँपालिका र गाउँपालिका अध्यक्ष पीतबहादुर महतरा क्षेत्रीप्रति धन्यवाद व्यक्त गर्दछौँ। जनताको दुःख र अप्ठ्यारोमा आज देखिएको यही सक्रियता आगामी दिनमा पनि निरन्तर रहोस् भन्ने अपेक्षा गर्दछौँ।
३३ दिनकी अबोध छोरीले आमाको काख गुमाएको यो पीडादायी क्षणमा वेदना थापाप्रति भावपूर्ण श्रद्धाञ्जली।
शोकसन्तप्त परिवारजनमा हार्दिक समवेदना। 🕯️🙏
