12/09/2025
Adyé ✨mi partaz sanm zot in morso in fonnkèr i rakont mon lanfans dann Sinlé sanm mon mami èk mon papi. La mi rakont nout bann labitude sanm papi… Sat i koné amwin i koné mwin la grandi sanm banna ❤️
Zordi i fé witan mi viv koté papi é sé in bénédiksyon…95 zan li néna é mwin lé byin kontan li lé ankor an form🙏🏾🙏🏾🙏🏾
Épisa, kinm mami fine alé…souvnans la rès la minm✨✨✨✨
(…)Ral amwin ankor dann pousèt si bordrout Granfon,
Alon rod bagas sanm manzé zanimo kopèrativ zaviron,
Manzé Mami pokor kwi , nou na ankor lo tan
Trap inn ti po mayonèz la kaz Madam Rolan Lami
sanm ton mitsubitsi Batkaré la o dann létan
Fine ariv lèr, Madam Anaye i atann anou koté la stasion pou alé la mès légliz la salèt
Aprésa na monte la o piton, port in morso paté kréol po Zan-Klod, li va done in bout fromaz dé tèt
Kan onzèr fini soné, fèrm dolo dann tiyou kaoutsou
Foursèt i sa santé, nout bous i fé dlo po Roti por Mami sanm son kari shoushou
Aspèr laprèmidi po mont si dli ropoz in pé
Amwin dann la kour mi zwé kashièt sanm mon mazinasyon
Kan la fine byin dormi , saplé la priyèr i mann zis po èt gréné
Kri amwin talèr po binyé, lo ti mamzèl fini ariv nwar an krouton (…)
Nadfwa mi mazine mwin noré zwé ankor lou kashièt
Dann tan davan po oubli la réalité
Riskab mwin noré swazi dann tan katrovindisèt
Mwin navé witan, ou navé tout out bann nwit pou rèvé
Pli nou sa va, pli léto la mor i arfèrm dési ou
Swasant an rant nou
Kan mwin lé mwatié vivan ou fine mwatié vantanlèr
Mon bann larm lé amèr
Mon bann mo na pi dgou
Akoz nou mor apré la vi,
Akoz bondyé la pa mèt sa alanvèr?
In zour, dann bèr la mor
Kan va alonz aou dann la fos
Pa bezwin ou plèr, aou dor
Antèr mon kèr sanm ou an mouswar dpos (…)
#974
