SAYA

06/09/2026

ایک شخص نے اپنی بیوی سے کہا:

"اگر کوئی مرغیاں خریدنے آئے تو اسے بیچ دینا۔"

بیوی نے کہا: "ٹھیک ہے۔"

کچھ دیر بعد ایک چالاک آدمی آیا اور بولا:

"اماں! مرغیاں بیچو گی؟"

بیوی نے کہا: "ہاں، سات ریال کی ایک۔"

وہ بولا:

"اچھا، مجھے چھ مرغیاں دے دو، اور ساتویں مرغی تمہارے پاس رہن رکھ دیتا ہوں۔ کل آ کر تمہیں پورے پیسے دے دوں گا۔"

بیوی مان گئی اور اسے مرغیاں دے دیں!

جب شوہر واپس آیا تو بیوی نے اسے سارا قصہ سنایا۔

شوہر بہت ناراض ہوا اور غصے میں بولا:

"میں اللہ کی زمین میں نکل رہا ہوں۔ اگر مجھے تم سے بھی زیادہ بے وقوف کوئی شخص مل گیا تو تمہیں چھوڑ دوں گا، ورنہ تمہیں طلاق ہے!"

یہ کہہ کر وہ چل پڑا۔

رات ہوئی تو وہ ایک قبرستان میں، گاؤں کے شیخ کے گھر کے پاس جا کر سو گیا۔

صبح شیخ کی بیوی نے اسے قبرستان سے نکلتے دیکھا تو حیرت سے پوچھا:

"تم کہاں سے نکل رہے ہو؟ کیا قبرستان سے؟"

اس نے کہا:

"ہاں!"

وہ بولی:

"خدا کے لیے مجھے بتاؤ، وہاں میرے ابو اور امی کا کیا حال ہے؟"

وہ چالاک آدمی بولا:

"اللہ کی قسم، دونوں خیریت سے ہیں۔ بس تمہارے ابو نے تمہاری امی کے ہوتے ہوئے دوسری شادی کر لی ہے۔ نئی دلہن والے بہت امیر اور خوش حال لوگ ہیں۔ انہوں نے اسے سونا اور نئے کپڑے دیے ہیں، جبکہ تمہاری بیچاری ماں کے پاس کچھ بھی نہیں!"

شیخ کی بیوی غصے سے بولی:

"کیا تم دوبارہ قبرستان جا رہے ہو؟"

اس نے کہا:

"ہاں۔"

وہ بولی:

"ذرا ایک لمحہ رکو!"

وہ اندر گئی، اپنا سارا سونا اور بہترین کپڑے نکال لائی اور اس کے حوالے کرتے ہوئے بولی:

"خدا کے لیے یہ سب میری ماں کو دے دینا، تاکہ وہ اس کتیا کی بیٹی کے سامنے یہ پہن سکے!"

اس نے کہا:

"ضرور، کوئی مسئلہ نہیں!"

اور سامان لے کر فوراً وہاں سے چل دیا۔

کچھ دیر بعد شیخ گھر واپس آیا تو اس کی بیوی نے اسے سارا واقعہ سنایا۔

شیخ نے افسوس سے اپنے ہاتھ پر ہاتھ مارا اور بولا:

"ارے ہبلا! تمہیں اس نے بے وقوف بنا دیا! لیکن خدا کی قسم، وہ میرے ہاتھ سے نہیں بچ سکتا!"

وہ اپنے گھوڑے پر سوار ہوا اور اس چالاک آدمی کے پیچھے چل پڑا۔

ادھر چالاک آدمی کو محسوس ہوا کہ شیخ اس کا پیچھا کر رہا ہے۔ راستے میں اسے ایک گنجے چرواہے کے ساتھ بھیڑیں چراتا ہوا ملا۔

اس نے چرواہے سے کہا:

"اپنی جان بچاؤ! شیخ فلاں ہر گنجے آدمی کو ڈھونڈ رہا ہے۔ وہ ان کے سروں سے ٹماٹر کوٹنے کے لیے مدق بنانا چاہتا ہے! تم پہاڑ کی طرف بھاگ جاؤ، میں تمہاری بھیڑوں کی دیکھ بھال کرتا ہوں، جب تک تم واپس آؤ۔"

بیچارہ چرواہا اس کی بات پر یقین کر گیا، پہاڑ کی طرف بھاگ گیا اور اپنی ساری بھیڑیں اس کے حوالے کر گیا۔

کچھ دیر بعد شیخ وہاں پہنچا اور اس چالاک آدمی کو بھیڑوں کے ساتھ کھڑا دیکھا۔

شیخ نے پوچھا:

"اے چرواہے! کیا تم نے یہاں سے ایک آدمی کو سامان اٹھائے ہوئے گزرتے دیکھا ہے؟"

چالاک آدمی نے کہا:

"ہاں، ابھی ابھی ایک آدمی بھاگتا ہوا آیا تھا اور پہاڑ پر چڑھ گیا۔ لیکن آپ اس کے پیچھے کیوں پڑے ہیں؟"

شیخ نے کہا:

"وہ چور ہے!"

چالاک آدمی فوراً بولا:

"اچھا، تو اپنا گھوڑا میرے پاس چھوڑ دو۔ میں اسے پکڑ کر لاتا ہوں۔ گھوڑا پہاڑ پر تو چڑھ نہیں سکتا نا!"

شیخ نے اس کی بات پر بھی یقین کر لیا، گھوڑا اس کے پاس چھوڑا اور خود پہاڑ کی طرف دوڑ پڑا۔

جب وہ پہاڑ کی چوٹی پر پہنچا تو وہاں اسے وہی اصل گنجا چرواہا ملا!

چرواہے نے شیخ کو دیکھا تو ایک پتھر اٹھایا، اپنے سر پر مارنے لگا اور روتے ہوئے کہنے لگا:

"نہ میرے لیے... نہ تمہارے لیے... نہ ٹماٹروں کے لیے!"

شیخ نے حیرت سے پوچھا:

"ارے بھائی! تمہیں کیا ہوا ہے؟!"

چرواہے نے اسے ساری کہانی سنائی۔

شیخ ہنس پڑا اور بولا:

"ڈرنے کی کوئی بات نہیں، وہ آدمی تم سے جھوٹ بول گیا ہے!"

شیخ فوراً پہاڑ سے نیچے اترا اور اپنا گھوڑا تلاش کرنے لگا۔

جب وہ نیچے پہنچا تو دیکھا کہ چالاک آدمی اس کے گھوڑے پر سوار ہو چکا تھا، بھیڑیں بھی ہانک کر لے جا رہا تھا اور وہاں سے فرار ہو چکا تھا!

شیخ نے بے بسی سے چرواہے کی طرف دیکھا اور بولا:

"چلو! اس نے مجھے بھی بے وقوف بنا دیا، تمہیں بھی، اور میری بیوی کو بھی!"

شیخ ٹوٹے دل کے ساتھ گھر واپس آیا۔

گھر پہنچتے ہی اس کی بیوی نے بے تابی سے پوچھا:

"مل گیا وہ آدمی؟ اور کیا تمہیں یقین ہوگیا کہ وہ سچ بول رہا تھا یا جھوٹ؟"

شیخ نے اپنا سر کھجایا۔ وہ سوچنے لگا کہ کیا جواب دے۔

دل میں کہنے لگا:

"کیا اسے بتاؤں کہ اس کم بخت نے مجھے بھی بے وقوف بنا دیا، میرا گھوڑا اور ساری بھیڑیں بھی لے گیا؟!"

02/09/2026

اس پاکستانی نوٹ کو غور سے دیکھیں... اس میں صرف رقم نہیں، ایک پوری قوم کی عزت اور پھر اس کے زوال کی داستان چھپی ہوئی ہے!
یہ نوٹ اس سنہرے دور کی یاد ہے جب ملک پاکستان اپنے حاجیوں کیلئے یہ اسپیشل نوٹ چھاپتا تھا اور اس نوٹ کو سعودی عرب میں تسلیم ہی نہیں بلکہ ایسے ہاتھوں ہاتھ لیا جاتا تھا جیسے آج پاکستان میں ڈالر کی اہمیت ہے .
یہ اُس پاکستان کی یادگار ہے جو کبھی اپنے شہریوں، اپنے حاجیوں اور اپنی کرنسی کے وقار کے لیے خصوصی انتظام کیا کرتا تھا۔
مئی 1950 میں پاکستان نے اپنے حاجیوں کے لیے خصوصی حج نوٹ جاری کرنے کا سلسلہ شروع کیا۔ اس زمانے میں پاکستان کا روپیہ عام طور پر بیرونِ ملک لے جانے پر پابندیاں تھیں، اس لیے حکومت نے حجاج کی سہولت کے لیے خاص نوٹ جاری کیے۔ ان نوٹوں پر واضح طور پر درج ہوتا تھا کہ یہ پاکستانی حاجیوں کے لیے سعودی عرب میں استعمال کے لیے ہیں۔
پہلا خصوصی 100 روپے کا حج نوٹ 1950 میں جاری کیا گیا۔
پھر 1951 میں 10 روپے کا حج نوٹ بھی جاری ہوا۔
یہ صرف کاغذ کے ٹکڑے نہیں تھے۔
یہ اس بات کی علامت تھے کہ ایک نوآموز ملک، جسے وجود میں آئے چند ہی سال ہوئے تھے، اپنے حاجیوں کی ضروریات اور اپنی قومی کرنسی کی عزت کے لیے ایک خاص نظام رکھتا تھا۔
پھر وقت بدلا، نوٹوں کی نئی سیریز آئیں۔
1972 میں نئی حج نوٹ سیریز جاری ہوئی۔
اس کے بعد 1975 سے 1978 کے درمیان بھی نئے ڈیزائنوں کے ساتھ حج نوٹ جاری کیے گئے۔
یعنی 1950 سے 1978 تک پاکستان کے حج نوٹوں کا یہ دور ایک تاریخی حقیقت ہے۔
آج جب ہم اس نوٹ کو ہاتھ میں لیتے ہیں تو شاید ہمیں صرف اس کی قیمت نظر آتی ہو سوال یہ نہیں کہ یہ پرانا نوٹ کتنے کا بکتا ہے۔
سوال یہ ہے کہ ہم اس مقام سے یہاں تک کیسے پہنچ گئے؟
وہ ملک جس کے پاس کبھی اپنی کرنسی کے لیے خصوصی انتظام تھا...
آج اس کی معیشت ڈالر کے اتار چڑھاؤ سے کانپتی کیوں ہے؟
ہم نے کون سی امانت سنبھالی؟
اور کون سی امانت کھا گئے؟
سچ یہ ہے کہ اس ملک کو تھوڑا تھوڑا کر کے ہر اُس شخص نے کمزور کیا جس نے اپنے فائدے کو پاکستان کے فائدے سے بڑا سمجھا۔
کسی نے قومی خزانہ لوٹا۔
کسی نے اختیار کو اپنی جاگیر بنایا۔
کسی نے قانون توڑا۔
کسی نے ادارے کمزور کیے۔
اور ہم میں سے بہت سے لوگ صرف تماشائی بنے رہے۔
یہ نوٹ ہمیں گزرے ہوئے وقت کا صرف ایک خوبصورت منظر نہیں دکھاتا...
قوموں کا زوال صرف کرنسی گرنے سے نہیں ہوتا۔
قوموں کا زوال اُس دن شروع ہوتا ہے جب امانت دار کو بے وقوف اور لٹیرے کو کامیاب سمجھا جانے لگے۔
قومیں اُس دن کمزور ہوتی ہیں جب قانون طاقتور کے لیے نرم اور کمزور کے لیے سخت ہو جائے۔
قومیں اُس دن تباہ ہوتی ہیں جب نوجوان مایوس اور حکمران بے حس ہو جائیں۔
پاکستان کہاں تھا... اور پاکستان کہاں آ گیا؟
اب سوال یہ ہے کہ کیا ہم دوبارہ جاگیں گے؟ یا یہ نیند بہت مزے کی ہے ؟؟؟؟

22/08/2026

جبلِ ثور 🏔️🤍
مکہ مکرمہ میں واقع جبلِ ثور وہ تاریخی پہاڑ ہے جس میں غارِ ثور موجود ہے، جہاں ہجرتِ مدینہ کے موقع پر نبی کریم ﷺ اور حضرت ابوبکر صدیقؓ نے پناہ لی تھی۔
آج یہاں آنے والوں کے لیے پہاڑ کے نچلے حصے تک اپنی گاڑی یا ٹیکسی سے پہنچا جا سکتا ہے، جبکہ بعض مقامی لوگ 4×4 گاڑیوں میں کچھ معاوضہ لے کر زائرین کو پہاڑ کے اوپری راستے کی طرف لے جاتے ہیں۔ حالیہ زائرین کی رپورٹس میں تقریباً 38 ریال فی شخص کا کرایہ بھی بتایا گیا ہے، تاہم یہ کوئی سرکاری مقررہ فیس نہیں اور قیمت بدل سکتی ہے۔
پہاڑ کی بلندی تقریباً 754 میٹر ہے، جبکہ غار تک پہنچنے کے لیے آگے پہاڑی راستہ پیدل طے کرنا پڑتا ہے۔
یہ صرف ایک پہاڑ نہیں، ہجرتِ نبوی ﷺ کی ایک عظیم یاد ہے۔ 🤍
#مکہ #

13/08/2026

🇵🇰 *میرا وطن… میری عزت*

*میرا وطن صرف زمین کا ایک ٹکڑا نہیں…*
*یہ میری پہچان ہے، میری نسبت ہے، میری عزت ہے۔*

*اس کی مٹی میں میرے بزرگوں کی قربانیاں شامل ہیں*،
*اس کے پرچم میں لاکھوں دعاؤں کی امید ہے،*
اور اس کے مستقبل میں ہماری نسلوں کے خواب بستے ہیں۔

*ہاں، ہمیں اپنے وطن کے مسائل نظر آتے ہیں…*
مہنگائی، بدعنوانی، سیاسیی عدم استحکام، اخلاقی زوال اور بہت سی کمزوریاں بھی دکھائی دیتی ہیں۔

*مگر وطن سے شکایت کا مطلب وطن سے نفرت نہیں ہوتا۔*

👈🔹*ہم اپنے پاکستان کو برا بھلا کہنے کے بجائےاسے بہتر بنانے کاحصہ بنیں۔*

🌼*اپنے گھر سے آغاز کریں…*
🔅 *اپنی اولاد کی تربیت سے* ،

🔅 *اپنے کردار سے* ،

🔅 *اپنی دیانت سے* ،

🔅 *اپنی ذمہ داری سے* ۔

👈☘️*کیونکہ پاکستان صرف حکومت کا نام نہیں…پاکستان ہم سب کا نام ہے۔*

🇵🇰 *میرا وطن… میری ذمہ داری، میری دعا، میری عزت۔*
اللہ ہمارے پاکستان کو امن، خوشحالی، عدل اور ایمان کی روشنی عطا فرمائے۔
آمین یا رب العالمین۔ 🤲🇵🇰

07/08/2026

14/04/2026

سابق رکن قومی اسمبلی محمد اصغر خان نوانی 1970ء کی دہائی میں ایس پی اچھرہ، لاہور ہوا کرتے تھے۔ وہ اپنے سخت گیر رویے کی وجہ سے ہلاکو خان کہلاتے تھے۔ انہوں نے مجھے اپنی زندگی کے چند واقعات بتاتے ہوئے کہا کہ میں نے بہت سی قدر آور شخصیات کو اپنی ملازمت کے دوران گرفتار کیا لیکن جس شخص نے تقویٰ اور سادگی و علمیت سے مجھے متاثر کیا وہ جماعت اسلامی کے سابق امیر میاں طفیل محمد تھے۔
بقول اصغر خان ’مجھے حکم ہوا کہ ان کو گرفتار کریں اور میں ایک ڈی ایس پی اور تین دوسرے پولیس افسران کے ہمراہ ان کے گھر اچھرہ لاہور گیا اور دروازہ کھٹکھٹایا تو انہوں نے خود ہی دروازہ کھولا۔ میں نے مدعا بیان کیا تو انہوں نے کہا مجھے کپڑے اور چند کتابیں اکٹھی کرنے دیں، آپ چند منٹ انتظار کر یں۔ مجھے جس کمرے میں بٹھایا گیا وہ ایک چار پائی، ایک میز، چار معمولی کرسیوں اور بہت سی کتابوں سے سجا ہوا تھا۔ وہ کرائے کا مکان تھا۔ میاں طفیل اندر گئے تو ڈی ایس پی نے مجھے کہا کہ آپ نے کیوں اجازت دی۔ یہ دوسرے دروازے سے بھاگ جائیں گے تو میں نے جواباً اس سے کہا یہ سادگی دیکھ رہے ہو؟ اگر یہ شخص دولت اکٹھی کرنی چاہے تو سارے کمرے میں نوٹ ہی نوٹ ہوں، تمہیں ایمان داری، سادگی نظر نہیں آرہی۔ ہاں یہ بات درست ہے کہ یہ اتنے طاقت ور ہیں کہ پورے ملک میں آگ لگا سکتے ہیں مگر یہ بزدل اور غیر محب وطن نہیں۔ یہ نظریاتی شخصیت ہیں اور نظریاتی نرسری سے لاکھوں نظریاتی لوگ پیدا کررہے ہیں‘۔
بقول ہلاکو خان (محمد اصغر خان نوانی) ’ابھی ہماری بات پوری بھی نہ ہوئی تھی کہ میاں طفیل محمد تیار تھے اور ہم ان کو اپنے ساتھ لے کر سول لائنز تھانے چلے گئے.
ڈان نیوز کے عظیم چوہدری کا حالات حاضرہ کے تناظر میں سابق ڈی آئی جی سردار اصغر خان نوانی مرحوم کے ایک یادگار واقعہ کا زکر

05/04/2026

بھٹو، نور خان اور پی آٸی اے
بھٹّو اک بڑا آدمی تھا لیکن بدقسمتی سے وہ ائر مارشل نور خان سے ٹکرا گیا۔
محفوظ مصطفی بھٹو جو کہ وزیراعظم ذوالفقار علی بھٹّو کا بھانجا تھا، جس کی تعلیمی قابلیت قطعی اس پوسٹ کے معیار کے مطابق نہ تھی لیکن اسے پی آئی اے میں سیلز پروموشن آفیسر جیسی اہم پوسٹ پر تعینات کرا دیا گیا تھا جس کے لیے لوگ نہ جانے کتنی سفارشیں، رشوت اور دھکے کھاتے ہیں۔
محفوظ مصطفی بھٹو کا دفتر اُس وقت کراچی جم خانہ کلب کے نزدیک تھا، انہیں پی آئی اے کی طرف سےایک بہترین گاڑی اور خاطر تواضع کے لیے پر کشش بجٹ مہیا کیاجاتا۔ اسکا نام محفوظ مصطفی بھٹو تھا لیکن عرف عام میں وہ ٹِکو کے نام سے مشہور تھا اور اسکے اصل نام سے بہت کم لوگ واقف تھے۔
ممتاز علی بھٹو اس وقت سندھ کے وزیر اعلیٰ تھے اس لئے محفوظ مصطفی عرف ٹِکو کی تمام سر گرمیوں کا تعلق پی آئی اے سے نہیں بلکہ وزیر اعلیٰ ہاؤس سے مختلف وزرا، سیکرٹریٹ سمیت وفاق کے سرکاری دفاتر میں گھومنےپھرنے اور مختلف فائلوں پر دستخط کرانے تک ہی محدود رہتا اور پی آئی اے کے معاملات سے اس کی لاپروائی اس قدر بڑھ گئی کہ اس کے سینئر افسران نے نوٹس لیتے ہوئے اسے وارننگ لیٹر جاری کردئیے لیکن اسکے خلاف کوئی انضباطی کارروائی کرنے سے ڈر جاتے۔ بات چلتے چلتے چیئرمین پی آئی اے ائیر مارشل ریٹائرڈ نور خان کی میز تک جا پہنچی جس کا انہوں نے سخت نوٹس لیتے ہوئے محفوظ مصطفی کی اچھی طرح کھچائی کرتے ہوئے اسے شوکاز نوٹس جاری کرتے ہوئے خبردار کیا کہ اگر پی آئی اے میں رہنا ہے تو آپ کو کام کرنا ہو گا اور آپ کے کام کی رپورٹ مانگی جائے گی۔ اگر آپ ایسا نہیں کر تے تو پھر آپ کو بغیر کسی نوٹس کے گھر بھیج دیا جائے گا، ذہن نشین کر لیجئے کہ اپنے فرائض میں دلچسپی کے سوا آپ کے پاس کوئی دوسرا آپشن نہیں۔
محفوظ مصطفی عرف ٹکوکو چیئر مین/منیجنگ ڈائریکٹر پی آئی اے کی جانب سے وارننگ لیٹر جاری ہونےکےچند روز بعد وزیراعظم ہاؤس سے ائیرمارشل نور خان کو پیغام موصول ہوا کہ پرائم منسٹر لاڑکانہ جا رہے ہیں انہوں نے آپ کو پی آئی اے کے فلاں فلاں معاملات پر بریفنگ کے لیے بلایا ہے۔ پیغام ملتے ہی ائیر مارشل نور خان نے متعلقہ معاملات کی فائلیں اور بریفنگ تیار کیں اور مقررہ دن کراچی سے لاڑکانہ پہنچ گئے جہاں المرتضیٰ ہاوُس میں وزیر اعظم بھٹو سے انکی ملاقات ہونا تھی۔ اس میٹنگ میں ائیر مارشل نور خان نے پی آئی اے کے معاملات پر تفصیل سے بریفنگ دی جو ایک گھنٹے تک جاری رہی۔ میٹنگ کے بعد ائیر مارشل نور خان وزیر اعظم ذوالفقار علی بھٹو سے ہاتھ ملانے کے بعد جانے لگے تو پرائم منسٹر نے سپاٹ لہجے میں کہا: ائیر مارشل مت بھولئے گا کہ بھٹو جہاں بھی ہے وہ بھٹو ہوتا ہے۔ ان کے الفاظ تھے۔
‏Air Marshal, A Bhutto is a Bhutto where ever he is
ائیرمارشل نورخان سمجھ گئے کہ انہیں محفوظ مصطفی بھٹو عرف ٹیکو سیلز پرومومشن آفیسرز پی آئی اے کے حوالے سے متنبّہ کیا جا رہا ہے جو والدہ کی طرف سے بھٹو ہے۔ نور خان نے اس بات پر کسی قسم کا رد عمل یا اسکا جواب نہیں دیا بلکہ ایک ہلکی سی مسکراہٹ سے وزیراعظم کو خداحافظ کہتے ہوئے لاڑکانہ سے سیدھےکراچی اپنے دفتر پہنچے اور چند منٹوں بعد اپنا استعفیٰ وزیر اعظم ہاوُس فیکس کردیا محفوظ مصطفیٰ بھٹووہ پہلی ٹیڑھی اینٹ تھی جو سابقہ وزیر اعظم بھٹّو کے ہاتھوں پی آئی اے میں لگی اور اس کے بعد تو پوری عمارت ھی ٹیڑھی اینٹوں سے بھردی گئی وہ پی آئی اے جو ائرمارشل نورخان کے زمانے میں پاکستان کے وقار کی علامت تھی آج پوری دنیا میں پاکستان کی جگ ہنسائی کی وجہ بن گئی ہے۔
میڈیا سمیت ہوائی سفر کےتمام محکموں اور برانچوں کو یہ بتانے کی ضرورت ہی نہیں کہ ائیرمارشل نور خان کے بعد پی آئی اے آہستہ آہستہ نیچے کی جانب گرتی چلی گئی اور پھر ایسی گری کہ کبھی سنبھالی ہی نہیں جا سکی۔ آج نہیں تو کل وقت بتائے گا کہ جو ائیر لائن کبھی دنیا بھر میں اپنا مقام رکھتی تھی، تباہی کی اِس حالت کو کیسے پہنچی؟
ائیر مارشل نور خان اس قوم کا وہ ستارہ تھا جو ائیر فورس، پی آئی اے، سکوائش، ہاکی اور کرکٹ کے ہر عہدے پر جہاں جہاں بھی براجمان ہوا پاکستان کے نام اور مقام کو بلندیوں تک لے گیا۔ بڑے بڑے ترقی یافتہ ملکوں کے سیاح اور ٹریولر اپنے اپنے ملکوں کی ائیر لائنز پر پی آئی اے کو ترجیح دیتے تھے۔ نور خان مرحوم کی وطن سے محبت اور مر مٹنے کا جذبہ اس ایک واقعہ سے ہی سمجھ لیں کہ ۲۰, جنوری ۱۹۷۸ کو پی آئی اے کا طیارہ کراچی میں ہائی جیک کر لیا گیا اور ہائی جیکر نے پائلٹ کو حکم دیا کہ جہاز کو بھارت لے جایا جائے۔ ائیر مارشل نورخان ہائی جیکر سے بات کرنے کیلئے جہاز کے اندر اکیلے ہی خالی ہاتھ جا پہنچے اور اسے باتوں میں مصروف رکھتے ہوئے اچانک اس کے ہاتھ سے پستول چھیننے کیلئے اس پر جھپٹے، اس دوران ہائی جیکر کی چلائی گئی گولی سے ان کی ٹانگ زخمی ہو گئی لیکن اس کے باوجود ہائی جیکر پر قابو پاتے ہوئے جہاز کے مسافروں کی زندگیاں محفوظ بنانے میں کامیاب رہے۔
آج یہ حالت ہے کہ پی آئی اے اونے پونے سیل ھو چکی ھے۔ جبکہ وہ ائیر لائنز جنہیں پی آئی اے نے انگلی پکڑ کر چلنا سکھایا ہے آج وہ پی آئی اے کی جگہ اس ریجن کا بزنس سنبھال رہی ہیں۔پی آئی اے کے ساتھ جو ہوا اس پر کاش کوئی ایسا کمیشن بنے جو اوپن کورٹ میں ہر ذمہ دار کو قوم کے سامنے لاکر بتائے کہ پی آئی اے کو کس کس نے لوٹا اور بے دردی سے تباہ کیا۔۔۔ بشکریہ مداری نامہ ۔۔۔۔

25/03/2026

حجاج بن یوسف حافظ قرآن تھا وہ تہجد کی ایک رکعت میں 10 سپاروں کی تلاوت کرتا تھا ، باجماعت نماز پڑھاتا تھا اور شراب و زنا سے دور بھاگتا تھا لیکن انتہائی ظالم تھا جب اس کی موت آئی تو انتہائی عبرتناک موت آئی
حضرت سعید بن جبیر جو کے ایک تابعی بزرگ تھے ایک دن ممبر پر بیٹھے ھوۓ یہ الفاظ ادا کیے کہ "حجاج ایک ظالم شخص ھے"
ادھر جب حجاج کو پتہ چلا کہ آپ میرے بارے میں ایسا گمان کرتے ھیں تو آپکو دربار میں بلا لیا اور پوچھا۔
کیا تم نے میرے بارے میں ایسی باتیں بولی ھیں؟؟ تو آپ نے فرمایا ھاں, بالکل تو ایک ظالم شخص ھے۔ یہ سن کر حجاج کا رنگ غصے سے سرخ ھو گیا اور آپ کے قتل کے احکامات جاری کر دیے۔ جب آپ کو قتل کیلیے دربار سے باہر لے کر جانے لگے تو آپ مسکرا دیے۔
حجاج کو ناگوار گزرا اسنے پوچھا کیوں مسکراتے ھو تو آپ نے جواب دیا تیری بےوقوفی پر اور جو اللہ تجھے ڈھیل دے رھا ھے اس پر مسکراتا ھوں۔
حجاج نے پھر حکم دیا کہ اسے میرے سامنے زبح کر دو، جب خنجر گلے پر رکھا گیا تو آپ نے اپنا رخ قبلہ کی طرف کیا اور یہ جملہ فرمایا:
اے اللہ میرے چہرہ تیری طرف ھے تیری رضا پر راضی ھوں یہ حجاج نہ موت کا مالک ھے نہ زندگی کا۔
جب حجاج نے یہ سنا تو بولا اسکا رخ قبلہ کی طرف سے پھیر دو۔ جب قبلہ سے رخ پھیرا تو آپ نے فرمایا: یااللہ رخ جدھر بھی ھو تو ھر جگہ موجود ھے. مشرق مغرب ھر طرف تیری حکمرانی ھے۔ میری دعا ھے کہ میرا قتل اسکا آخری ظلم ھو، میرے بعد اسے کسی پر مسلط نہ فرمانا۔
جب آپکی زبان سے یہ جملہ ادا ھوا اسکے ساتھ ھی آپکو قتل کر دیا گیا اور اتنا خون نکلا کہ دربار تر ھو گیا۔ ایک سمجھدار بندہ بولا کہ اتنا خون تب نکلتا ھے جب کوی خوشی خوشی مسکراتا ھوا اللہ کی رضا پر راضی ھو جاتا ھے۔
حجاج بن یوسف کے نام سے سب واقف ہیں، حجاج کو عبد الملک نے مکہ، مدینہ طائف اور یمن کا نائب مقرر کیا تھا اور اپنے بھائی بشر کی موت کے بعد اسے عراق بھیج دیا جہاں سے وہ کوفہ میں داخل ہوا، ان علاقوں میں بیس سال تک حجاج کا عمل دخل رہا اس نے کوفے میں بیٹھ کر زبردست فتوحات حاصل کیں۔
اس کے دور میں مسلمان مجاہدین، چین تک پہنچ گئے تھے، حجاج بن یوسف نے ہی قران پاک پر اعراب لگوائے، الله تعالی نے اسے بڑی فصاحت و بلاغت اور شجاعت سے نوازا تھا حجاج حافظ قران تھا. شراب نوشی اور بدکاری سے بچتا تھا. وہ جہاد کا دھنی اور فتوحات کا حریص تھا. مگر اسکی تمام اچھائیوں پر اسکی ایک برائی نے پردہ ڈال دیا تھا اور وہ برائی کیا تھی ؟ "ظلم "
حجاج بہت ظالم تھا، اسنے اپنی زندگی میں ایک خوں خوار درندے کا روپ دھار رکھا تھا..ایک طرف موسیٰ بن نصیر اور محمد بن قاسم کفار کی گردنیں اڑا رہے تھے اور دوسری طرف وہ خود الله کے بندوں،اولیاں اور علما کے خوں سے ہولی کھیل رہا تھا. حجاج نے ایک لاکھ بیس ہزار انسانوں کو قتل کیا ہے ،اس کے جیل خانوں میں ایک ایک دن میں اسی اسی ہزار قیدی ایک وقت میں ہوتے جن میں سے تیس ہزار عورتیں تھیں. اس نے جو آخری قتل کیا وہ عظیم تابعی اور زاہد و پارسا انسان حضرت سعید بن جبیر رضی الله عنہ کا قتل تھا۔
انہیں قتل کرنے کے بعد حجاج پر وحشت سوار ہو گئی تھی، وہ نفسیاتی مریض بن گیا تھا، حجاج جب بھی سوتا، حضرت سعید بن جبیر اس کے خواب میں ا کر اسکا دامن پکڑ کر کہتے کہ اے دشمن خدا تو نے مجھے کیوں قتل کیا، میں نے تیرا کیا بگاڑا تھا؟ جواب میں حجاج کہتا کہ مجھے اور سعید کو کیا ہو گیا ہے۔۔؟
اس کے ساتھ حجاج کو وہ بیماری لگ گئی زمہریری کہا جاتا ہے ،اس میں سخت سردی کلیجے سے اٹھ کر سارے جسم پر چھا جاتی تھی ،وہ کانپتا تھا ،آگ سے بھری انگیٹھیاں اس کے پاس لائی جاتی تھیں اور اس قدر قریب رکھ دی جاتی تھیں کہ اسکی کھال جل جاتی تھی مگر اسے احساس نہیں ہوتا تھا، حکیموں کو دکھانے پر انہوں نے بتایا کہ پیٹ میں سرطان ہے ،ایک طبیب نے گوشت کا ٹکڑا لیا اور اسے دھاگے کے ساتھ باندھ کر حجاج کے حلق میں اتار دیا۔
تھوڑی دیر بعد دھاگے کو کھینچا تو اس گوشت کے ٹکڑے کے ساتھ بہت عجیب نسل کے کیڑے چمٹے ھوۓ تھے اور اتنی بدبو تھی جو پورے ایک مربع میل کے فاصلے پر پھیل گی۔ درباری اٹھ کر بھاگ گۓ حکیم بھی بھاگنے لگا، حجاج بولا تو کدھر جاتا ھے علاج تو کر۔۔ حکیم بولا تیری بیماری زمینی نہیں آسمانی ھے۔ اللہ سے پناہ مانگ حجاج، جب مادی تدبیروں سے مایوس ہو گیا تو اس نے حضرت حسن بصری رحمتہ الله علیہ کو بلوایا اور انسے دعا کی درخواست کی۔
وہ حجاج کی حالت دیکھ کر رو پڑے اور فرمانے لگے میں نے تجھے منع کیا تھا کہ نیک بندوں کے ساتھ چھیڑ چھاڑ نہ کرنا، ان پر ظلم نہ کرنا ،مگر تو باز نہ آیا …آج حجاج عبرت کا سبب بنا ہوا تھا. وہ اندر ،باہر سے جل رہا تھا ،وہ اندر سے ٹوٹ پھوٹ چکا تھا. حضرت بن جبیر رضی الله تعالی عنہ کی وفات کے چالیس دن بعد ہی حجاج کی بھی موت ہو گئی تھی۔
جب دیکھا کہ بچنے کا امکان نہیں تو قریبی عزیزوں کو بلایا جو بڑی کراہت کے ساتھ حجاج کے پاس آۓ۔ وہ بولا میں مر جاوں تو جنازہ رات کو پڑھانا اور صبح ھو تو میری قبر کا نشان بھی مٹا دینا کیوں کہ لوگ مجھے مرنے کے بعد قبر میں بھی نہی چھوڑیں گے۔ اگلے دن حجاج کا پیٹ پھٹ گیا اور اسکی موت واقع ھوی۔
اللہ ظالم کی رسی دراز ضرور کرتا ھے لیکن جب ظالم سے حساب لیتا ھے تو، فرشتے بھی خشیت الہی سے کانپتے ھیں، عرش ھل جاتا ھے۔
اللہ ظالموں کے ظلم سے ھم سبکو محفوظ رکھے..!! آمین"
حوالہ جات
البدایہ والنہایہ از امام ابن کثیر
تاریخ طبری از امام طبری
الکامل فی التاریخ از ابن اثیر
حافظ ابن حجر عسقلانی، تہذیب التہذیب، جلد ہفتم،226۔

22/03/2026

دنیا کو ہے پھر معرکۂ رُوح و بدن پیش
تہذیب نے پھر اپنے درِندوں کو اُبھارا
اللہ کو پامردیِ مومن پہ بھروسا
اِبلیس کو یورپ کی مشینوں کا سہارا

شرح:
علامہ اقبال کے یہ اشعار جدید تہذیب، طاقت کے منبع، انسان کی روحانی حیثیت اور مستقبلِ انسانیت کے بارے میں نہایت گہرا فکری اعلان ہیں۔ اقبال یہاں دنیا کو ایک نئے معرکۂ روح و بدن کے دہانے پر کھڑا دیکھتے ہیں۔ اس معرکے سے مراد صرف مذہب اور مادہ کا سادہ تصادم نہیں، بلکہ دو مختلف تصوراتِ انسان کا ٹکراؤ ہے۔ایک وہ انسان جو روح، اخلاق، ذمہ داری اور خدا آگاہی سے تشکیل پاتا ہے، اور دوسرا وہ انسان جو محض جسم، خواہش، طاقت، پیداوار اور تسلط کے پیمانوں سے ناپا جاتا ہے۔

علامہ نے عصرِ حاضر کے چہرے سے نقاب اٹھایا ہے۔ “دنیا کو ہے پھر معرکۂ روح و بدن پیش” میں اقبال ہمیں متنبہ کرتے ہیں کہ انسان ایک بار پھر ایسے دوراہے پر کھڑا ہے جہاں ایک طرف روح، اخلاق، ایمان اور انسانی عظمت ہے، اور دوسری طرف مادہ، خواہش، مفاد اور بے رحم طاقت۔ یہ صرف خیالات کی جنگ نہیں، بلکہ انسان کے مستقبل، اس کی شناخت اور اس کی تقدیر کا فیصلہ کرنے والا معرکہ ہے۔ اسی لیے اقبال فرماتے ہیں: “تہذیب نے پھر اپنے درندوں کو اُبھارا”۔ یعنی وہ تہذیب جو خود کو روشن، مہذب اور ترقی یافتہ کہتی ہے، اسی کے باطن سے ظلم، جنگ، استحصال، خونریزی اور انسان دشمن قوتیں جنم لے رہی ہیں۔ آج کے عالمی حالات اس شعر کی زندہ تفسیر ہیں، جہاں ترقی کے نام پر انسانیت کو کچلا جا رہا ہے اور طاقت کو ترجیح دی جا رہی ہے۔

پھر اقبال حق کی اصل قوت کی طرف ہماری رہنمائی کرتے ہیں: “اللہ کو پامردیِ مومن پہ بھروسا”۔ یہاں مومن سے مراد وہ بیدار، غیرت مند، باکردار اور ثابت قدم انسان ہے جو حالات کے جبر کے سامنے جھکتا نہیں، جو باطل کی چکاچوند سے مرعوب نہیں ہوتا، اور جو اپنی روحانی طاقت سے تاریخ کا رخ موڑنے کی صلاحیت رکھتا ہے۔ اس کے مقابلے میں “اِبلیس کو یورپ کی مشینوں کا سہارا” ایک ایسی تہذیب کی تصویر ہے جو مشین، صنعت، طاقت اور مادی ترقی کے نشے میں انسان کے باطن کو کھو بیٹھی ہے۔ اقبال کا پیغام نہایت واضح اور لرزا دینے والا ہے: دنیا کی اصل نجات مشینوں، اسلحے اور مادی قوت میں نہیں، بلکہ زندہ ضمیر، بلند کردار، اخلاقی جرات اور ایمان کی حرارت میں ہے۔ جب تک تہذیب روح سے خالی رہے گی، اس کے ہاتھوں انسانیت زخمی ہوتی رہے گی اور جب تک مردِ مومن اپنی پامردی، خودی اور حق گوئی کو زندہ رکھے گا، باطل کی ہر مشین، ہر قوت اور ہر غرور آخرکار شکست سے دوچار ہوگا۔

بُڈھّے بلوچ کی نِصیحت بیٹے کو

20/02/2026

آشنا اپنی حقیقت سے ہو اے دہقاں ذرا
دانہ تو، کھیتی بھی تو، باراں بھی تو، حاصل بھی تُو
آہ، کس کی جُستجو آوارہ رکھتی ہے تجھے
راہ تُو، رہرو بھی تُو، رہبر بھی تُو، منزل بھی تُو
کانپتا ہے دل ترا اندیشۂ طوفاں سے کیا
ناخدا تو، بحر تو، کشتی بھی تو، ساحل بھی تُو
دیکھ آ کر کوچۂ چاکِ گریباں میں کبھی
قیس تو، لیلیٰ بھی تو، صحرا بھی تو، محمل بھی تُو
وائے نادانی کہ تُو محتاجِ ساقی ہو گیا
مے بھی تو، مِینا بھی تو، ساقی بھی تو، محفل بھی تُو
شُعلہ بن کر پھُونک دے خاشاکِ غیر اللہ کو
خوفِ باطل کیا کہ ہے غارت گرِ باطل بھی تُو
بے خبر! تُو جوہرِ آئینۂ ایّام ہے
تُو زمانے میں خدا کا آخری پیغام ہے

نظم :شمع اور شاعر
(فروری ۱۹۱۲ء)