09/08/2026
.
مُلڪ سڄو ماٺار ۾ ويڙھيو پيو آھي،
ھا پر! سنڌي ادبي سنگت جاڳي ٿي.
راشد مورائي
سنڌي ادبي سنگت سنڌ (مرڪز) جي سڏ تي سنڌ جي وحدت تي ٿيندڙ وارَ ۽ نوان صوبا ٺاهڻ واري امڪاني سازشن خلاف سنڌي ادبي سنگت شاخ ٺڪراٺو پاران "سنڌ منھنجي امان" جي سِري ھيٺ ٺڪراٺو شھر ۾ احتجاجي ڌرڻو، مظاهرو ۽ ريلي ڪڊي وئي. احتجاجي مظاھري ۾ شاعرن، استادن، صحافين ۽ شھرين شرڪت ڪئي. جن ۾ عابد جاني ملڪ، اصغر علي سمون، واجد سومرو، عطا سھتو، نظام الدين قاضي، الاھي بخش بگٽي، ارسلان منگي، مُشتاق احمد مھر، تنوير احمد مھتم، شاھد حسين مھتم، فقير ڪرم علي مھتم، برڪت علي مھتم ۽ ٻين شرڪت ڪري چيو تہ سنڌ ڌرتي ازل کان سنڌين جي ڌرتي ۽ مادرِ وطن رھيو آھي. سنڌ اُھا ڌرتي آھي جيڪا پوري ملڪ کي کارائي ۽ ھلائي ٿي تہ وري سازشون بہ ھن ئي ڌرتيءَ سان ڪڏھن ڪارونجھر جي ڪور، ڪڏھن ٻيٽن جي والار تہ ڪڏھن سنڌو درياءَ تي نوان ڊيم ۽ ڪئنالن جا منصوبا تہ ڪڏھن وري ھن عظيم ڌرتيءَ جي سيني ۾ خنجر کوڙي، ٽڪڙا ٽڪڙا ڪري نوان صوبا ٺاهڻ جا ناپاڪ ارادا!!!! ھنن چيو تہ اھڙن ناپاڪ ارادا رکندڙن کي ٻڌايون ٿا تہ سنڌ ھميشہ ھڪ وطن رھيو آھي ۽ ھميشہ ھڪ ئي رھندي. سنڌ، اٺ ڪروڙ سنڌين جي ماءُ آھي جنھنکي سنڌي جوڌا ڪڏھن بہ ڳڀا ڳڀا ڪرڻ ڪونہ ڏيندا.
