20/06/2026
موسمیاتی تبدیلی اور آم کے باغات کی بروقت مینجمنٹ
پاکستان میں موسمیاتی تبدیلی (Climate Change) کے اثرات اب واضح طور پر محسوس کیے جا رہے ہیں۔ آم کے سیزن میں بھی نمایاں تبدیلی آ چکی ہے۔ پھل کی برداشت (Harvesting) پہلے کے مقابلے میں جلد شروع ہو رہی ہے، جس کے نتیجے میں آم کا مجموعی سیزن بھی پہلے ختم ہو جاتا ہے۔ اس صورتحال کے پیش نظر آم کے باغات کی تمام مینجمنٹ پریکٹسز کو بھی نئے موسمی حالات کے مطابق ترتیب دینا وقت کی اہم ضرورت ہے۔
ہمارے باشعور اور دور اندیش کاشتکار اس حقیقت کو سمجھ چکے ہیں اور انہوں نے آم کے سیزن میں آنے والی تبدیلی کے مطابق اپنی زرعی سرگرمیوں، خصوصاً کھادوں، آبپاشی، کانٹ چھانٹ (Pruning) اور دیگر باغبانی امور کے اوقات میں بھی مناسب تبدیلی کر لی ہے۔ تاہم بعض کاشتکار اس تبدیلی سے آگاہ ہونے کے باوجود عملی طور پر اب بھی پرانے شیڈول پر عمل کرتے ہیں۔ وہ انتظار کرتے رہتے ہیں کہ تمام اقسام، خصوصاً دیر سے پکنے والی اقسام کی برداشت مکمل ہو جائے، تب ہی باغات میں کھاد اور پانی کا انتظام کیا جائے۔ بعد ازاں یہی کاشتکار پھل کی کم پیداوار اور دیگر مسائل کی شکایت کرتے نظر آتے ہیں۔
ایسے کاشتکاروں کی خدمت میں گزارش ہے کہ اس وقت وہ بہترین موقع ہے جب جلد برداشت ہونے والی آم کی اقسام کی برداشت مکمل ہوتے ہی ان کی مینجمنٹ شروع کر دی جائے۔ کیونکہ جولائی سے مون سون کا آغاز ہو جاتا ہے اور بارشوں کی وجہ سے مٹی میں نمی کی مقدار بہت بڑھ جاتی ہے۔ اس صورتحال میں کھادوں کے مؤثر استعمال میں مشکلات پیدا ہو جاتی ہیں۔
پاکستان میں زیادہ تر کاشتکار یوریا اور ڈی اے پی (DAP) استعمال کرتے ہیں۔ زیادہ بارشوں یا غیر متوازن آبپاشی کی صورت میں ڈی اے پی کے فاسفورس کے فکسیشن (Fixation) کے امکانات بڑھ جاتے ہیں، جبکہ یوریا کے نائٹروجن کے لیچنگ (Leaching) اور وولیٹیلائزیشن (Volatilization) کے ذریعے ضائع ہونے کے امکانات بھی بڑھ جاتے ہیں۔ نتیجتاً کھادوں کی افادیت کم ہو جاتی ہے اور مطلوبہ نتائج حاصل نہیں ہوتے۔
لہٰذا میری تمام کسان دوستوں کو مخلصانہ مشاورت ہے کہ جونہی آپ کی جلد برداشت ہونے والی آم کی اقسام کی برداشت مکمل ہو، بلا تاخیر ان کے باغات کی بعد از برداشت مینجمنٹ شروع کر دیں۔ اس میں بالخصوص کانٹ چھانٹ (Pruning) اور متوازن کھادوں کا بروقت استعمال انتہائی اہم عوامل ہیں، جو آئندہ سیزن میں بہتر شگوفہ بندی، پھول آنے اور زیادہ پیداوار کے حصول میں کلیدی کردار ادا کرتے ہیں۔
ریاض حسین
Scientific Officer (Horticulture)
M.Phil (UAF)
Ph.D. Scholar
MNS University of Agriculture, Multan
